Nilinaw ng lokal na pamahalaan ng Baliuag at Calumpit sa Bulacan na walang koordinasyon sa kanilang hanay ang mga flood control project ng Department of Public Works and Highways (DPWH).
Ito’y ayon mismo kina Calumpit Mayor Glorime “Lem” Faustino at Baliuag City Vice Mayor Ferdinand “Ferdie” Estrella, kasabay ng paghahabol ng pamahalaan sa mga nasa likod ng mga sinasabing palpak, substandard, at guni-guning flood control projects.
Giit ni Mayor Faustino, nakasasama ng loob dahil bukod sa pagiging biktima ng baha ay nagiging biktima pa sila ng maanomalyang flood control project.
Dagdag pa niya, karapatang malaman ng lokal na pamahalaan ang mga proyektong ipinatutupad ng national government.
Kaugnay nito, animado si Vice Mayor Estrella na ikinagugulat na lamang nila kapag may mga proyekto ang DPWH sa kanilang lugar.
Ibinunyag din ng bise alkalde na ang mga taga-barangay na nakasasakop sa site ang kadalasang kinakausap ng mga contractor.
