Nagpaalala sa publiko ang pamunuan ng Department of the Interior and Local Government (DILG) na huwag maniwala sa mga kumakalat na text, tawag o anumang uri ng mensahe na nagsasabing galing ito sa ahensya.
Sa Laging Handa briefing, sinabi ni DILG Undersecretary Jonathan Malaya na ‘wag maniwala sa mga scammer na gumagamit ng pangalan ng ahensya at ilang mga matataas na opisyal ng ahensya.
Nabatid ng ahensya sa mga kumakalat na pekeng messages at call mula sa ilang scammers, ay nagsasaad na maaaring makatanggap ng ayuda kapalit ng maliit na halaga ng pera na hinihingi naman ng mga nagpapanggap na bahagi ng DILG.
Madami nga pong scam na sasabihin, sila ay makakatanggap, for example, ng tulong sa gobyerno or sa DILG kung sila ay magdedeposito ng ganitong amount, kung sila ay magpapadala ng ganitong pera. Pag meron na pong usapin tungkol sa pera ay ‘wag na ‘wag po kayong maniniwala,” ani Malaya.
Pagdidiin pa ni Malaya, kailanman ay di dadaan ang mensahe ng ahensya sa ganitong mga pamamaraan, at sa halip ay makikipag-ugnayan ang punong tanggapan ng DILG sa mga sangay nito o kaya’y sa mga local government unit (LGU) hinggil sa mga nais na iparating sa publiko.
We do not communicate with our partner in the local government units through unofficial ways. Dinadaan po namin ‘yan through the chain, through official channels. So, kung may kakailanganin po kami sa inyo, we will course it, either through our regional director, our provincial director, or the local government operations officer. Para po makasiguro na ang kausap niyo talaga ay mula sa DILG,” ani Malaya.
