SPORTS

Nasungkit ni Filipino- Canadian pool and snooker player Alex Pagulayan ang lahat ng tatlong korona sa 2022 Scotty Townsend Memorial na ginanap sa West Monroe, sa Los Angeles California.

Unang umarangkada si Pagulayan sa One pocket division kung saan pinataob nito sa finals si Scott Frost ng America para makuha ang tumatagingting na $9,000 na premyo.

Hindi pa nagpatinag si Pagulayan nang masungkit din nito ang korona sa 9-ball division matapos talunin si Robbie James Joaquin Capito ng Hong Kong at maiuwi ang $5,300 na premyo.

Kinumpleto rin ni Pagulayan ang pagkapanalo makaraang magkampeon ito sa 10-ball mini event para sa $1,850 na premyo. —sa panulat ni Airiam Sancho

Hindi pinalad na mapasama sa Pole Vault Event ng Hanoi Southeast Asian Games sa Mayo si Ej Obiena.

Ayon sa Philippine Olympic Committee (POC), ito ay matapos na hindi maisama ang pangalan ni Obiena sa ipinasa ng Philippine Athletics Track And Field Association (PATAFA) na listahan ng pangalan ng mga atletang sasabak sa sea games.

Malaki naman ang panghihinayang ni POC President Bambol Tolentino sapagkat isang gintong medalya agad ang kayang ibigay ni obiena sa naturang palaro.

Nabatid na mayroong 53 atleta na kasama sa isinumiteng listahan ng PATAF para sa Sea Games.  -sa panulat ni Mara Valle 

Hindi na umano sasabak si Filipino Olympian Carlos Yulo sa 2022 Summer World University sa June 26 hanggang July 7 sa China dahil sa mahigpit na schedule.

Sa halip ay lalaban si Yulo sa Asian Championships na nakatakda naman sa June 15 hanggang 18 sa Doha, Qatar na qualifying tournament sa World Championships sa Liverpool, England sa Oktubre.

Nanatiling nasa labas ng bansa ang 2021 Olympic Gymnast simula noong 2019 Southeast Asian Games.

Bumalik lamang ang back-to-back World Champion para sa maikling bakasyon sa Pilipinas upang saksihan ang pagbubukas ng bagong tahanan ng Gymnastics Association of the Philippines sa Intramuros.

Pinadapa ng New York Knicks ang Los Angeles Clippers sa nba sa iskor na 116-93.

Tinambakan ng Knicks ang Clippers sa una, ikalawa at ika-apat na quarter kung saan, nakapagtala ng 24 points, 9 rebounds at 4 assists si Rj Barrett dahilan ng kanilang pagkapanalo.

Nakaambag din sa koponan si Immanuel Quickley matapos makapagtala ng 21 points, 10 rebounds at 6 assists habang nasayang naman ang 16 points ni Amir Coffey ng Clippers.

Abangan naman mamaya ang susunod na laro ng Knicks kung saan, kanilang makakalaban ang Sacramento Kings alas-11:30, oras sa Pilipinas. —sa panulat ni Angelica Doctolero

Umabante na sa quarterfinals ng 2022 PBA Governors Cup ang Barangay Ginebra Gin Kings.

Ito’y makaraang pataubin ng Ginebra ang rain or Shine Elasto Painters sa score na 104-93 sa kanilang paghaharap sa Araneta Coliseum, kagabi.

Kumamada ng double-doubles 25 points at 10 rebounds si Justin Brownlee para sa Barangay Ginebra habang nagpakawal ang 20 points si Christian Standhardinger habang swak ang apat na triple ni Jeff Chan na sumalaksak ng 15 points.

Nagpakawala naman ng 34 points si Henry Walker habang nag-ambag ng 12 points si Beau Belga para sa elasto painters.

Tinapos ng Ginebra ang eliminations sa kartadang 6-5 at nakapako sa 6^th place kasama ang Alaska aces habang tuluyang nalaglag sa torneyo ang Rain or Shine sa kartadang 3-8.

Parehong nagwagi ang Memphis Grizzlies at Minnesota Timberwolves matapos tambakan ang kanilang kalaban sa NBA.

