Kumpiyansa ang Department of Social Welfare and Development (DSWD) na naging maayos ang pamamahagi nila ng educational assistance para sa mga estudyante dahil narin sa tulong ng Department of the Interior and Local Government (DILG) at mga Local Government Units (LGUs).
Pinasalamatan ni DSWD secretary Erwin Tulfo, si DILG secretary Benhur Abalos, mga otoridad, mga Mayor at Governor maging ang mga nagtiyagang pumila at nagbaon ng mahabang pasensya para sa nasabing programa.
Ayon kay Tulfo, nasa 66,000 beneficiary students ang natulungan ng ahensya nito lamang Sabado na umabot sa halagang P168 million.
Aminado si Sec. Tulfo, na mayroon pang kaunting problema na dapat ayusin sa kanilang ahensya kabilang na dito ang pagdaragdag ng payout sites at kung papaano ma-aaccommodate ang mga walang cellphone o access sa internet.
Nilinaw pa ni Tulfo na may mga lugar na mahina ang internet habang ang iba naman ay walang load pang-register kaya dapat nila itong pagplanuhang mabuti upang maiwasan ang muling pagdagsa ng mga tao sa labas ng kanilang tanggapan.
Magbibigay ang DSWD ng naturang ayuda tuwing Sabado na tatagal hanggang sa Setyembre a-24.
