SPORTS

Inilabas na ni Gilas Pilipinas Coach Chot Reyes ang kumpletong listahan ng 24-man roster ng national basketball team na sasabak sa 2017 Southeast Asian Basketball Asian Championship sa Abril.

Inanunsyo ni Samahang Basketbol ng Pilipinas President Al Panlilio sasamahan ang labindalawang (12) veteran ng labindalawang (12) bagong cadets.

Balik-Gilas ang Asia’s best point guard na si Jayson Castro; Terrence Romeo; reigning 3-time PBA MVP June Mar Fajardo; Calvin Abueva; Japeth Aguilar; Paul Lee.

Pasok din sina Mac Belo; Carl Bryan Cruz; Kevin Ferrer; Von Pessumal; Russel Escoto; Ed Daquioag; Alfonzo Gotladera; Matthew Wright; Mike Tolomia; Arnold Van Opstal; Jio Jalalon; RR Pogoy; Art dela Cruz; LA Revilla; Jonathan Grey; Bradwyn Guinto; Norbert Torres at Raymond Almazan.

Ang 2017 SEABA na lalarga simula Abril 23 hanggang 30 ay qualifying tournament para sa FIBA Asia 2017 na gaganapin naman sa Lebanon simula Agosto 17 hanggang 27.

By Drew Nacino   

Pasok na para sa NBA All Star Game sa Pebrero 19 si Los Angeles Lakers Guard Jordan Clarkson.

Ito ay matapos siyang makakuha ng halos 461,000 boto at mapunta sa ikaanim na puwesto sa All Star Voting.

Makakasama ni Clarkson sina Stephen Curry ng Golden State Warriors, James Harden ng Houston Rockets, Russel Westbrook ng Oklahoma City Thunder, Klay Thompson ng Warriors at Chris Paul ng Los Angeles Clippers.

By  Katrina Valle

Pinadapa ng Barangay Ginebra ang Blackwater sa score na 99-90 sa kanilang bakbakan sa PBA Philippine Cup sa Cuneta Astrodome, Pasay City.

Si Scottie Thompson ang nanguna sa Gin Kings matapos kumamada ng 13 points at 15 rebounds.

Dahil sa panalo ay umakyat na ang kartada ng Ginebra sa 5-4.

By  Jelbert Perdez   

Hinamon ni 8-Division World champion Manny Pacquiao ang Olympian at Australian boxer na si Jeff Horn na pabagsakin siya sa kanilang posibleng laban.

Ito ay matapos sabihin noon ni Horn na siya ang magpapatulog kay Pacquiao sa ibabaw ng ring.

Ayon sa Pambansang Kamao, hindi niya kilala si Horn at di rin nito alam ang kalibre ng Australian boxer.

Dahil dito, sinabi ni Pacquiao na mahirap husgahan ang abilidad ni Horn.

Umaasa si Pacquiao na mapapabilib siya ni Horn at bibigyan ng kapana-panabik na laban.

By   Ralph Obina    

Masyadong malakas si 8-division world champion Manny Pacquiao para sa Australian boxer na si Jeff Horn.

Ito ang paniwala ng veteran referee na si Bruce Mctavish sa gitna ng inaabangang laban ng dalawa sa Abril.

Ayon sa 76-taong gulang na boxing official, kung record lamang ang pagbabatayan ay tiyak na lalamunin ng buhay ni Pacquiao si Horn sa kartadang 59 wins, 6 loss at 1 draw kabilang ang 38 knockouts kumpara sa 16-0-1 ng 28-anyos na welterweight contender.

Masyado anyang “Hinog sa Pilit” at hindi pa handa si Horn na sagupain si Pacman at maituturing na mismatch ang dalawa kaya’t hindi malayong bumagsak agad o hindi abutin ng round 5 ang Australian fighter kung tatamaan ng matinding suntok mula sa People’s Champ.

Pinayuhan naman ni Mctavish si Senator Pacquiao na labanan na lamang ang mga katulad ni WBO-WBC Light Welterweight Champion Terence Crawford na kasalukuyang nasa rurok ng kanyang boxing career na isa ring “dekalibreng” boksingero.

By  Drew Nacino

Wagi ang TNT Katropa kontra Mahindra Floodbuster sa iskor na 104-92 sa pagpapatuloy ng PBA Philippine Cup.

Pinangunahan ni Troy Rosario ang panalo ng TNT kung saan nakapagtala ito ng 18 puntos at siyam (9) na rebound.

Nag-ambag naman si Roger Pogoy ng career high 16 points, apat na rebound at apat na assist.

Dahil dito, mayroon ng limang (5) panalo at apat (4) na talo ang TNT, habang dalawang (2) panalo at anim (6) na talo ang Mahindra.

By Meann Tanbio  

Photo Credit: PBA

Mainit na tinanggap ng kanyang bagong koponan sa Thailand si dating Ateneo Lady Eagles Spiker Alyssa Valdez.

Si Valdez ay nasa Thailand na ngayon at kasama ang kanyang team doon na 3BB Nakornnont para sa volleyball Thailand league.

Ipinrisinta si Valdez na may jersey number 9 at tinaguriang the rising star.

Si Valdez ay sasabak sa Thailand League sa unang pagkakataon sa Enero 29.

By  Ralph Obina  

Photo Credit: 3BB Nakornnont / FB page

Kumpiyansa ang Philippine Olympic Committee na makasusungkit ng medalya ang Women’s National Volleyball team sa Southeast Asian Games sa Agosto.

Ayon kay Joey Romasanta, Spokesman ng POC at dating pangulo ng larong volleyball sa Pilipinas Incorporated, isang malaking bagay para sa Philippine Volleyball Team na manalo sa SEA Games upang makaabot naman sa 2018 Asian Games.

Matagal na anyang hindi nakapapasok sa Asian Games ang Pilipinas at ito na ang tamang panahon upang muling makatapak ang mga Pinay volleyball players sa naturang sport event.

Ipinagmalaki ni Romasanta na hindi matatawaran ang husay ngayon ng mga atletang kinabibilangan nina Alyssa Valdez, Rachel Anne Daquis, Jovelyn Gonzaga, Denden Lazaro, Jia Morado at Bea de Leon.

Pangalawa lamang ang Pilipinas sa mga may pinakamaraming nasungkit na medal sa women’s volleyball ng SEA Games o 6 gold, 3 silver at 4 bronze medals habang nangunguna ang Thailand na mayroong 12 gold, 2 silver at 2 bronze.

By Drew Nacino

Photo Credit: AFP