SPORTS

Pumanaw na sa edad na 63 si World Wrestling Entertainment (WWE) Hall of Famer Scott Hall.

 Unang nakilala si Hall sa kanyang karakter na si Razor Ramon nang sumali sa WWE noong 1992 kung saan apat na beses siyang itinanghal bilang Intercontinental Champion.

 Kabilang ang wrestler sa WWE’s New Generation, kahanay nina Bret Hart at Shawn Michaels.

 Samantala, nabatid na bago sumabak sa WWE si Hall ay sumali muna siya sa World Championship Wrestling (WCW) noong 1991 bilang ‘The Diamond Studd’.  – sa panulat ni Mara Valle

Pasok sa finals ng Asian Boxing Confederation Junior and Youth Championships sa Amman, Jordan ang isang teenager na boksingero mula Cagayan De Oro City.

 Sumikwat ng solidong panalo ang 17 anyos si Eljay Pamisa kontra kay Nima Beygi ng Iran gamit ang mga epektibong counter attack at maliksing footwork sa kanilang sagupaan sa Al Hossein Sports City.

 Sunod na makakasagupa ni pamisa si Abduvali Buriboev ng Uzbekistan sa gold medal round ng event.

 Ang batang Pinoy Bantamweight ay isang silver medalist sa Asian Junior Championships sa Al Fujaira, UAE noong 2019 noong nasa 46 kilogram class pa lamang ito.

 Si Eljay ay pamangkin ng Southeast Asian games veteran na si Elmer Pamisa na ngayo’y miyembro ng coaching staff ng Association of Boxing Alliances of the Philippines.

Ikinalungkot ni Pinoy Olympic Pole Vaulter EJ Obiena ang hindi pagbibigay ng go-signal ng Philippine Athletics Track and Field Association (PATAFA) upang makasali siya sa World Indoor Championship.

 Ito’y kahit na kwalipikado si Obiena na lumahok sa naturang torneyo na magsisimula sa Marso a – disi otso hanggang a – bente sa Belgrade, Serbia.

 Gamit ang social media, inihayag ng atleta na sa mga nagdaang patimpalak ay malinaw na kuwalipikado siya.

 Dahil sa anya sa hindi pag-endorso sa kanya ng PATAFA ay hindi na siya nakahabol sa registration ng World Indoor Championship kahit ang kanyang pagsabak sa sea games sa Vietnam ay hindi inindorso ng PATAFA.

 Inihayag pa ni Obiena na panonoorin na lamang niya sa telebisyon ang torneyo at pagmamasdan ang pagkuha ng medalya ng ibang bansa na dapat ay para sa Pilipinas.

Nagwagi ang Golden State Warriors matapos talunin ang Milwaukee Bucks sa NBA sa iskor na 122-109.

Naging tabla ang iskor ng dalawang koponan sa 1st quarter pero nagawang umabante ng Warriors sa 2nd at 3rd quarter dahilan ng kanilang panalo.

Nanguna sa Warriors sina Klay Thompson na nagpakawala ng 38 points 6 rebounds na may 6 assists at Jordan Poole na nakapagtala naman ng 30 points 6 rebounds at 5 assists.

samantala, wagi din sa nba ang utah jazz matapos tambakan ng 9 na puntos ang Sacramento Kings sa iskor na 134-125.

Lumamang ang Kings sa unang quarter pero nabawi ng Jazz ang bola sa 2nd at 3rd quarter dahilan ng kanilang panalo.

Nanguna sa panalo ng koponan sina Jordan Clarkson matapos makapagtala ng 45 puntos habang nakaambag din ng 26 points si Bojan Bogdanovic at Donovan Mitchell na may 25 points.  —sa panulat ni Angelica Doctolero

Napanatili ng boksingerong si Carl Jammes Martin ang kaniyang Philippine Super Bantamweight title at makuha ang World Boxing Association o WBA Asia Super Bantamweight title sa naganap na laban kahapon sa Elorde Sports Complex sa Parañaque.

Sa unang dalawang round ay bahagyang napabayaan ng 22 anyos na si Martin ang laban kaya nakapasok ang mga suntok ni Baldonado.

