Duda si Interior and Local Government Secretary Jonvic Remulla na matutuloy ang boxing match sa pagitan nina Davao City Vice Mayor Sebastian ‘Baste’ Duterte at Philippine National Police Chief General Nicolas Torre the third.
Kasunod ito ng pagtanggap ni P-N-P chief Gen. Torre sa hamon ng naturang vice mayor ng Davao City.
Ayon kay Secretary Remulla, sakaling matuloy ang naturang laban ay nasa likod ito ng hepe ng pambansang pulisya.
Biro pa nito, tila isang pitbull ang kanyang pambato at hindi umaatras sa laban kung kaya’t nasa kamay na ng nakababatang Duterte kung magpapatuloy ito sa naturang match.
Gayunman naniniwala ang naturang opisyal na dapat ay isinasaayos na lamang sa korte ang mga problema at hindi sa boxing.
Binigyang diin pa ni Secretary Remulla na tila hindi magandang ehemplo sa mga kabataan ang paghamon ng suntukan nang kasalukuyang mayor ng Davao sa halip aniyang maghamon ay tumulong na lamang ito sa mga residente sa kanilang lalawigan na naapektuhan ng pagbaha.
