Itutuloy na ngayong weekend ng DPWH o Department of Public Works and Highways ang road reblocking sa iba’t ibang lugar sa Quezon City, Caloocan at Pasig.
Ipinabatid ni DPWH – National Capital Region (NCR) Director Melvin Navarro na sisimulan nila mamayang 11:00 ng gabi ang road repairs na tatagal hanggang 5:00 ng madaling araw ng Lunes, Setymbre 11.
Kabilang sa mga apektadong kalsada sa Quezon City at Caloocan ang ikalawang lane, southbound ng A. Bonifacio Avenue mula Dome Street hanggang St. Rivera; ikalawang lane, southbound ng Mindanao Avenue mula Tandang Sora sa harap ng Shell Gas station; ikatlong lane, southbound ng EDSA mula Kaingin Road hanggang Dario Bridge.
Sa pasig naman, sasailalim sa repair ang southbound ng C5 road malapit sa Julia Vargas at northbound ng Manila East Road sa harap ng SM East Ortigas.
Dahil sa road repairs, pinayuhan ng DPWH ang mga motorista na maghanap ng mga alternatibong ruta.
