Nanindigan ang pamunuan ng MRT o Metro Rail Transit Line 3 sa ilalim ng DOTr o Department of Transportation na hindi nila palalampasin ang tangkang pagpupuslit ng granada ng isang lalaki sa isa nilang istasyon.
Iyan ang inilabas na pahayag ng pamunuan ng DOTr-MRT 3 matapos na maaresto ang naturang lalaki nang ito’y maaresto sa Cubao Station pasado alas siete kagabi nang makita ang granada nito na nakasilid sa kaniyang bag.
Ayon sa DOTr, ang mga ganitong kaso anila ang siyang nagtulak sa kanila para higpitan pang lalo ang kanilang seguridad para na rin sa kapakanan at kaligtasan ng mga pasahero nito.
Kasunod niyan, umapela ang DOTr sa publiko na habaan pa ang kanilang pasensya at pang-unawa sa ipinatutupad nilang seguridad sabay paghihikayat sa lahat na maging mapagmatiyag at i-ulat sa mga kinauukulan ang anumang kahina-hinalang bagay o aktibidad sa loob at labas ng istasyon.
