SPORTS

Dismayado umano si Ginebra Head Coach Tim Cone sa kinalabasan ng laro nila laban sa San Miguel Beer kahapon kung saan natalo sila sa score na 82-100.

Ang Beermen ay nagpasabog ng 14 na 3-pointers sa unang half na nagpahirap sa Kings.

Ayon kay Cone, wala ang “never-say-die spirit” ng Kings kaya’t hindi ito nakaporma sa Beermen sa naturang laro.

Isa umano sa mga nagpahirap sa Kings ay si two-time MVP June Mar Fajardo kahit nasa panig nila sina Center Greg Slaughter at Japeth Aguilar.

Giit ni Cone, kailangan lang ipakita nilamg muli ang “never-say-die spirit” na siyang trademark ng mga nakaraang team ng Ginebra.

By  Jelbert Perdez  

Nagbigay ng tribute si New York Knicks Forward Kevin Seraphin para sa mahigit 100 tao na nasawi sa Paris sa laro ng kanyang koponan laban sa New Orleans Pelicans sa Madison Square.

Sa tulong ng Pranses na si Seraphin ay nanalo ang Knicks sa score na 95-87 laban sa Pelicans dalawang araw matapos ang mga pag-atake sa France.

Kumamada si Seraphin ng 12 points sa naturang laro kung saan humataw ito na taglay ang “Paris haircut” na may disenyo ng Eiffel Tower at peace sign sa kanyang ulo.

Ayon kay Seraphin, kaya siya nagpagupit ng salitang “Paris” sa ulo ay dahil gusto niyang gumawa ng kakaiba o creative lalo pa’t mas madali itong gawin kumpara sa tattoo.

By  Jelbert Perdez

Tinambakan ng San Miguel ang Ginebra sa kanilang paghaharap kagabi sa Philsports Arena

Natutuwa si Coach Leo Austria sa aniya’y team effort at pagsunod ng kaniyang players sa game plan kaya’t napadapa nila ang Gin Kings sa final score na 100-82.

Nagsilbing bayani sa nasabing laban si Arwind Santos na gumawa ng 24 points at nag contribute rin si June Mar Fajardo ng 22 points samantalang kapwa nagtala naman ng tig-21 points sina Japeth Aguilar at Greg Slaughter sa panig ng Ginebra.

By  Judith Larino

Nagluluksa din ngayon ang mundo ng sports sa Paris matapos ang mga pag-atake doon nitong Biyernes na ikinsawi ng hindi bababa sa 120 katao.

Bago mag-simula ang Euro 2016 Soccer Play off sa pagitan ng Sweden at Denmark sa Friends Arena sa Stockholm, iniliwan muna ng pula, puti at asul ang buong stadium

Kapwa nagsuot ng itim na armband ang 2 koponan at panandaliang nag-alay ng katahimikan para sa mga biktima ng terror attacks.

Isang minutong katahimikan at pagpapailaw din ng mga kulay ng bandila ng France ang isinagawa sa ibat ibat sporting events sa Ukraine, Australia at Amerika.

Kinansela naman ng European Professional Cup Rugby ang lahat ng Champions Cup at Challenge Cup games sa France ngayong weekend, gayundin ang lahat ng basketball at volleyball matches doon.

Ilalagay naman ng international Olympic committee sa half-mast ang olympic flag.

By: Jonathan Andal

Kumpiyansa ang Pinoy Featherweight Mixed Martial Arts Fighter na si Edward Kelly na mananaig ang galing ng Pinoy sa laban nito kontra kay Martin Nguyen ng Australia na gaganapin sa Singapore.

Naniniwala si Kelly na matatapos ang kanilang laban ni Nguyen via stoppage.

Makakaasa aniya ang mga manunuod ng exciting at maaksyong laban.

Ipinagpapasalamat ni Kelly ang pagkakabilang niya ngayon sa Team Lakay ng Baguio City na malaki aniya ang naitulong para mas lalo pa niyang mapaghusay ang kaalaman at kakayahan sa Mixed Martial Arts.

Masaya rin si Kelly na makasama ang top fighters sa bansa na miyembro din ng team lakay na kinabibilangan nina Eduard Folayang, Mark Eddiva, Kevin Belingon na tumutulong aniya para itulak siya at mas pagbutihin ang sport.

By  Ralph Obina

Opisyal nang pumirma ng kontrata sa UCLA o University of California Los Angeles Bruins si Kobe Paras.

Una nang nag-commit si Paras sa Bruins noong isang taon matapos makatanggap ng scholarship mula kay UCLA Coach Steve Alford habang naglalaro pa para sa La Cathedral Phantoms.

Ang UCLA ay nasa Top NCAA Divison 1 School na may maipagmamalaking 11 championship titles.

Dalawang tao nang nasa Amerika si Kobe Paras na anak ni PBA legend Benjie Paras.

By Judith Larino 

Muli na namang pinangunahan ni reigning MVP Stephen Curry ang panalo ng Golden State Warriors.

Pinadapa ng Warriors ang kalabang Memphis Grizzlies sa iskor na 100-84.

Bagamat tahimik sa unang half ng laro, nag-init naman nang husto si Curry sa second half at nagtapos nang may 28 puntos.

Matatandaan sa nakaraang laban ng Warriors at Grizzlies, nakapagbaon ng 50 kalamangan ang Golden State kontra Memphis.

By  Ralph Obina

Pito hanggang sampung araw na out muna sa laro ng Oklahoma City Thunder si Kevin Durant.

Ito ay dahil sa kailangan niyang ipahinga ang kanyang harmstring injury na tinamo sa laro kahapon kontra Washington Wizards.

Ayon sa mga opisyal ng Thunder, ang kondisyon ni Durant ay ire-reassess sa susunod na linggo.

Matatandaang 27 matches nawala si Durant noong nakaraang season dahil sa tinamo naman nitong injury sa kanang paa nito na nangailangan ng 3 operasyon sa loob ng 6 na buwan.

By  Ralph Obina 

Pursigido ang Philippine Azkals na maipanalo ang laban sa Yemen mamayang gabi sa Rizal Memorial Stadium.

Ito ayon kay Azkals Coach Thomas Dooley ay kahit hindi makakapaglaro ang striker/team captain na si Phil Younghusband.

Si Stephan Schrock ang pansamantalang magsusuot ng captain’s armband.

Sinabi ni Dooley na kailangang manalo ng Azkals sa nasabing laro para manatiling buhay ang pag-asang makapasok sa susunod na round ng 2018 World Cup Qualifier.

Bukod sa Yemen, kailangan ding manalo ng Azkals laban sa mas malakas na koponan ng Uzbekistan at North Korea sa March 2016 para makapasok sa third round ng torneo.

By  Judith Larino