SPORTS

Nasungkit ni Ukrainian high jumper Yaros-Lava Mahu-Chikh ang gold medal sa World Indoor Championship sa Belgrade, Serbia.

Dito, naging emosyunal ang manlalaro sa nakuhang medalya para sa kanilang bansa makalipas ang mahigit 20 taon.

Malaking hamon din kay Mahu-Chickh ang paglahok sa torneo dahil hirap siyang makatakas sa kanilang bansa kung saan kasalukuyang nagaganap ang paglusob ng russia.

Samantala, binati ito ng mga nanood ng torneo lalo na nang ilabas niya ang watawat ng Ukraine.

Idinaos na kagabi ng Alaska Aces ang pinakahuling laro ng kanilang koponan sa Philippine Basketball Association (PBA).

Umabot sa playoffs ang koponan at nakalaban ang NLEX Road Warriors pero nabigo.

Sa loob ng 36 na pamamayagpag sa PBA, nasa labing-apat na championships ang nakamit ng alaska kabilang ang grand slam noong 1996.

Nitong pebrero, unang inihayag ng alaska ang pamamaalam nila sa pba kung saan ang 2021 PBA Governor’s Cup ang kanilang magiging huling laban.  -sa panulat ni Abby Malanday 

Rumesbak si Tony Bishop ng Meralco Bolts matapos asarin ni San Miguel Big Man Rodney Brondial.

First quarter pa lamang ay nagpakawala na ng tres si Brondial habang dinedepensahan si Bishop.

Pumasok ang sorpresang tres ni Brondial, at agad na sumenyas sa mukha ni Bishop dahilan para tawagan siya ng technical foul.

Sa pagtatapos ng 3rd quarter, 18 points ang pinakawala ni Bishop, dahilan para tuluyang matambakan ang Beermen sa score na 79-61.

Hindi na nakabawi pa ang San Miguel at tuluyang pinagbakasyon ng Meralco sa score na 100-85.

Samantala, nanguna para sa Meralco si Bishop na kumamada ng 32 points at 16 rebounds. —sa panulat ni Mara Valle

Pinabagsak ng Milwaukee Bucks ang Sacramento Kings sa NBA sa iskor na 135-126.

Nagawang umabante ng Kings sa 1^st quarter pero naagaw ng Bucks ang bola sa 2^nd at 3^rd quarter habang naging tabla naman ang kanilang iskor sa 4^th quarter.

Nanguna sa panalo ng Bucks si Giannis Antetokounmpo na nakapagtala ng 36 points, 10 rebounds na may 2 assists; Khris Middleton na may 32 points, 8 rebounds na may 8 assists; at Jrue Holiday na nagpakawala naman ng 21 points, 4 rebounds at 4 assists.

Nasayang naman ang 22 points ni Domantas Sabonis at 21 points ni De’aaron Fox ng Kings.

Samantala, abangan sa linggo ang susunod na laro ng Bucks kung saan, kanilang makakaharap ang Minnesota Timberwolves, alas 5 ng umaga, oras sa Pilipinas. —sa panulat ni Angelica Doctolero

Nagwagi sa NBA ang Boston Celtics matapos padapain ang Golden State Warriors sa iskor na 110-88

Tinambakan ng Celtics ang Warriors sa 1^st, 2^nd, at 4^th quarter dahilan ng kanilang pagkapanalo.

Nanguna sa koponan si Jaylen Brown na kumadada ng 26 points, 7 rebounds at 3 assists at Jayson Tatum na may 26 points, 12 rebounds at 4 assists.

Nakaambag sa Celtics si Marcus Smart na nakapagtala ng 20 points 4 rebounds at 8 assists habang nasayang naman ang 29 points, 2 rebounds at 3 assists ni Jordan Poole ng warriors.

Abangan naman sa sabado ang susunod na laro ng Celtics kung saan, kanilang makakalaban ang Sacramento Kings alas-10 ng umaga, oras sa Pilipinas. —sa panulat ni Angelica Doctolero

Tatangkain nina Mariya Takahashi at ng iba pang mga National Judo Fighters na humakot ng medalya sa 31st Southeast Asian Games 2022 na gaganapin sa Hanoi, Vietnam sa Mayo 12 hanggang 23.

Sasabak si Takahashi sa mixed 70 kilogram event at kabilang siya sa 21-judoka na mga pambato ng philippine judo federation sa 11-nation, biennial meet.

