Sa gitna ng nararanasang coronavirus disease 2019 (COVID-19) pandemic, ilang hinihinalang drug pushers ang patuloy parin sa pagbebenta ng iligal na droga sa pamamagitan ng online selling.
Sa ikinasang buy bust operation ng mga otoridad, naaresto ng mga ito ang mga drug suspect na sina Paul John Orendain at ang scorer nito na si Ace Cabrera.
Natiklo ang dalawa sa mismong bahay ng mga ito na malapit lamang sa Cavite Police Provincial Office (CPPO).
Ayon sa suspek na si Orendain, nangyayari ang kanilang mga iligal na transaksyon via online at nagkakabayaran naman sa pamamagitan ng mobile payment.
Matapos nito, agad umano niyang ihahatid sa isang lugar na kanilang napagkasunduan ng kanyang parokyano ang mga iligal na droga.
Nasamsam ng mga otoridad mula sa dalawang suspek ang pinatuyong dahon ng marijuana na nagkakahalaga ng P65,000, isang digital wing scale, at buy-bust money.
Nahaharap ngayon ang mga suspek sa kasong paglabag sa Dangerous Drugs Act of 2002.
