SPORTS

Magretiro na.

Ito ang payo ng trainer na si Floyd Mayweather Sr. sa kanyang anak sa undefeated boxer Floyd Mayweather Jr.

Ayon sa nakatatandang Mayweather, mas mainam nang mag-quit sa boksing ang kanyang anak kaysa sa kumalaban aniya ng mahihina.

Sa ngayon, naniniwala si Mayweather Sr. na wala nang makakatapat pa sa galing ng kanyang anak.

Matatandaang matapos manalo kontra kay Manny Pacquiao pinagpipilian pa ng kampo ni Mayweather kung sino kina Karim Mayfield at Andre Berto ang sunod na makakalaban ni Pretty Boy Floyd.

By Ralph Obina 

Taliwas sa inaakala ng nakararami na si Floyd Mayweather Jr. ang tatanghaling Best Fighter ng 2015 ESPY Awards, nasungkit ito ni MMA Fighter Ronda Rousey.

Ito ang unang pagkakataon na iginawad ang naturang award sa isang MMA Fighter mula nang mabuo ito noong 2007.

Kasabay nito, pinasaringan ni Rousey si Mayweather sa pagsasabing ano kaya ang mararamdaman ng pound for pound king ngayong natalo ito sa isang babae.

Noong nakaraang taon, magugunitang naasar si Rousey sa pahayag ni Mayweather na hindi siya kilala nito.

Kung nagkataon, ito na sana ang ika-pitong beses ni Mayweather na mapapalalunan ang naturang award matapos pagharian ang 2007, 2008, 2010, 2013 at 2014.

Ang ating Pambansang Kamao naman ni si Manny Pacquiao ay minsang ding nakuha ang naturang award noong 2009 at 2011.

By  Ralph Obina    

Isang laban na lamang ang dapat maipanalo ng San Miguel Beermen para ganap na masungkit ang kampeonato sa PBA Governors’ Cup.

Ito’y makaraang mapadapa sa ikatlong pagkakataon ng Beermen ang Alaska Aces kahapon sa score na 96-89 sa pagpapatuloy ng kanilang best of seven series.

Pinangunahan ng import na si Arizona Reid ang depensa ng Beermen nang makapagbuslo ito ng 41 puntos at makapagtala ng 17 field goals at 12 rebounds.

By Jaymark Dagala  

Pinangalanan na ang posibleng makalaban ni undefeated boxer Floyd Mayweather Jr. sa Setyembre 12.

Ayon sa report, si Andre Berto ang makakaharap ni Mayweather ngunit hindi ito mapapanood via pay per view.

Sinasabing bayad ito ni Mayweather para sa kanyang mga fan na nabagot sa laban nila ni 8-Division World Champion Manny Pacquiao noong Mayo.

Tinatayang nasa 30 hanggang 35 milyong dolyar ang makukuha ni Mayweather sa naturang laban.

By Ralph Obina  

Desidido ang San Miguel Beermen na makuha ang ikatlong sunod na panalo sa Game 3 ng PBA Governors’ Cup Finals kontra Alaska Aces.

Ayon kay San Miguel Coach Leo Austria, mananatili ang kanilang istratehiya laban sa Alaska.

Sinabi ni Austria na nais nilang masungkit ang 3-0 lead upang mas lumakas aniya ang kanilang tiyansang maiuwi ang kampeonato.

Mas mahihirapan aniya ang Aces na makapaglaro at makapag-isip kung baon na sa pagkatalo ang koponan ng mga ito.

Matatandaang inilampaso ng Beermen ang Aces sa Game 1 sa iskor na 108-78 habang hindi rin nakaporma sa San Miguel ang Aces sa iskor na 103-95.

By  Ralph Obina  

Hinamon ni Amir Khan si Floyd Mayweather Jr. na magpakalalaki at pangalanan na ang nais nitong makalaban sa parisukat na lona.

Ayon kay Khan, naglalaro na naman si Floyd sa hindi nito pag-anunsyo ng kaniyang susunod na makakatunggali sa kaniyang laban sa Setyembre.

Wika ni Khan, gawain na ni Mayweather na i-anunsyo kung sino ang nais niyang makalaban bago ang kaniyang fight upang hindi ito makapaghanda.

Ngunit sinabi ng boksingero na hindi siya pasisilo kay Mayweather kaya’t hindi niya pinababayaan ang sarili sa pag-eensayo sa kabila ng kaniyang pag-aayuno bilang pagtupad sa Ramadan.

By Jaymark Dagala  

Tumulak na patungong Macau si dating 4-division world champion Nonito “The Filipino Flash” Donaire para sa nakatakda nitong laban kay Anthony Settoul sa darating na Sabado.

Gaganapin ang bakbakang Donaire at Settoul sa Cotai Arena sa Venitian Resort sa Macau.

Matatandaang naging puspusan ang training ng The Filipino Flash para siguruhing maipapanalo nito ang ikalawang appearance ngayong taon.

Sa oras na manalo, posibleng sunod na makalaban ni Donaire ang world WBA super-bantamweight champion na si Scott Quigg.

By Ralph Obina   

Malamig pa rin ang kampo ni undefeated boxer Floyd Mayweather Jr. sa hamong bakbakan ni WBA Welterweight Champion Keith Thurman.

Ayon kay Thurman, gaya nina Amir Khan, Kell Brook at iba pa ay naghahangad ng makaharap si Mayweather.

Gayunman, sinabi ni Turman na hanggang ngayon ay wala pa ring tugon ang kampo ni Mayweather sa naturang alok na laban.

Tiniyak naman ni Thurman na kayang-kaya niyang patumbahin at mantsahan ang malinis ni record ni Mayweather.

Si Thurman gaya ni Mayweather ay nananatiling undefeated na may 26 na panalo kung saan 22 dito ang via knockout.

By  Ralph Obina