Nakarekober naman si Martin at nakuha ang technical knockout win sa ika-labing isang round.

Nagwagi rin sa pamamagitan ng TKO sa ika-12 round si 2016 Olympic Boxer Charly Suarez laban kay Tomjune Mangubat para makuha ang WBA Asia Super Featherweight title.

Dahil sa Panalo, mayroong rekord na sampung panalo at wala pang talo si Suarez at may pitong knockout. —sa panulat ni Airiam Sancho

Mainit ang naging simula ni Kai Sotto para sa Adelaide 36ers kontra New Zealand (NZL) Breakers sa nagpapatuloy na National Basketball League sa Australia.

Subalit hindi  naging sapat ang magandang ipinakita ng filipino import na tumipa ng 14 na puntos at pitong rebound matapos na padapain ng NZL ang kanilang koponan sa iskor 84–75.

Ito na ang ikalimang sunod na pagkatalo ng 36ers na mayroong limang panalo at labindalawang talo.

Habang napigilan naman ng New Zealand ang kanilang four-game losing streak makaraang mag-improve ang kanilang kartada sa limang panalo at labing tatlong tatlo.

Nagtatangka ang Converge ICT na makuha ang prangkisa ng Alaska Aces sa Philippine Basketball Association (PBA).

Nakikipag-usap na umano kay Alaska Team Owner Fred Uytengsu ang bilyonaryong si Dennis Anthony Uy para sa pagbili ng koponan sa professional league at positibo umano si Uy na tatanggapin ang Converge ICT ng labing isa pang miyembro ng PBA.

Nabatid na tinatayang P100M hanggang P200M ang kailangan para makakuha ng prangkisa sa PBA.

Samantala, matatandaan na inanunsyo ni Uytengsu noong Pebrero ang pag-alis ng Alaska sa pba matapos ang 35 taon sa liga.  -sa panulat ni Mara Valle 

Sasabak ang Filipina tennis sensation na si Alex Eala sa 31st Southeast Asian Games sa Hanoi, Vietnam.

Ayon sa ama ng 16 years old na tennis star na si Mike, kabilang ang kanyang anak sa mahigit anim na raang atleta na ipapadala ng bansa sa nasabing torneo sa darating na mayo.

Naisumite na nito ang kaniyang registration at pirmado na ng ama.

Ito ang unang pagkakataon na sasabak si Eala sa nasabing biennial event kung saan itinuturing na siya ang paboritong manalo at mag-uwi ng medalya.

Magkukrus ang mga landas ng kapwa mainit na kuponang TNT Tropang Giga at Northport sa final game nito para sa eliminasyon sa PBA Governor’s Cup sa Smart Araneta Coliseum.

Nakatakda ang banggaan ng Tropang Giga at Batang Pier mamayang ala-6 ng gabi pagkatapos ng laban ng Meralco Bolts at Phoenix Fuel sa oras na alas-3 ng hapon.

Target naman ng TNT na makasama sa top 4 para masikwat ang ‘twice-to-beat’ incentive sa quarterfinals.

Ang panalo ng TNT ang maglalagay sa kanila sa no. 3 spot sa quarterfinals sa ilalim ng no. 1 Magnolia at no. 2 NLEX kasabay ng Northport kung mananaig ang Phoenix sa Meralco. —sa panulat ni Airiam Sancho

Magsisimula na ang University Athletic Association of the Philippines (UAAP) at National Collegiate Athletic Association (NCAA) sa magkahiwalay na lugar March 26.

Gaganapin ang opening match ng ncaa sa La Salle Greenhills Gym sa Mandaluyong na magiging venue sa unang araw ng Seniors Basketball Games.

Sa kabilang banda, sa Mall of Asia Arena sa Pasay City naman gagawin ang opening ceremonies ng UAAP.

Ang pagbubukas ng NCAA Season 97 ay kinumpirma kasabay ng pag-anunsyo ng UAAP na magsisimula ang liga sa Season 84 sa parehong petsa. —sa panulat ni Airiam Sancho