Ibinasura ng Malakanyang ang akusasyong may “favoritism” ang pamahalaan sa planong unang makakuha ng bakuna kontra COVID-19 sa mga manufacturer mula sa China.
Ito ay sa kabila ng pagkuwestiyon sa efficacy o bisa ng bakunang likha ng China at mas mataas na presyo nito kumpara sa ibang brand ng COVID-19 vaccine.
Ayon kay Presidential Spokesperson Harry Roque, hindi na dapat maging mapili pa ang Pilipinas sa bakuna kung mas maagang makakakuha ng suplay nito sa China.
Iginiit niRroque, mas mahalaga pa ring may makukuhanan ng suplay ng COVID-19 vaccine ang Pilipinas saan man itong magmumula.
Sa kasalukuyan kasi aniya, sa Hunyo pa ang pinakamaagang petsa na maaaring makatanggap ng suplay ng bakuna kontra COVID-19 ang Pilipinas mula sa mga western countries.
Idinepensa rin ni Roque ang 50% efficacy rate ng bakunang likha ng China tulad ng Sinovac dahil pasok pa rin naman aniya ito sa itinakdang minimum standard ng World Health Organization.