SPORTS

Puspusan ang ginagawang ensayo ngayon ni Nonito ‘The Filipino Flash’ Donaire Jr. para sa kanyang nalalapit na laban kontra kay Cesar Suarez.

Ayon sa ama nitong si Nonito Sr., matindi ang ginagawang paghahanda ng kaniyang anak kung saan, nakatakda pa itong sumalang sa 10 rounds ng sparring session bukas.

Kumpiyansa rin ang nakatatandang Donaire na magiging maganda ang sagupaan sa pagitan ng kaniyang anak at ni Suarez dahil sa talino at mas pinong atake nito.

Dahil dito, sinabi ni Donaire Sr. na wala na siyang mahihiling pa para sa kaniyang anak.

By Jaymark Dagala  

Nananatili pa ring kulelat ang koponang Philadelphia 76ers matapos pataubin ng Memphis Grizzlies sa score na 84-92.

Tila mailap pa rin ang tagumpay sa koponan sa kabila ng kalamangan ng Sixers sa huling minuto ng third quarter nila Isaiah Canaan at Robert Covington.

Inakala ng Sixers na magtutuluy-tuloy na ang kanilang suwerte hanggang fourth quarter nang magpatawag ng time out si Memphis Coach Dave Joerger.

Pagtapos ng time out, nag-iba na ng istratehiya ang Memphis kung saan, tuluyan na nitong naungusan ang Sixers at hindi na nagawang makahabol pa.

By Jaymark Dagala 

Muling pinatunayan ng mga Pinoy ang galing nito sa larangan ng palakasan.

Ito’y makaraang makasungkit ng gintong medalya ang Negrenseng si Jose Jerry Belibestre, isang college freshman sa University of Negros Occidental – Recoletos.

Nagwagi si Belibestre sa larangan ng long jump sa isinagawang ASEAN School Games sa Brunei, Darussalam.

Nakuha ni Belibestre ang 7.47 meter record high sa long jump category na mas mataas sa dati nitong record na 7.26 meters.

Bukod kay Belibestre, 13 atleta pa ang kaniyang kasama para katawanin ang bansa sa nasabing kompetisyon.

By  Jaymark Dagala 

Malabo nang magkaroon pa ng rematch ang bakbakang Manny Pacquiao at Floyd Mayweather, Jr.

Ayon kay Michael Koncz, adviser ni Pacman hindi na nila hinihintay ang desisyon ni Floyd, Jr. kaugnay sa nasabing rematch at kung mananatili na siyang retiradong boksingero.

Muling iginiit ni Koncz na ang mga boksingerong sina Terence Crawford, Tim Bradley at Amir Khan na lamang ang kanilang pinagpipilian.

Sa susunod na linggo ay magkikita sina Koncz at Pacman para pag-usapan na ang susunod na makakalaban at asahang iaanunsyo ito sa 2016.

By  Judith Larino 

Pinadapa ng Alaska Aces ang NLEX Warriors sa kanilang pagtutuos sa quarterfinals ng PBA Philippine Cup kagabi.

Nanguna sa panalo ng Aces si Sonny Thoss na nakapagbaon ng 16 na puntos at 10 rebounds na sinegundahan naman ni Vic Manuel na may 11 puntos.

Dahil sa panalo, sigurado nang may puwesto ang Aces sa quarterfinal round sa pamamagitan ng 6 na panalo at isang talong record nito.

By  Ralph Obina  

Sisikapin ng Rain or Shine na makakapit sa ikatlong pwesto ng PBA Philippine Cup.

Ito’y bunsod ng natakdang pakikipagsagupa ng Elasto Painters sa Barako Bull mamayang alas-7:00 ng gabi sa Smart-Araneta Coliseum.

Ang Rain or Shine ay mayroong kartadang 4-1 na sariwa pa sa ginawang pagdurog sa Blackwater habang ang Energy naman ay taglay ang kartadang 3-3 na nalugmok sa kamay ng San Miguel noong Linggo.

Magaganap ang bakbakan ng dalawang koponan pagkatapos ng salpukan ng Alaska at NLEX Road Warriors sa first game.

By  Jelbert Perdez