Dalawang linggong hindi makakapaglaro si NBA Star Stephen Curry dahil sa injury sa balikat.
Natamo ng 34-anyos na si Curry ang kaniyang left shoulder injury noong December 14 nang talunin sila ng Indiana Pacers.
Mula noon ay hindi pa nakakapaglaro sa apat na game si Curry.
Samantala, ayon sa koponan patuloy na nagpapagaling ang NBA Star at agad na babalik kapag tuluyan nang gumaling.
Pumanaw na sa edad na 45 ang UFC player na si Stephan Bonnar na idineklarang UFC Hall of Famer noong 2013.
Ayon sa UFC Management, nasawi si Bonnar habang nagtatrabaho nito lamang bisperas ng pasko dahil sa komplikasyon sa puso.
Nabatid na taong 2005, nang magsimula ang atleta sa unang season ng “The Ultimate Fighter” kung saan, una niyang naging kalaban ang American retired martial artist na si Forrest Griffin na nagwagi via unanimous decision.
Tinapos ni Bonnar ang kaniyang career noong 2014 na nakakuha ng 15-9 na record sa UFC.
Umaasa si Tokyo Olympic Silver Medalist Nesthy Petecio na maisasama ang boxing sa mga events sa 2024 edition sa Paris, France.
Magugunitang sinabi ng International Olympic Committee (IOC) na posibleng alisin ang boxing sa 2024 paris games dahil wala nang interes ang isagawa ito ng International Boxing Association (IBA).
Ayon kay Petecio, sana maisama ang boxing dahil maraming kabataan ang nangangarap na makapaglaro sa olympics.
Maliban sa featherweight na si Petecio, sumuntok din ng silver medal si flyweight Carlo paalam sa Tokyo Olympics.
Kasalukuyan namang nag-eensayo na si Petecio at iba pang miyembro ng national team na makapaglaro 2024 Paris games. – sa panunulat ni Jenn Patrolla
Pinatumba ng Philippine National Football Team na AZKALS ang Brunei, 5-1, sa nagpapatuloy na AFF Mitsubishi Electric Cup na ginanap sa Rizal Memorial Stadium sa Maynila.
Tila naging pagbawi ito ng koponan sa pagkatalo nito sa opening game nang talunin ito ng host Country na Cambodia sa score na 3-2.
Ito naman ang unang pagkapanalo ng AZKALS sa bago nilang coach na si Josep Ferre.
Samantala, dadayo naman ang AZKALS patungong Thailand sa Dis. 26 para sa susunod nitong laban. —sa panulat ni Hannah Oledan
Kasado na mamayang gabi ang laban ng Philippine Men’s Football team na Azkals kontra Brunei sa 2022 AFF Mitsubishi Electric Cup.
Gaganapin ang laban sa home court ng Azkals na rizal memorial stadium.
Kapwa bigo ang dalawang koponan sa mga unang laban nila sa pagbubukas ng torneo.
Ito ay matapos talunin ng Cambodia ang Azkals sa score na 3-2, habang ang Brunei naman ay tinambakan ng Thailand sa 0-6.
Target naman ng Azkals na makuha ang unang puwesto sa group a kung saan ka-grupo nila ang Thailand at Indonesia.
Humakot ng gintong medalya ang Pilipinas sa katatapos lamang na 2022 Asian Kickboxing championships sa Bangkok Youth Center sa Thailand noong nakaraang linggo.
Nasungkit ng Cebu-based na si Jovan Medallo ang unang gintong medalya ng bansa sa kompetisyon ng senior men’s musical forms sa iskor na 28.8 points kung saan, kaniyang pinadapa ang silver medalist na si Hsuan Wu Chi ng Chinese-Taipei.
Bukod kay Medallo, nag-uwi din ng gold medal sina Jean Claude Saclag, Renalyn Dacquel, at Gina Iniong Araos habang ang Philippine contingent na binubuo ng 14 na kickboxer ay nag-uwi rin ng isang silver medal at anim na bronze medal.
Patunay lamang ito na kayang makipagsabayan ng Pilipinas sa iba’t ibang mga bansa pagdating sa larangan ng pampalakasan.
Inaresto ng Bureau of Immigration (BI) sa Ninoy Aquino International Airport (NAIA) ang isang Filipino-American Professional Basketball Player.
Ito ay si Avery Roberto Scharer na hinuli matapos umanong tangkaing makalusot sa bansa gamit ang pekeng Philippine Passport.
Ayon kay Immigration Commissioner Norman Tansingco, noong nakaraang linggo naganap ang pag-aresto kay Scharer sa NAIA Terminal 1 nang iprisinta ang kanyang Philippine Passport sa immigration officer.
Si Scharer, na na-draft sa ika-5 overall ng Wang’S Basketball Couriers sa PBA D-League noong 2015 ay lumipad mula sa Canada at kababalik lang sa Pilipinas.
Todo paghahanda na si Pinay tennis star Alex Eala sa kanyang unang pagsabak sa professional level match ng Grand Slam sa susunod na taon.
Kasunod na rin ito nang pagpasok ni Eala sa qualifying round ng 2023 Australian Open sa January 9 hanggang 12.
Ang 17 anyos na Pinay ay rank 214 sa Women’s Tennis Association rankings.
Una nang gumawa ng kasaysayan si Eala nang maging unang Pinoy player na makakuha ng Junior Grand Slam Single Title bukod pa sa 2022 US Open Juniors Champion.
Bigong maiuwi ng Philippine Azkals ang panalo matapos matalo laban sa mga manlalaro ng Cambodia sa AFF mitsubishi Electric Cup 2022 na ginanap sa Morodok Techo National Stadium sa Phnom Penh.
Nabatid na hindi nagawang padapain ng Azkals ang Cambodia kahit dalawa sa mga players nito ay nakaranas ng injury kung saan, ito umano ang kauna-unahang pagkatalo ng Pilipinas laban sa nasabing bansa mula pa noong 2002 Tiger Cup.
Samantala, sasabak naman ang Philippine Women’S Football Team sa Europe para sa Pinatar Cup 2023 na sisimulan sa Pebrero a-15 at magtatagal hanggang a-21 sa San Pedro Del Pinatar sa Murcia, Spain.
Makakaharap ng Pilipinas ang mga bansang Wales, Scotland, at Iceland, na may mas mataas na ranggo pero umaasa ang mga atleta na kanilang maiuuwi ang panalo at karangalan ng bansa.
Nakatakdang bilhin ng bilyonaryong si Mat Ishbia ang National Basketball Association Team na Phoenix Suns at Women’S Team na Phoenix Mercury.
Bibilhin ng Chairman at CEO ng united wholesale mortgage ang mga nasbaing koponan sa halagang apat na bilyong dolyar o katumbas ng P221-B .
Si Ishbia ay isang pambansang kampeon sa koponan ng basketball ng michigan state noong taong 2000 at naipanalo nito ang tatlong sunod-sunod na finals.
Ang koponan ng phoenix suns ay kasalukuyang pagmamay ari ni Robert Sarver na sinuspinde ng national basketball association matapos nitong mainvolved sa isang iskandalo.
Sa kasalukuyan, inaayos na lang ng dalawang panig ang deal para tuluyang mailipat ang ownership nito kay Ishbia.