Patay ang isang 15-anyos na estudyante matapos atakehin ng mga hinihinalang miyembro ng NPA o New People’s Army ang mga sundalong nagkukumpuni ng isang day care center sa Cawayan Masbate.
Ayon kay Philippine Army 9th Infantry Division Spokesman Captain Joash Pramis, pinanonood lamang ng biktimang si Vincent Pekiro ang mga nagkukumpuning mga sundalo nang biglang paulanan sila ng bala nang hindi matukoy na bilang ng mga rebelde.
Dagdag ni Pramis, nakarinig umano ng nasa limang putok ng baril ang mga sundalo at unang tinamaan ang binatilyo na agad na ikinasawi nito.
Hindi na aniya gumanti ng putok ang mga sundalo dahil bukod kay Pekiro ay marami pang mga sibilyan ang nasa lugar.
Sinabi pa ni Pramis na nagpadala na ng tropa ang militar para tugisin ang mga namaril na rebelde.
—-
