SPORTS

Ikinakasa na ng Philippine Olympic Committee (POC) at Philippines Sports Commission (PSC) ang paghahanda sa pagsabak ng bansa sa 32^nd Southeast Asian Games sa Cambodia sa May 5 hanggang 17.

Kasunod na rin ito ng pulong ng mga opisyal ng dalawang ahensya sa pangunguna nina POC President Abraham Bambol Tolentino at PSC Chairman Richard Bachmann.

Isinapinal sa nasabing pulong ang mga atletang Pinoy na lalaban sa halos 50 events ng SEA Games.

Natalakay din ang paglalaan ng P250-M na budget ng PSC para sa SEA Games.

Pinatunayan muli ni Andy Murray na wala pa rin siyang kupas sa tennis.

Kasunod na rin ito nang pagpasok ni Murray sa ikatlong round ng Australian Open.

Pinahiya ni Murray si Athanasios Thanasi Kokkinakis ng Australia.

Ang nasabing laban ni Murray ay itinuturing na makasaysayan ng sports analysts matapos umabot sa halos anim na oras ang bakbakan na pinakamahaba sa karera ng British tennis star.

Susunod na makakasagupa ni Murray si no. 24 Seed Roberto Bautista Agut.

Pinadapa ng Milwaukee Bucks ang Toronto Raptors sa kanilang sagupaan tungo sa final score na 130-112.

Pinangunahan ni star player Jrae Holiday ang panalo ng Bucks sa nasabing laban matapos magpaulan ng season high 37 points habang absent ang power forward player ng Bucks na si Giannis Antetokoumpo.

Nagsilbing suporta kay Holiday si Grayson Allen na gumawa ng 25 points.

Gumawa naman ng 39 points si Fred Van Vleet ng Raptors.

Sinasabing hanggang sa huling minuto ng laro ay tinangka ng Raptors na mangibabaw sa Bucks subalit hindi sila umubra.

Nakakuha ng star sa Eastwood City Walk of Fame sa Quezon City ang olympic gold medalist na si Hidilyn Diaz-Naranjo.

Sa kanyang social media account, nagpasalamat ang Pinay weightlifter sa kanyang natanggap na karangalan.

Kasama ni Diaz ang kanyang asawa na si Julius Naranjo, gayundin ang iba pang mga personalidad gaya ng writer na si Ricky Lee at aktres na si Maja Salvador.

Ang naturang hollywood-inspired walk of fame ay itinatag ng yumaong star builder at master showman na si German ‘Kuya Germs’ Moreno.

Ganap nang Filipino citizen si barangay Ginebra Import Justin Brownlee matapos itong manumpa ng katapatan sa Republika ng Pilipinas kay Senador Francis Tolentino sa isang special ceremony sa senado, kahapon.

Pinasalamatan ni Brownlee ang lahat ng sumuporta sa kanyang tinahak na landas patungo sa pagiging ganap na Pinoy sa pangunguna nina Tolentino at Senador Sonny Angara na naghain ng panukala para sa kanyang citizenship.

Aminado ang Gin Kings forward na hindi siya makapaniwala sa kanyang pinagdaanan matapos tumanggap ng malawak at malakas na suporta mula sa mamamayang Pilipino, partikular sa ilang mambabatas.

Tiniyak ni Justin na kanyang gagawin ang lahat ng kanyang makakaya upang maipagmalaki ng bawat Pinoy at tutulong upang magtagumpay ang national basketball team.

Ini-abot naman ni Tolentino kay Bronwlee ang kopya ng RA 11937 kasama si senators Bong Go at JV Ejercito.

Inaasahang makakasama na si Brownlee sa koponan ng Gilas Pilipinas at makatutulong upang ma-qualify sa FIBA World Cup at Southeast Asian Games ngayong taon.

Nakapag-uwi ng pitong gintong medalya ang Pilipinas sa naganap na South East Asian Fencing Championship sa Kuala Lumpur, Malaysia.

