SPORTS

Ilalagay sa FIBA ​​Hall of Fame si Caloy “The Big Difference” Loyzaga, matapos nitong ilagay ang ASIA sa World Basketball map.

Sa pangunguna ng 6’3″ center sa 1954 World championship, pumangatlo ang Pilipinas para sa pinakamahusay nitong pagtatapos sa ngayon.

Ito rin ay nananatiling pinakamahusay na pagtatapos ng isang koponan sa Asya.

Si Loyzaga ay bahagi rin ng koponan ng Pilipinas na nanalo ng 4 gold medals sa Asian games at dalawang kampeonato sa FIBA ​Asia Cup pati na rin ang paglabas sa dalawang Olympics.

Bilang coach, pinangunahan ni Loyzaga ang pambansang koponan sa 1967 FIBA ​​Asia Cup title, na tinalo ang dating host country na South Korea sa virtual final, 83-80, sa huling araw ng event.

Bukod pa rito ay nag-coach din siya sa Samahang Basketbol ng Pilipinas mula 1977 hanggang 1979, humawak sa Yco-Tanduay, kung saan siya nababagay sa Manila Industrial and Commercial Athletic Association.

Sasabak muli sa world championships si Pinay gymnast Breanna Labadan matapos masungkit ang ika-9 na puwesto sa individual all-around finals ng 14th Rhythmic Gymnastics Asian Championships kahapon sa Ninoy Aquino Stadium.

Nakakolekta si Labadan ng kabuuang 110.40 points sa torneong inorganisa ng Gymnastics Association of the Philippines at suportado ng Philippine Sports Commission.

Naka-score siya ng 26.10 sa hoops, 29.40 sa ball, 28.30 sa clubs at 26.45 sa ribbon na mas mataas ito kumpara sa iniskor niya sa 2022 edi­tion ng torneong idinaos sa Pattaya, Thailand.

Nais pagsamahin ni PBA Chairman Ricky Vargas sina Jordan Clarkson at Justin Brownlee sa laro ng Gilas Pilipinas para sa FIBA World Cup.

Nabatid na naturalized player si Clarkson habang si Brownlee naman ay maglalaro bilang local.

 Sakaling hindi ito payagan ng FIBA ay maaring i-apela ito ng Samahang Basketball ng Pilipinas.

Tuluyan nang nagretiro si Filipino-German Christian Standhardinger sa Gilas Pilipinas.

Inihayag ni Standhardinger ang kanyang desisyon sa kanyang social media account ilang araw matapos mabawi ng Gilas Pilipinas ang kampeonato at gintong medalya sa katatapos lamang na 32nd Southeast Asian Games sa Phnom Penh, Cambodia.

 Nabatid na nakapagtala si Standhardinger ng siyam na puntos at pitong rebounds laban sa Cambodia.

 Naniniwala naman si Standhardinger na marami pang mas batang manlalaro na mayroong malalim na talento sa Pilipinas na aniya ay maaaring hubugin para maglaro sa national team.

Nagpapasalamat si Gilas Pilipinas head coach at program director Chot Reyes sa suporta ng Philippine Basketball Association na naging daan upang mabawi ng bansa ang korona sa katatapos lamang na 32nd Southeast Asian Games na ginanap sa Cambodia.

Personal itong ipinarating ni coach Reyes sa PBA Board of Governors matapos ang kanyang pagbisita sa pag­pupulong ng grupo kahapon.

Balik sa trono ang Gilas isang taon matapos isuko ang korona sa Indonesia mula sa 80-69 panalo sa host Cambodia.

Una silang nakabawi sa Indonesia sa semifinals, 84-76.

Tinalo ng Indonesia ang Gilas, 85-71, noong na­karaang SEA Games sa Vietnam dahilan para mapatalsik sa tro­no ang Pilipinas sa unang pagkakataon simula noong 1989.

Nauna nang pinasala­ma­tan ng Samahang Basketbol ng Pilipinas ang PBA at ang UAAP.

