Tiwala ang bagong head coach ng Barangay Ginebra na mapuputol na ang title drought ng koponan.
Ito ayon kay Tim Cone ay dahil gagawin niya ang lahat para manalo ang Ginkings na huling nakasungkit ng kampeonato noong 2008.
Si Cone ay itinuturing na most accomplished coach sa PBA matapos ang 18 PBA Championship titles na napasakamay ng Alaska team at San Mig Coffee miXers na ngayo’y Star Hotshots na.
By Judith Larino
Handang-handa na si two-division world champion Brian Viloria sa kanilang rematch ni Mexican fighter Omar “Lobito” Soto sa Florentine Gardens sa Hollywood, California sa Linggo, Hulyo 26.
Ayon kay Viloria, maganda ang kondisyon ng kanyang katawan ngayon at wala siyang problema sa timbang.
Naniniwala ang dating light flyweight at flyweight world champion na hindi siya mahihirapan sa kanilang laban ni Soto.
Ang resulta ng labang ito ang magde-determina kung handa na si Viloria sa isang rematch kay Juan Francisco Estrada na umagaw ng kanyang WBO at WBA titles sa Macau noong Abril 6, 2013.
By Jelbert Perdez
Kumpirmadong lalahok sa US Open sina World Number 1 at 2011 Champion Novak Djokovic at World Number 2 at five time champion Roger Federer.
Ang US Open ay magbubukas sa August 31 hanggang September 13 at gaganapin ito sa Usta Billie Jean King National Tennis Center sa Flushing, New York.
Kabilang din sa mga lalahok sa US Open sina World Number 9 at defending champion Marin Cilic, World Number 3 at 2012 US Open Champion Andy Murray at World Number 10 at two time US Open Champion Rafael Nadal.
By Judith Larino
Bago ang nakatakdang pagsabak ng Philippine National Men’s Basketball Team sa 2015 FIBA Asia Championship ay mapapalaban muna ito sa MVP Cup.
Makakatuos ng Gilas Pilipinas sa torneo ang defending West Asia Champion na Lebanon, Chinese Taipei at 2014 New Zealand League Champion na Wellington Saints.
Ngayon lamang magbabalik ang Lebanon sa international scene mula nang suspendihin ng FIBA noong 2013 dahil sa problema sa lokal na liga.
Sisipa ang MVP Cup sa Setyembre 11 hanggang Setyembre 13 ngayong taon sa Smart-Araneta Coliseum.
By Jelbert Perdez
Sisimulan na sa susunod na buwan ang mahigpit na training ng mga boksingerong Pinoy na isasabak sa 2016 Olympics.
Ito ayon kay Amateur Boxing Executive Director Ed Picson ay sa sandaling payagan na ng Armed Forces of the Philippines (AFP) ang mga boksingerong sundalo.
Pinangungunahan ni London Olympian Mark Anthony Barriga ang walong boksingero hindi muna sumalang sa training ng national team matapos silang i-recall ng kani-kanilang mother units sa AFP.
Sinabi ni Picson na ang mapipiling pitong boksingero sa bawat weight class sa Asian Boxing Confederation Elite Men’s Championship sa Bangkok sa August 25 at mauuna na sa AIBA World Championships sa Doha, Qatar sa Oktubre at tuluyang maku-qualify sa 2016 Olympics sa Rio de Janeiro.
By Judith Larino
Natupad na rin sa wakas ang pangarap ni dating Globalport Batang Pier Import Jarrid Famous na makapasok sa NBA matapos itong palagdain ng kontrata ng Dallas Mavericks.
Ayon sa pamunuan ng Mavs, tatlong taon ang magiging serbisyo ni Famous sa koponan.
Si Famous ay pumoste ng 12.8 points at 8.3 rebounds nang ito’y maglaro sa summer league sa piling ng Washington wizards.
Bago sumabak sa summer event ay ginabayan ni Famous ang Globalport sa PBA Governors’ Cup kung saan nag-average ito ng 30.22 points, 23 rebounds at 1.44 assists sa pitong laro.
Matatandaang naglaro rin ang 6’11” na si Famous sa Meralco Bolts tatlong taon na ang nakararaan.
By Jelbert Perdez
Ipinagpalit ng Denver Nuggets si Point Guard Ty Lawson sa apat na bench players ng Houston Rockets.
Inanunsyo ito ng NBA, halos isang linggo matapos arestuhin ng mga otoridad si Lawson dahil sa hinalang nagmamaneho ng lasing.
Kabilang sa kapalit ni Lawson si Greek Forward Kostas Papanikolaou at Lottery Protected 2016 First Round Pick ng Houston.
Si Lawson na inaasahang magpapalakas sa Houston ay naglaro ng 6 na season sa NBA lahat para sa Denver.
By Judith Larino
Itinanggi ng pamunuan ng Rain or Shine ang kumakalat na alingasngas na magkakawatak-watak na ang koponan.
Ito’y kasunod na rin ng napaulat na lilisanin na ni Coach Yeng Guiao ang Elasto Painters matapos bigong masungkit ang korona sa nakaraang season.
Ayon kay Atty. Mamerto Mondragon, kinatawan ng team sa PBA Board, gusto nila si Guiao at maaari itong manatili sa koponan hangga’t gusto nito.
Sa kanyang panig, sinabi rin ni Guiao na hindi siya aalis sa Rain or Shine at katunayan ay mayroon pa siyang isang taon na nalalabi sa kanyang kontrata sa koponan.
By Jelbert Perdez
Tinawag na unprofessional ni Top Rank Promotions Prresident Bob Arum si Manny Pacquiao.
Ayon kay Arum, hindi bumalik ng Amerika si Pacman para muling ipa-check up ang kaniyang injury sa balikat matapos ang laban kay Floyd Mayweather Jr.
Gayunman, sinabi ni Arum na matanda na at may sariling desisyon na si Pacman kaya’t alam na nito ang makakabuti sa kaniya lalo na sa rehabilitasyon ng kaniyang balikat.
Hindi pa nagpaawat si Arum at tinawag pang hindi active fighter ang Pambansang Kamao.
By Judith Larino
Unti-unti nang naibabangon ni Nonito The Filipino Flash Donaire ang kaniyang karera sa larangan ng boksing.
Ito’y makaraan ang matagumpay na pagpapabagsak sa ikalawang round kay Anthony Settoul nitong Sabado ng gabi.
Ayon kay Nonito, maliban sa kaniyang tatak na left hook punch, nagagamit na rin niya ngayon ang kaniyang kanang kamay sa pagsuntok.
Magugunitang nakalasap ng pagkatalo si Donaire mula sa kamay nila Guillermo Rigondeaux at Nicholas Walters.
Kasunod nito, hinamon ni The Filipino Flash si WBA Regular Titleholder na si Scott Quigg para makaharap sa kaniyang susunod na laban.
By Jaymark Dagala