Kasama rin dito judoka ang kapwa Filipino-Japanese na si Shugen nakano na magdedepensa ng titulo sa men’s 66 kilogram event.

Nabatid na ang mga pinoy judokas ay kumopo ng kabuuang tatlong gold, isang silverat siyam na bronze medal sa huli nitong sinalihang tournament.  -sa panulat ni Mara Valle 

Pangungunahan ni Tokyo Olympic Gold Medalist Hidilyn Diaz ang 13-member weightlifting team na sasabak sa Southeast Asian Games sa Vietnam.

Kasama ni Hidilyn sa grupo sina Fernando Agad, Rowel Garcia, Nestor Colonia, Lemon Denmark Tarro, John Kevin Padullo;

John Dexter Tabique, Mary Flor Diaz, Rosegie Ramos, Margaret Colonia, Elreen Ann Ando, Vanessa Sarno at Kristel Macrohon.

Pasok din sa grupo sina coaches Gregorio Colonia, Gary Hortelano, Nicolas Jaluag at Patric Lee.

Inilabas ng Samahang Weightlifting ng Pilipinas ang pinal na listahan matapos ang serye ng qualifying tournaments sa Zamboanga City, Cebu City at sa Muntinlupa City.

Lalarga ang weightlifting competition simula Mayo a–19 hanggang a–22.

Pinadapa ng Brooklyn Nets sa NBA ang Orlando Magic sa iskor na 150-108.

Umabante ang Nets matapos lampasuhin ang Magic sa una, ikalawa at ika-apat na quarter.

Nanguna sa panalo ng koponan si Kyrie Irving na nagpakawala ng 60 points, 6 rebounds at 4 assists dahilan para gumawa ng kasaysayan sa NBA ngayong season. —sa panulat ni Angelica Doctolero

Pormal nang nilagdaan ng Ayala Center for Excellence in Sports (ACES) at De La Salle University (DLSU) ang Memorandum of Agreement upang suportahan ang mga piling national athletes sa pamamagitan ng scholarship programs.

Ayon sa kasunduang ito, magbibigay ng scholarships ang DLSU para sa Atletang Ayala national athletes na nagnanais ipagpatuloy ang kanilang edukasyon. Magkaka-access sila sa world-class programs ng DLSU at maaaring makakuha ng degree na makakatulong sa kanilang career development.

“We are happy to partner with the Ayala Group of Companies in support of the Filipino national athlete,” ani Bro. Bernard Oca, DLSU president. “De La Salle University has been very blessed to count many illustrious national athletes among its alumni, such as Lim Eng Beng and Ian Lariba. We are proud to be able to continue that tradition, this time in partnership with ACES.”

“We are very grateful to have DLSU as the education partner for the Atletang Ayala program. DLSU has long been an innovator in the development of world-class curricula that are delivered in ways that suit athletes’ lifestyles and requirements without compromising its high academic standards.

These qualities fit seamlessly with the Atletang Ayala program, and DLSU’s scholarships will be a much-needed benefit for program athletes,” dagdag naman ni ACES Program Director Jan Bengzon.

Pinalawig naman ang deadline ng application hanggang April 21, 2022. Para sa mga interesadong atleta, maaaring mag-apply sa https://bit.ly/AtletangAyala o kaya’y mag-inquire sa aces@ayala.com.

Parehong nagwagi sa NBA ang Charlotte Hornets at Golden State Warriors matapos padapain ang kanilang kalaban.

Unang nanalo ang Charlotte Hornets kontra Oklahoma City Thunder sa iskor na 134-116.

Natambakan sa 1^st quarter ang Hornets pero nagawa nilang makabawi sa 2^nd, 3^rd at 4^th quarter kung saan, nakapagtala ng 30 points, 6 rebounds at 6 assists si Terry Rozier.

Nakaambag din sa koponan sina Miles Bridges na may 27 points at Lamelo Ball na may 21 points.

Samantala, bumida din ang Golden State Warriors matapos talunin ang Washington Wizards.

Pinataob ng Warriors ang Wizards sa una hanggang 3^rd quarter kung saan, nanguna sa koponan si Basketball superstar Stephen Curry na nagpakawala ng 47 points, 6 rebounds at 6 assists. —sa panulat ni Angelica Doctolero