Ikinalugod ng ilang senador ang pagtalaga kay Police Lt. Gen. Camilo Cascolan bilang bagong hepe ng Philippine National Police (PNP).
Ayon kay Senador Ronald Dela Rosa, na dati ring PNP chief, ‘more qualified’ aniya si Cascolan sa naturang posisyon.
Dagdag pa ni Dela Rosa, maganda ang magiging pamamalakad ni Cascolan lalo’t hindi ito umaastang ‘boss’ sa halip ay nagiging isang ‘motivator’ o nagpapalakas ng loob ng kanyang mga tauhan.
Kasabay nito, iginiit naman ni dating PNP Chief, Senador Panfilo Lacson, na kahit dalawang buwan lang manunungkulan ang bagong hepe, hindi aniya ito makakaapekto sa operasyon ng PNP.
Pagdidiin pa ni Lacson, batikan na sa serbisyo si Cascolan kaya’t sigurado ang senador na gamay na ni Cascolan ang pamamalakad sa PNP.
Samantala, paalala ni Lacson, bagamat hindi na makikinabang si Cascolan sa 2021 budget, ay siya pa rin naman ang dedepensa sa panukalang budget ng PNP sa 2021. —ulat mula kay Cely Ortega-Bueno
