Tuluyan nang binawi ng Food and Drug Administration o FDA ang certificates of product registration o CPR ng Sanofi Pasteur para sa kontrobersyal na dengue vaccine na Dengvaxia.
Ito, ayon kay FDA Director-General Nela Charade Puno, ay makaraang mabigo ang naturang French pharmaceutical company na tumalima sa government rules and regulations.
Wala na anya silang ibang magagawa kundi permanenteng i-revoke ang CPR ng Sanofi para sa dengvaxia products na maximum penalty.
Magugunitang isang taong sinuspinde ng FDA ang CPR para sa dengue vaccine simula December 29, 2017 matapos mabigo ang Sanofi na tumalima sa post-marketing requirements.
Dahil dito, bawal nang mag-import, magbenta o mag-distribute ng mga nasabing produkto ang Sanofi.
Sanofi Pasteur, umapela sa FDA
Naghain ng motion for reconsideration ang pharmaceutical firm na Sanofi Pasteur matapos bawiin ng Food and Drug Administration ang kanilang certificates of product registration o CPR para sa dengue vaccine na Dengvaxia.
Magugunitang inihayag ni FDA Director-General Nela Charade Puno na hindi tumalima ang Sanofi sa mga regulasyon ng gobyerno kaya’t permanenteng ni-revoke ang kanilang CPR.
Gayunman, iginiit ng Sanofi na sumusunod naman sila sa government rules and regulations at sa katunayan ay nagsumite sila ng mga dokumento mula sa post-approval commitments at regular updates sa estado ng post-marketing studies.
Ipinunto rin ng French pharmaceutical firm na hindi naman kinukuwestyon ng FDA ang safety at kahalagahan ng Dengvaxia sa revocation ng kanilang CPR.
Bago ang pagbawi sa certificate of product registration, una nang ipinag-utos ng ahensya ang pag-pullout sa merkado ng kontrobersyal na bakuna.