Unang nagwagi ang Memphis Grizzlies matapos padapain ang Orlando Magic sa iskor na 124-96.

Nanguna sa Grizzlies sina Ja Morant na nagpakawala ng 25 points, 4 rebounds na may 7 assists at Desmond Bane na nakaambag naman ng 24 points, 6 rebounds at 2 assists.

Samantala, panalo din sa nba ang Minnesota Timberwolves makaraang lampasuhin ang Portland Trail Blazers sa iskor na 135-121.

Nanguna sa panalo ng Wolves si Karl-Anthony Towns matapos kumadada ng 36 points, 15 rebounds at 5 assists.

Nakatulong din sa koponan ang 22 points na naitala ni Jaylen Nowell dahilan para matalo ang Blazers. —sa panulat ni Angelica Doctolero

Laglag na sa kampanya para sa 2023 Fiba World Cup ang koponan ng South Korea.

Ito ay matapos tuluyang idiskwalipika ng pamunuan ang South Korea sa ginanap na qualifiers dahil hindi ito lumahok sa February window na ginanap sa Smart Araneta.

Batay kasi sa Fiba 2020 official basketball rules, ididiskwalipika na sa torneo ang koponang hindi makakadalo  ng dalawang sunod na laro.

Ibig sabihin, pasok na sa ikalawang round ng qualifiers ang mga bansang nasa group a kabilang ang Gilas Pilipinas na may iskor na 2-1, New Zealand na wala pang narerehistrong talo at India na may iskor na 0-3.—sa panulat ni Abie Aliño-Angeles

Sinupalpal ni two-time most valuable player Giannis Antetokounmpo sa anim na sunod nitong double-double sa score na 118-112 panalo kontra Chicago Bulls sa 2021-2022 National Basketball Association regular season.

Sa unang tatlong periods ay lamang pa ang Chicago ng 7 puntos, 88-81, papasok ng fourth quarter, subalit hindi nasindak ang Bucks sa lakas ng bulldozer ng Bulls at naging matatag si Antetokounmpo upang itaguyod ang koponan sa panalo.

Namuno si Antetokounmpo sa game-high 34 points, 16 na rebounds at 5 assists para sa bucks na pinahaba ang kanilang winning streak sa tatlo.

Samantala, dahil sa panalo, sumalo sa third spot sa Eastern Conference ang Bucks sa 39-25 kartada kapareho ng Bulls.—sa panulat ni Mara Valle

Pinaghahandaan na ni Two-Time World Gymnastics Titlist Carlos Edriel Yulo ang tatlong bigating International Competitions ngayong taong 2022.

Kabilang dito ang 31st Southeast Asian Games sa Hanoi, Vietnam sa Mayo, 19th Asian Games sa Hangzhou, China sa Setyembre at world championships sa Liverpool, Great Britain.

Ayon kay Yulo, lahat ng kompetisyon ay mahalaga maliit man ito o malaki.

Tinitignan sa ngayon ng atleta ang asian games dahil tila olympic aniya ang nangyari kung saan bigo niyang makuha ang medalya sa men’s artistic gymnastic floor exercise sa asian games Sa Jakarta, Indonesia noong 2018.  -sa panulat ni Airiam Sancho 

Bigo si pinoy qualifier Alex Eala na makausad sa round 2 ng W25 Joue Le Tours sa France.

Ito ay matapos ipahiya ni Russian number 2 Seed Oksana Selekhmeteva si Eala sa kanilang bakbakan.

Ayon sa sports analysts, nag-improve o gumanda ang performance ni Selekhmeteva laban kay Eala sa 2-0 na kanya ring tinalo sa straight set sa third leg ng 2021 W15 Manacor.

Una nang nagsanib puwersa sina Eala at Selekhmeteva at nanalo sa 2021 Roland Garros Girls Double Title.

Mahigit isang taon matapos ang kanilang unang sagupaan sa International Tennis Federation Women’s World Tennis Tour, umakyat kapwa ang world rankings nina Eala na WTA World Number 580 at Selekhmeteva na WTA World Number 207.