Makakatanggap ng financial assistance mula sa lokal na pamahalaan ang mga college student sa Parañaque City.
Sisimula sa susunod na linggo ang pamamahagi ng ayuda kung saan, hinihintay nalang na alisin ng Commission on Elections (COMELEC) ang resolusyong nagbabawal sa pagpapalabas, disbursement o paggastos ng pampublikong pondo sa panahon ng halalan.
Ayon sa Public Information Office (PIO) Parañaque, ang mga mag-aaral na may markang 82 hanggang 85 ay tatanggap ng P3,500 kada semestre o kabuuang P7,000 para sa buong taon, habang ang mga may ceiling grades na 86 pataas ay tatanggap naman ng P5,000 kada semestre o kabuuang P10,000 para sa dalawang semestre.
Sakop ng mga makakatanggap ng cash assistant ay ang mga estudyanteng nakatira sa Barangay Baclaran, Don Galo, La Huerta, San Dionisio, San Isidro, Sto. Nino, Tambo at Vitalez na sisimulan sa Mayo 23, alas-8 ng umaga hanggang alas-11.
Tatanggap naman sa Mayo 24 mula alas-8 ng umaga hanggang alas-11 ang mga estudyanteng nakatira sa Barangay BF Homes, Don Bosco, Marcelo Green, Mwerville, Moonwalk, San Antonio, San Martin De Porres at Sun Valley.
Ang mga estudyanteng benepisyaryo ay kailangang magdala ng ballpen, alcohol, orihinal at kopya ng kanilang school ID, official school registration form para sa unang semestre ng school year 2021-2022.
Kailangan din na nakasuot ng school uniform o school organization shirt, at iwasang magsuot ng sleeveless shirts, minikirts at shorts.
