Tiwala ang Department of Health (DOH), na mananatiling epektibo ang mga kasalukuyang nilikhang bakuna kontra COVID-19 sa bagong nadiskubreng strain ng virus.
Ayon kay Dr. Edsel Salvana ng DOH Technical Advisory Group, kung ibabatay sa numero ng mutations ng virus mas malamang na walang magiging epekto ito sa bakuna.
Sinabi ni Salvana, sakaling maging resistant ang bagong strain ng virus sa bakuna, hindi naman ito magiging biglaan.
Halimbawa aniya ay kung kasalukuyang 95% ang efficacy ng bakunang gawa ng pfizer posibleng unti-unti itong bumaba sa 85% saka magiging 70%.
Dagdag ni Salvana, bahagi ng katangian ng virus ang pagmu-mutate habang tumataas ang bilang o dumadami ang nahahawaan.
Kaugnay nito, pinaalalahanan naman ni Dr. Anna Ong-Lim ng DOH-TAG ang publiko na mahigpit pa ring sundin ang mga umiiral na minimum health protocols para maiwasan ang pag-develop ng bagong variant ng virus sa bansa.
