SPORTS

Magkakasubukan ang Alaska Aces at Star Hotshots sa PBA Philippine Cup mamayang alas-7:00 ng gabi sa Smart-Araneta Coliseum.

Magaganap ang salpukan ng Alaska at Star pagkatapos ng bakbakan ng NLEX Road Warriors at Meralco Bolts bandang alas-4:15 mamayang hapon.

Kung papalarin laban sa Hotshots ay makakapantay ng Aces ang San Miguel Beermen sa PBA standings na mayroong 5-1 na kartada.

Ang Alaska ay nanalo sa pinakahuli nitong laro kontra sa Globalport Batang Pier habang nalugmok naman ang Star sa dalawang magkasunod na laro.

Tatangkain naman ng Road Warriors na mailista ang ikalawa nitong panalo sa liga laban sa Bolts matapos nilang pataubin ang Talk ‘n Text noong Biyernes.

By Jelbert Perdez  

Panalo si Serbian tennis superstar at World’s Number 1 Novak Djokovic sa ATP World Tour Finals.

Tinalo ni Djokovic si World’s Number 3 Swiss Tennis Superstar Roger Federer sa kanilang final game.

Si Djokovic ang itinuturing na kauna-unahang manlalaro na nakakuha ng titulo sa loob ng apat na taon sa 46 na taong kasaysayan ng torneo.

By  Judith Larino 

Nagdiwang ang Golden State Warriors sa pangunguna ni MVP Stephen Curry nang padapain ang Denver Nuggets sa score na 118-105 para sa ika-15 sunod na ratsada sa NBA.

Sa unang yugto pa lamang ng laro ay naghabol na ang Nuggets sa Golden State hanggang sa humataw ang Warriors sa ika-apat na quarter kung saan hindi na ito lumingon pa mula noon.

Kung mananaig ang Warriors sa kanilang laban sa Los Angeles Lakers sa Miyerkules ay mababasag na nila ang 15-0 start sa NBA sa mga nakalipas na taon.

Matatandaan na ang Washington Capitols noong 1948-49 season at ang Houston Rockets noong 1993-94 season ay kapwa nagtala ng katulad na 15-0 start sa liga.

By  Jelbert Perdez  

Napanatili ng San Miguel Beermen ang pangunguna nito sa standing ng 2016 Smart Bro PBA Philippine Cup matapos talunin ang Barako Bull Energy.

Nakapagtala na ang Beermen ng 5-1 win loss record samantalang 3-3 naman ang Barako Bull.

Nanguna si June Mar Fajardo sa panalo sa San Miguel matapos magtala ng 28 puntos at nakagawa naman ng 19 na puntos si Ronald Tubid.

By  Judith Larino  

Magpapahinga muna si Kiefer Ravena bago siya sumabak sa Philippine Basketball Association o PBA.

Ito ang inihayag ng back to back most valuable player ng Ateneo, sa harap na rin ng nakatakda niyang pamamaalam sa Ateneo Blue Eagles basketball team sa pagatatapos ng kanyang senior year sa unibersidad.

Ayon kay Ravena, ang taong ito ang pinaka espesyal sa kanya dahil na rin sa mga hirap na naranasan ng kanilang koponan sa loob at labas ng court.

Dahil anya dito, lalo pang lumakas at nagkaisa ang kanilang team. Inihalintulad pa ng celebrity player ng Ateneo sa roller coaster ang kanyang 5 taon sa unibersidad.

Kagabi, sa huling laban ni Ravena kasama ang mga player ng Ateneo Blue Eagles, natalo ang kanilang koponan laban sa Far Eastern University sa score na 76-74.

By: Jonathan Andal

Nakaisa na rin ang NLEX Road Warriors sa PBA matapos manalo kontra Talk ‘N Text sa final score na 107-101.

Tuwang-tuwa si Coach Boyet Fernandez sa naging performance ng kaniyang players para maitala ang unang panalo simula nang pumasok sa liga ang Road Warriors.

Nasa 3-2 standing ang NLEX kasama ang Barako Bull, Global Port Batang Pier at Talk ‘N Text Tropang Texters.

By Judith Larino  

Ipinag-utos ng Philippine Basketball Association (PBA) ang pagsuspinde kay Mahindra consultant Joe Lipa dahil sa kabiguan nitong magpaliwanag hinggil sa reaksyon niya sa komento ni Commissioner Chito Narvasa tungkol kay Manny Pacquiao.

Si Lipa ay nakatanggap ng mandatory summon mula sa PBA matapos idepensa si Pacquiao laban sa iginiit ni Narvasa na mas mahusay si Pacquiao bilang boxer at hindi bilang basketbolista.

Una nang ikinunsidera ng dating national team coach ang statement ni Narvasa bilang pang-iinsulto sa Pambansang Kamao na ikinagalit umano ng opisyal.

Sinasabing hindi maaaring dumalo si Lipa sa alinmang laro sa PBA hangga’t hindi ito nakapagbibigay ng paliwanag sa naturang usapin.

By Jelbert Perdez