SPORTS

Nagsimula nang magsanay ang Philippine Men’s Volleyball Team sa training camp sa Doha, Qatar na tatagal hanggang Abril a-9.

Sa ngayon ay nasa nasabing Middle Eastern Country sina Jao Umandal at iba pang mga pinoy spiker bilang parte ng paghahanda sa 31st Southeast Asian Games 2022 na gaganapin sa Hanoi, Vietnam sa Mayo a-12 hanggang a-23.

Nabatid na kamakailan ay wagi sa dalawang PH 6 exhibition ang pambato ng bansa kontra Qatar U-23 team sa scores na 25-19, 25-4, 25-16, habang tinapos naman ng kupunan ang Al Gharafa Sports Club sa scores na 25-22, 25-17, 25-22.

Magugunita na makasaysayang sumungkit ng silver medal para sa Pinas ang Men’s Volleyball Team sa 30th Sea Games 2019 na ginanap sa bansa. — sa panulat ni Mara Valle

Ginarahe na ng Cignal si Graze Bombita sa kasalukuyang 2nd Premier Volleyball League 2022 Open conference matapos nitong magkaroon ng ACL injury sa kaliwang tuhod.

Ayon sa kupunan, labas muna sa laro si Bombita sa natitirang laro sa PVL open conference, ipinagdarasal din anila ang mabilis na recovery ng manlalaro upang agad na makabalik na rin sa aksiyon.

Nabatid na nadisgrasya ang outside hitter sa opening day ng liga noong Marso a-16 sa warm-up ng HD Spikers kontra Chery Tiggo.

Samantala, abante na sa semifinals ang Cignal makaraang pataubin ang Balipure sa quarterfinals, sa scores na 25-14, 25-9 at 25-14. —sa panulat ni Mara Valle

Ayaw magpakampante ni Meralco coach Norman Black sa hindi naging magandang performance ni Paul Lee para sa Magnolia Hotshots sa semifinals ng 2021 PBA Governor’s Cup.

Ayon kay Black, nakikita niyang sa Miyerkules na susunod na salpukan ng Bolts at Hotshots ay maaaring mag-explode o magpakitang gilas muli si Lee na aniya’y isa sa deadliest players sa liga.

Tiniyak ni Black ang pagpapalakas pa ng depensa at opensa ng Bolts para magwagi sa do or die game o game 4 ng banggaan nila ng Hotshots.

Napigilan ng NLEX Road Warriors ang tangkang pagwalis sa kanila ng defending champion Barangay Ginebra Gin Kings.

 Niresbakan ng NLEX ang Ginebra sa score na 86-85 sa paghaharap nila sa game 3 ng 2021 PBA Governors’ Cup semifinals series sa MOA Arena, Pasay City, kahapon.

 Humakot ang import na si Cameron Clark ng double-doubles 21 points at 17 rebounds upang ipako ang unang panalo ng road warriors sa kanilang best-of-five semis kontra Gin Kings.

 Nag-ambag din ng 15 points si Kevin Alas para sa nlex habang 13 points para kay Justin Chua.

 Nagpakawala naman ng 27 points si Justin Brownlee para sa Barangay Ginebra.

 Hawak ng Gin Kings ang kartadang 2-1 sa serye habang muling maghaharap ang dalawang koponan sa game 4 sa Miyerkules, sa Araneta Coliseum.

Parehong kampeon ang Toronto Raptors at Memphis Grizzlies sa NBA.

Unang nagwagi ang Raptors matapos patumbahin ang Indiana Pacers sa iskor na 131-91.

Lumamang ng 40 puntos ang Raptors matapos matambakan ang Pacers sa 1^st, 2^nd at 4^th quarter kung saan, nanguna sa koponan si Paskal Siakam na nakapagtala ng 23 points, 6 rebounds at 7 assists.

Samantala, nasungkit din ng Memphis Grizzlies ang panalo matapos lampasuhin ang Milwaukee Bucks sa iskor na 127-102.

Lumamang ang Grizzlies sa una hanggang sa huling quarter dahilan ng kanilang pagkapanalo kung saan, nanguna si De’Anthony Melton na may 24 points at Desmond Bane na may 20 points. —sa panulat ni Angelica Doctolero

Napanatili ni American-Singaporean Mixed Martial Artist Angela Lee ang kaniyang titulo sa one Women’s Atomweight World Champion.

 Ito ay matapos na talunin niya sa second round submission si Stamp Fairtex ng Thailand sa One:X na ginanap sa Singapore Indoor Stadium.

 Sa pasisimula ng laban ay nagtamo ng malalakas na pag-atake si Lee pero bumawi ito sa natitirang 4:50 mark.

 Samantala, ito ang ika-limang beses na matagumpay na nadepensahan ni Lee ang kaniyang titulo. – sa panulat ni Airiam Sancho

Magreretiro na sa larangan ng wrestling si Paul Levesque o mas kilala sa bilang “Triple H”.

Ito ay matapos magtamo ng sakit sa puso ang wrestling legend na natuklasan matapos sumailalim sa ilang mga pagsusuri.

Maliban dito, nagkaraoon din si Levesque ng viral pneumonia na lubhang naapektuhan ang kaniyang baga.

Nabatid na tinanghal bilang 14-time world champion at WWE Hall of Fame si Triple H noong 2019. —sa panulat ni Abie Aliño-Angeles

Matapos masungkit ang ikalawang panalo sa best of five semifinals ng PBA Governors Cup, isang panalo na lamang ang kakailanganin ng defending champion Barangay Ginebra upang muling makapasok sa finals.

Ngayong araw nakatakdang magharap sa ikatlong pagkakataon ang NLEX Road Warriors at ang ginkings sa ganap na ala-6:30 ng hapon.

Matatandaan na dalawang beses nang tinalo ng Ginebra ang NLEX sa nagpapatuloy na PBA semifinals.

Inaasahan naman na bibigyan ng magandang laban ng Road Warriors ang Ginkings at sisikapin na makuha ang panalo upang mapanatili ang kanilang tsansa na makapasok sa Governors Cup Finals.

Walong manlalaro ng iba’t ibang kuponan ang tinaguriang game-changer ng kanilang paaralan para sa UAAP Season 84 Men’s Basketball Competition bukas, March 26,2022.

Kabilang Dito Si Jerom Lastimosa ng Adamson, Chris Koon ng Ateneo, Evan Nelle ng La Salle, Rj Abarrientos ng FEU, Jake Figueroa ng National University, Orin Catacutan ng University Of the East, Zavier Lucero ng University of the Philippines at Joshua Fontanilla ng UST.

Nabatid na ang lahat na manlalaro ay naghahangad na ipagmalaki ang kanilang alma mater at inaasam ang kampeonato sa naturang kumpetisyon.

Target ng University Athletic Association of the Philippines (UAAP) na buksan ang pintuan nito sa mga fans sa second round ng Season 84 Men’s Basketball Tournament sa Mall of Asia Arena sa Pasay City.

Ayon sa pamunuan ng liga, posible ang live audience lalo’t nasa magandang sitwasyon na ang National Capital Region (NCR) mula sa COVID-19.

Nakikipag-ugnayan na ang liga sa mga kinatawan ng moa arena at sa lokal na pamahalaan ng Pasay City upang maisaayos ang lahat bago ito ipatupad.

Samantala, magsisimula bukas sa Moa Arena ang uaap kayat mabilis na matatapos ang first round ng eliminasyon sa Abril a-nueve.  – sa panulat ni Airiam Sancho