SPORTS

Babawasan na ng team Pacquiao ang training ni 8-division world champion Manny Pacquiao.

Ayon kay Hall of Famer Coach Freddie Roach, ito ay dahil nakuha na ng Pambansang Kamao ang peak ng kondisyon katawan nito.

Sinabi ni Roach na noon pang nakaraang linggo ay nakapagsagawa na si Pacquiao ng 12 round sparring session laban kay Mexican American Jose Ramirez.

Sa susunod na linggo ay lilipad na ang Pambansang Kamao patungong Los Angeles para sa kanyang huling training bago magtungo ng Las Vegas para sa laban kontra kay Jessie Vargas.

By  Ralph Obina 

Target ng boxing champ na si Saul Canelo Alvarez na makabuo ng tatlong laban sa susunod na taon.

Ito’y ayon sa trainer ni Canelo na si Eddie Reynoso ay dahil sa hindi inaasahang mabilis na recovery ng kanyang alaga mula sa tinamong injury.

Magugunitang naunsyami ang laban sana ni Canelo ngayong Disyembre makaraang ma-injured ang kanyang kamay matapos patulugin sa ika-siyam na round ang kalabang si Liam Smith.

Kabilang sa mga posibleng laban ni Alvarez ay Cinco de Mayo weekend, ang laban nila ni Gennady Golovkin at isa pa sa buwan Setyembre ng susunod na taon.

By Jaymark Dagala

Laglag na sa Shanghai Masters si tennis world number three Stan Wawrinka.

Ito ay matapos siyang idispatsa ni Gilles Simon ng France sa ikatlong round ng Shanghai Masters sa iskor na 6-4, 6-4.

Ang rank 32 na si Simon ay kinailangan ng 96 na minuto para talunin ang US tennis star na si Wawrinka.

Susunod namang makakaharap ni Simon ang Amerikanong si Jack Sock.

By  Ralph Obina   

Naging maatikabo ang salpukan ng mga koponan sa maaksyong NBA Pre-Season Games kahapon.

Ito ay matapos maghabulan sa score na 116-104 ang Houston Rockets at New Orleans Pelicans.

Hindi rin naman nagkakalayo ang puntos sa pagitan ng San Antonio Spurs at Orlando Magic, 95-89.

Samantala, hindi umubra ang ginawang pagsuwag ng sungay ng Milwaukee Bucks sa Indiana Pacers nang magtapos ang kanilang girian sa court sa score na 83-101.

Nilapa naman ng Minnesota Timberwolves sa 88-105 ang Denver Nuggets.

Isang puntos naman ang nagpaningning sa Phoenix Suns laban sa Utah Jazz sa 111-110.

By  Mariboy Ysibido

Pinaghahandaan na ng mixed martial arts star Ronda Rousey ang kanyang pagbabalik sa octagon ring sa Disyembre.

Inihayag ito ni Ultimate Fighting Championship o UFC President Dana White matapos nitong i-anunsyo ang pagbabalik ni Rousey.

Makakalaban ni Rousey ang bantamweight champ na si Amanda Nuñez ng Brazil sa Disyembre 30 na gagawin sa Las Vegas, Nevada.

Magugunitang nalasap ni Rousey ang kanyang pagkatalo sa kamay ni Holly Holm noong isang taon matapos hawakan ang pound crown sa loob ng tatlong sunud-sunod na taon.

By Jaymark Dagala  

Panalo ang Philippine Team kontra Romania sa 2016 FIBA 3X3 World Championship sa na ginaganap sa China.

Ang Team Pilipinas ay binubuo nina Mac Belo, Russel Escoto, Glenn Khobuntin at Karl Dahesa nang talunin ang Romania, 21-19.

Hindi naman nagtagumpay ang national team sa ranked 11 na Spain sa score na 21-16.

Susunod na makakaharap ng Pilipinas ang Hungary at Poland sa Biyernes.

By Mariboy Ysibido

Photo Credit: FIBA

Posibleng makitang maglaro sa isang basketball team sa china si TNT Katropa Star Jayson Castro.

Inamin ni Castro na mayroong nag-aalok sa kanya na maging bahagi ng Chinese Basketball Association o CBA.

Pero nilinaw ni Castro na wala pa siyang kontrata kundi proposal pa lamang dahil sa ongoing pa aniya ang PBA season.

Malaking pagkakataon aniya ito upang mas lalo pa niyang mapaghusay ang napiling larangan.

Matatandaang si Castro ang nakasungkit ng best point guard in Asia Award sa FIBA.

By  Ralph Obina   

Nasa magandang kondisyon na umano ang katawan ni 5-Division World Champion Nonito “The Filipino Flash” Donaire para sa nalalapit na laban nito sa Mehikanong boksingero na si Jessie Magdaleno.

Kasabay ito ng magiging bakbakan nina Sen. Manny Pacquiao at Jessie Vargas sa Thomas and Mack Center sa Las Vegas sa Nobyembre 5.

Ayon sa trainer nito na si Ismael Salas, may ilang mga pagbabago silang ginawa sa istilo ng boksingero.

Ilan na rito ang pag-alis sa mga unnecessary movements ng boksingero.

Nakitaan naman agad si Donaire ng development sa naturang pagsasanay.

Paliwanag ni Donaire, maganda ang kanyang pakiramdam at nakasisigurong nasa tamang kondisyon na ang kanyang katawan para makipagsagupa sa Mexican fighter.

By  Mariboy Ysibido   

Nakalasap  ng  unang pagkatalo  ang defending champion na Cleveland Cavaliers sa kamay ng Atlanta  hawks sa nagpapatuloy na NBA preseason games.

Ito ay makaraang payukuin ng Hawks ang Cavs sa iskor na 99-93.

Pinangunahan ng sentrong si Dwight Howard ang panalo ng Hawks makaraang kumana ito ng  26  na  puntos at walong rebounds.

Sinegundahan naman ito ni  Thabo Sefolosha na nakapag-ambag naman ng 12 puntos.

Malaking  kawalan  naman para sa Cavs na wala ang kanilang star players na naging dahilan ng kanilang  pagkatalo.

By: Ralph Obina

Dalawang buwan pang muli ang hihintayin sa pagbabalik sa laro ng golf legend na si Tiger Woods.

Ito’y makaraang umatras na sa Safeway Open si Woods.

Paliwanag ni Woods, ayos na ang kanyang kalusugan at pakiramdam ngunit sadyang hindi pa aniya siya handa samabak muli sa torneo.

Una rito, inanunsyo ni Woods noong September 7 na tatlong torneo ang plano niyang salihan bago matapos ang 2016.

Dahil dito, inaasahang sa Disyembre pa inaasahang muling makakapaglaro si Woods sa Hero World Challenge.

By Ralph Obina