Naniniwala si dating Vice President Jejomar Binay na makikita niya pang magkakasundo ang kaniyang dalawang anak na sina Abby at Junjun.
Ito ay matapos ang nangyaring iringan sa pagitan ng dalawa sa debateng inorganisa ng Parish Pastoral Council for Responsible Voting (PPCRV) sa isang simbahan sa Makati.
Ayon sa dating bise presidente, hindi na niya ikinagulat nang magkainitan ang magkapatid.
Aniya, naisip na niyang hindi malayong mangyaring magkaroon ng pagtatalo ang dalawa nang papwestuhin na sila sa kanilang mga upuan at kung saan nagkatabi ang dalawa niyang anak.
Kasabay nito, iginiit ni Binay na noon pa man ay sinabi na niya kay Junjun na huwag nang kalabanin ang kaniyang ate na si Abby.