Maaga pa lamang ay pinaghandaan na ng Philippine Women’s Football Team na Filipinas ang ikalawang yugto ng 2024 Asian Football Confederation Women’s Olympic Qualifying Tournament.

Ito ay gaganapin sa Australia simula October 23-November 1.

Nabatid na nasa Group A ang Filipinas kung saan makakaharap nila ang Australia, Chinese Taipei at Iran.

Samantala, nakaharap na ng Filipinas ang nasabing mga koponan noong mga nagdaang mga torneo kung saan pinadapa nila ang Chinese Taipei sa pamamagitan ng penalties sa AFC Women’s Asian Cup noong nakaraang taon.

Bukod pa rito ay napayuko rin nila ang Iran sa 2020 AFC Olympic Qualifying Tournament subalit nabigo sila sa Australia noong U-23 AFF Women’s Championship noong nakaraang taon.

Nagpakitang gilas si Agatha Wong sa Wushu competition sa 32nd Southeast Asian games na ginaganap sa Phnom Penh, Cambodia.

Isang pulido at solidong performance ang inihanda ni Wong dahilan para masungkit niya ang gintong medalya sa Women’s Taijiquan+Taijijian event na ginanap sa Chroy Changvar Convention Center Hall A.

Kabuuang 19.263 puntos ang naitala ni Wong para maangkin ang unang puwesto.

Samantala, nagrehistro si Wong ng 9.58 points sa Taijiquan noong Miyerkules at 9.683 naman sa Taijijian kahapon.

Nabatid naman na si Wong ay nag-aaral bilang first year Med-Tech student sa University of the East. - Sa panunulat ni Hannah Oledan

 Hiniling umano ni Brooklyn Nets guard Kyrie Irving sa kanilang team na i-trade siya sa ibang koponan sa NBA.

 Sa ulat ng The Athletic, binanggit na nakiusap si Irving sa Nets na itapon siya sa ibang team bago ang trade deadline o aalis na lang siya para maging free agent sa Hulyo ngayong taon.

 Si Irving ay matatandaang napili bilang NBA All Star sa ikawalong pagkakataon ngayong season matapos mag-average ng 27.1 points, 5.1 rebounds at 5.2 assists bawat laro.

 Ang 30 taong gulang na manlalaro ay unang sumikat sa panig ng Cleveland Cavaliers at Boston Celtics bago napunta sa Nets.

Nakasungkit ng gintong medalya si Pinoy pole vaulter EJ Obiena sa katatapos lamang na Perche En sa Roubaix, France.

Tinalo ni Obiena sa International Elite Indoor Pole Vault Competition ang Chinese pole vaulter na si Yao Jie matapos malagpasan ang 5.75 meters sa unang category.

Nakuha ni EJ ang 5.82 meters dahilan ng kaniyang pagkapanalo.

Samantala, inaasahan namang sasabak din si Obiena sa Kazakhstan para sa Asian Indoor Athletics Championships sa susunod na buwan.

Kumpiyansa si Rain or Shine player at San Juan City Councilor James Yap na kaya niyang pagsabayin ang karera sa mundo ng politika at pampalakasan.

Kasunod ito ng paglagda ni Yap ng one-conference deal sa Elasto Painters bago ang PBA Governors’ Cup.

Ayon sa seven-time PBA Champion, pabor siya na makasama si Yeng Guiao dahil marami itong karanasan pagdating sa pagbabalanse ng trabaho kaya naniniwala si Yap na marami din siyang matututunan dito.

Matatandaang nagsilbi ring congressman at vice governor ng Pampanga si Guiao, simula noong 2013 hanggang 2016 habang nagsisilbi rin bilang coach sa PBA.

Pinasalamatan naman ni Yap ang lahat ng sumusuporta at naniniwala sa kanyang kakayahan kung saan, iginiit niya na marami sa mga residente ng San Juan ang naghihintay sakaniya na makapaglaro muli sa basketball.