Kinilala ng Philippine Sports Commission ang mga gold medalist mula sa Men’s Junior Individual Sabre, Women’s Junior Team Sabre, Women’s Junior Team Foil, Women’s Junior Team Epee, at Men’s Junior Team Sabre.

Gayundin ang mga nanalo ng gintong medalya sa seniors division na sina Noelito Jose Jr. para sa Men’s Senior Individual Epee at Wilhemina Lozada para sa Women’s Senior Individual Foil.

Samantala, nakapag-uwi rin ng apat na silver medals at 10 bronze medals ang Pilipinas mula sa naturang laro.

Mag-aagawan para sa korona Barangay Ginebra at guest team na Bay Area sa PBA Commissioner’s Cup sa ‘winner-take-all’ game seven ngayong alas-5:45ng hapon sa Philippine Arena sa Bocaue, Bulacan.

Matapos magtabla sa 3-3 ang kanilang standing, nakatakdang tapusin ng Gin Kings at Dragons ang kanilang best-of-seven championship series.

Hangad ng Ginebra na masungkit ang pang-15 titulo para maging ikalawang winningest team sa PBA at maungusan ang Magnolia at Alaska milk na kapwa may 14 titulo.

Inaasam naman ng Dragons na maging ikalawang foreign squad na naghari sa PBA conference matapos ang Nicholas Stoodley ng United States noong 1980 invitationals laban sa Toyota. —mula sa panulat ni Hannah Oledan

Binalaan ng pamunuan ng Philippine Basketball Association (PBA) ang mga nagbebenta ng  tickets para sa game 7 finals ng PBA Commissioners Cup.

Ayon kay PBA Commissioner Willie Marcial, mahigpit na nakabantay ang mga otoridad laban sa iligal na bentahan ng ticket sa laro.

Sinumang mahuhuli sa iligal na bentahan ay mahaharap sa kaukulang kaso

Nitong nakaraang miyerkules, 3 katao na ang naaresto ng mga kapulisan dahil sa pagbebenta ng ticket na may patong sa presyo.

Ngayong araw, Enero 15 gaganapin ang game 7 sa pagitan ng Barangay Ginebra at Bay Area Dragons sa Philippine Arena sa Bulacan.

Posibleng mabigyan ng pagkakataon na makasuntok para sa world title ang world-ranked Filipino fighters na sina Vincent Astrolabio, Jerwin Ancajas, at Reymart Gaballo.

Ito’y matapos i-anunsiyo ni Japanese pound-for-pound superstar Naoya Inoue na babakantehin niya ngayong taon ang WBC, WBA, WBO, at IBF world bantamweight titles.

Ayon kay Inoue, wala na siyang dapat patunayan pa sa 118-pound division kaya aakyat na siya sa 122-pound class.

Matatandaang nasungkit ni Inoue ang WBC bantamweight world title nang patulugin nito si Nonito Donaire Jr. noong June 2022 habang pinabagsak din nito si Paul Butler para sa WBO world title.

Sa kasalukuyan, walang bahid-dungis ang boxing record ni Inoue taglay ang 24 wins at 21 knockouts.

Nasungkit ng Blacklist International ang ikalawang sunod na panalo matapos talunin ang kapwa filipino group na ECHO Philippines at the Tennis Indoor Senaya sa Indonesia.

Ito ang kanilang ikalawang sunod na Grand Finals appearance sa Mobile Legends: Bang Bang World Championships matapos makuha ang kanilang unang titulo sa Singapore noong 2021.

Unang naabot ng ECHO ang match point, matapos dominahin ang isang laro.

Ngunit nakuhang ipanalo ng Blacklist ang dalawang magkasunod na laro dahilan para masungkit ang unang Grand Finals slot para sa installment ngayong taon ng ML:BB World Championships.

Nakatakda namang harapin ng ECHO ang mananalo sa laban sa pagitan ng ONIC ESPORTS at RRQ Hoshi sa Sabado, 7 pm para sa huling slot ng Grand Finals.