SPORTS

Tatangkain ng NLEX squad na makabawi sa kanilang kampanya sa PBA Philippine Cup sa pakikipagtuos nila laban sa Talk ‘N Text mamayang hapon.

Matatandaang nalugmok ang Road Warriors sa 2 magkasunod na pagkatalo sa nakaraan nilang laro kaya’t nais nitong makabawi sa tropang Texters.

Aminado naman si Talk ‘N Text Coach Jong Uichico na nakakatakot na kalaban ang Warriors dahil mahuhusay din ang mga atleta nito.

Samantala, makikipagtuos naman ang Globalport Batang Pier sa Alaska Milk Aces mamayang gabi.

By Jelbert Perdez 

Manalo man o matalo, ang mahalaga umano kay Barangay Ginebra San Miguel Coach Tim Cone ay mapalakas ang pundasyon ng koponan.

Inamin ni Cone na hindi niya inaasahang matatambakan ng Kings ang Meralco Bolts sa score na 89-64 sa nakaraan nilang laro sa Biñan, Laguna.

Dahil sa naturang tagumpay, taglay na ng Ginebra ang 2-3 win-loss record sa PBA standings.

Matatandaang naging susi sa panalong iyon ng Ginebra sina big man Greg Slaughter, Center Japeth Aguilar, Mark Caguioa, LA Tenorio at Nico Salva.

Ayon kay Cone, tinututukan na umano niya ang pagpapanatili ng momentum ng Kings para maipanalo ang mga susunod pa nilang laro.

By Jelbert Perdez

Hinubaran na ng boxing belt si WBC Middleweight Champion Miguel Cotto, apat na araw bago ang nakatakdang laban nito kay Canelo Alvarez ng Mexico.

Ayon kay WBC President Mauricio Sulaiman, ito ay bunsod ng pagtanggi ni Cotto na pumirma sa kasunduan ng nalalapit niyang laban.

Nilinaw naman ni Sulaiman na tuloy ang bakbakang Cotto at Alvarez na inaasahang kikita ng milyong milyong dolyar.

Gayunman, sa oras na manalo aniya si Alvarez ay ito na aniya ang hahawak sa titulong tinanggal kay Cotto.

Wala pa namang komento ang kampo ni Cotto sa naging hakbang ng WBC.

By Ralph Obina  

Pinasali sa ensayo ng Gilas Pilipinas si Talk n’ Text rookie Moala Tautuaa.

Si Tautuaa ay pansamantalang ipinalit kay naturalized player Andray Blatche.

Ayon kay Gilas Coach Tab Baldwin, magsisilbing back up lamang si Tautuaa sakaling hindi payagang makasali si Blatche sa FIBA Olympic qualifying rounds sa susunod na taon.

Nagpasalamat si Baldwin kay Tuatuaa na kaagad tumugon sa kaniyang tawag samantalang natuwa rin ang Fil Tonggan player dahil nakasama niya ang mga dating kasamahan sa Gilas team mates sa Williams Jones Cup .

By  Judith Larino 

Tatangkain ng Barangay Ginebra San Miguel at Meralco Bolts na makabawi sa kani-kanilang kampanya sa PBA Philippine Cup.

Makikipagtuos ang Ginebra sa Meralco mamayang alas-7:00 ng gabi sa Alonte Sports Arena sa Biñan, Laguna.

Magaganap ang bakbakan ng Kings at Bolts pagkatapos ng laro sa pagitan ng Barako Bull Energy at Mahindra Enforcers na magsisimula mamayang alas-4:15 ng hapon.

Ang Gin Kings ay isa pa lamang ang panalo sa apat na laban sa kasalukuyang PBA Cup habang ang Meralco ay kulelat at talo sa nakaraang apat na laro.

Ayon kay legendary Coach Tim Cone, sisikapin nilang maipanalo ang laro nilang ito sa Meralco upang makausad sa elimination round.

By  Jelbert Perdez    

Umani ng negatibong komento ang paninisi ni NBA star Lebron James sa Cleveland Cavaliers matapos matalo sa double overtime sa laban sa Milwaukee Bucks.

Ayon sa basketball experts, mali ang ginawa ni James dahil mismong ang team nito ang kaniyang binatikos sa naging pahayag.

Wala pa namang komento ang Cavs sa pahayag ni James na hindi maganda ang performance ng team matapos umabot sa aniya’y nakakadismayang 20 turnovers.

By  Judith Larino