Magtutungo sa Kalayaan Island sa susunod na linggo ang Commission on Elections (Comelec) para hikayatin ang mga residente na magparehistro na bago ang nakatakdang deadline ng voter’s registration at para maiwasan ang anumang aberya.
Ayon kay Comelec Chairman George Garcia, layunin nilang mapataas ang bilang ng registrants sa lugar kung saan, mababa parin ang bilang ng mga nagparehistro para sa Barangay at Sangguniang Kabataan elections (BSKE) na nakatakdang isagawa sa Oktubre.
Sa darating na January 14, nakatakdang bisitahin ng ahensya ang nabanggit na lugar maging ang iba pang remote islands kabilang na ang Batanes at Tawi-Tawi.
Ang voter’s registration ay isinasagawa sa mga tanggapan ng Comelec tuwing Lunes hanggang Biyernes, sa ganap na alas otso ng umaga hanggang alas singko ng hapon; habang ang Register Anywhere Project (RAP) ay ikinakasa naman tuwing sabado at linggo sa mga itinalagang mall sa bansa.
