Nakatakdang mag-isyu ng Advisory ang Department of Labor and Employment na sasakupin ang business arrangement ng mga rider at delivery apps.
Sinabi ni Labor Secretary Silvestre Bello III na ito ay napakabagong labor relation at hindi ito kagaya ng ordinaryong employer-employee relationship.
Aniya, kabilang dito ang apat na partido kabilang ang management ng delivery app, riders, vendors at mga kustomer.
Paliwanag ni Bello na lalamanin ng kanilang ginagawang advisory ang mga patakaran hinggil dito upang matiyak ang kaayusan dahil hindi batid kung sino ang employer sa ganitong klaseng negosyo.
Matatandaang ilang riders ng food delivery app na foodpanda sa davao city ang nasuspinde ng 10 taon matapos na magprotesta dahil sa umano’y hindi patas na computation sa kanilang bawat biyahe. —Hyacinth Ludivico
