SPORTS

Hindi makakapaglaro sa 47^th season ng Philippine Basketball Association si San Miguel Beermen Shooting Guard Terrence Romeo dahil sa injury.

Ayon kay Berrmen Coach Leo Austria, noong nakaraang season pa iniinda ng manlalaro ang back spasm kaya agad na itong pinagamot.

Hindi pa naman tiyak kung kailan makababalik sa laro si Romeo dahil hirap pa itong gumalaw na sumasailalim pa sa therapy at rehabilitation.

Samantala, aminado si Austria na malaking kawalan sa kanilang koponan si Romeo dahil sa kontribusyon nito sa bawat laro.

Lalarga na ang 2022 nba finals sa pagitan ng Golden State Warriors at Boston Celtics, mamayang alas nwebe ng umaga.

 Magsasalpukan sa game 1 ang dalawang koponan sa balwarte ng Warriors sa Chase Center sa San Francisco, California.

 Umabot naman sa 40,000 dollars o 2 million pesos ang pinaka-mahal na ticket sa VIP section habang 600 hanggang 800 dollars sa pinaka-mura.

Ito na sa ngayon ang ikalawang pinaka-mahal na ticket sa National Basketball Association (NBA) finals series sa kasaysayan.

 Makakaharap ng Gilas Pilipinas ang India sa FIBA World Cup Qulifiers for Asia na gaganapin ngayong araw sa MOA Arena.

 Matatandaang noong buwan ng Pebrero, tinalo ng Pilipinas ang India sa iskor na 88-64 sa second window na ginanap sa Smart Araneta Coliseum.

 Ayon kay Samahan ng Basketbol ng Pilipinas (SBP) Deputy Executive Director Butch Antonio, na maglalaro ang Gilas ng two-game friendly sa Korean national squad sa anyang sa Hunyo a-17 at a-18 para sa ikatlong window.

 Sinabi ni Antonio pagkatapos ng ikatlong window, maglalaro ang Gilas sa FIBA ​​Asia Cup sa Jakarta sa Hulyo a12 hanggang a-24.

 Kabilang sa mga manlalarong lalahok sa nasabing kompetisyon ay sina Dwight Ramos at James Spencer habang inimbitahan din ang mga collegiate players na sina Rhenz Abando, Carl Tamayo, Ange Kouame, RJ Abarrientos, SJ Belangel, Dave Ildefonso, Kevin Quiambao, Sherwin Concepcion, Justine Baltazar, Thirdy Ravena, William Navarro at Francis Lopez.

Kinumpirma ng Barangay Ginebra na hindi makakalaro sa 2022 PBA Philippine Cup ang dating PBA most valuable play na si Mark Caguiao.

Ayon kay Ginebra Team Governor Alfrancis Chua, may mga kailangang aayusin si Caguiao kaya’t posibleng sa buong Conference ito hindi makasali.

Hindi na nagbigay pa ng anumang detalye ang koponan pero magugunitang nakaranas ng injury si Caguiao dahilan para maging limitado ang kaniyang paglalaro noong nakaraang mga conference.

Sisimulan ang PBA Season 47 sa Hunyo a-5 kasama ng tradisyonal na parada at mga muse.

Nasungkit ng Filipino Pole Vault Ace na si EJ Obiena ang top prize sa men pole vault category sa European City of Sports sa L’aquila, Italy.

Nakapag set si Obiena ng record na 5.85m kung saan ito ang dahilan ng kanyang pagkapanalo.

Ibinahagi ni Obiena ang isang larawan sa kanyang instagram account kung saan hawak nito ang kanyang napanalunan sa naturang torneo.

Ang marka ni Obiena sa Italy tilt ay isang improvement kung saan nalagpasan nito ang kanyang record sa Hanoi, Vietnam na 5.46m.

Sinikwat ng Meralco Bolts ang kampyonato sa PBA 3 on 3 kahit kulang sila sa mga player.

Tinuldukan ng Bolts ang laban sa score na 18-17 kontra CAVITEX Braves via Overtime sa kanilang paghaharap sa second leg ng Third Conference Championship sa Las Piñas City.

Pinangunahan nina Alfred Batino at Joseph Sedurifa ang panalo ng Bolts matapos kapwa mag-ambag ng 7 points.

Tinanghal naman na 2^nd placer ang CAVITEX habang nasa 3^rd place ang Barangay Ginebra San Miguel.

Ibinahagi ni Boston Celtics power forward Jayson Tatum ang kaniyang naging inspirasyon dahilan para manalo ang kanilang koponan kontra Miami Heat sa NBA Eastern Conference Finals sa iskor na 100-96.

Ayon kay Tatum, bago magsimula ang kanilang laro ay nagtext pa umano siya sa cellphone number ng kaniyang yumaong idolo na si NBA superstar Kobe Bryant.

Nabatid na nakapagtala si Tatum ng 26 points, 10 rebounds at 6 assist kung saan, suot niya ang purple arm band na may numerong 24, na jersey number ni Bryant sa Los Angeles Lakers.

Magugunitang pumanaw si Bryant noong 2020 makaraang bumagsak ang sinakyan nitong helicopter kasama ang kaniyang anak na si Gianna o mas kilala bilang “Mambacita” at pitong iba pa.

Inilabas na ng Philippine Olympic Committee (POC) at Philippine Sports Commission (PSC) ang cash bonuses para sa mga Filipino medal performers sa katatapos lamang na 31st Southeast Asian sea games sa Hanoi, Vietnam.

 Pinangunahan ni POC President Abraham Tolentino ang pagbibigay parangal sa mga medalist bukod pa sa pagrelease ng kanilang financial rewards.

 Nakatakda naman mag-courtesy call sa malakanyang ang mga atletang nakakuha ng medalya sa sea games bukas upang personal na pararangalan ni Pangulong Rodrigo Duterte.

 Nabatid naman na si Gymnast Carlos Yulo ang uuwi na ‘pinakamayaman’ sa grupo dahil sa nakuha nitong limang gold at isang bronze medal.

 Samantala, alinsunod sa Republic Act No. 10699 o National Athletes and Coaches Benefits and Incentives Act, ang sinumang atleta na makakakuha ng ginto sa sea games ay bibigyan ng reward na 300,000 pesos, 150,000 pesos naman para sa makakuha ng silver medal at 60,000 pesos para sa bronze medalist.

Wagi ang Meralco kontra CAVITEX sa leg 2 crown ng PBA 3 by 3 third conference sa Robinsons Las Piñas.

Sa score na 18-17, iginiya ni Dexter Maiquez ang Meralco para angkinin ang kampyeonato.

Nabatid na halos isang three-man lineup lamang ang naiparada ng Bolts matapos ma-injury si Maclean Sabellina.

pero hindi ito naging hadlang sa koponan para makabagon mula sa five-point deficit regulation at ibinulsa ang P100-K na premyo.

Ang Barangay Ginebra naman ang nakakuha ng ikatlong tropeo matapos talunin ang Terrafirma Dyip.

Nagpaabot ng pagbati si NBA superstar Lebron James sa bagong coach ng Los Angeles Lakers.

Kasunod ito ng pagkakasibak sa dating coach na si Frank Vogel matapos mabigo ang koponan na makapasok sa Playoffs.

Ipinalit sa pwesto ni Vogel si Milwaukee Bucks Assistant Coach Darvin Ham na tumulong sa Bucks upang masungkit ang NBA Championship.

Sa Twitter post ni Lebron, sinabi niya na excited na silang makatrabaho si D-Ham sa loob ng court.