Mainit na tinanggap ng kanyang bagong koponan sa Thailand si dating Ateneo Lady Eagles Spiker Alyssa Valdez.
Si Valdez ay nasa Thailand na ngayon at kasama ang kanyang team doon na 3BB Nakornnont para sa volleyball Thailand league.
Ipinrisinta si Valdez na may jersey number 9 at tinaguriang the rising star.
Si Valdez ay sasabak sa Thailand League sa unang pagkakataon sa Enero 29.
By Ralph Obina
Photo Credit: 3BB Nakornnont / FB page
Kumpiyansa ang Philippine Olympic Committee na makasusungkit ng medalya ang Women’s National Volleyball team sa Southeast Asian Games sa Agosto.
Ayon kay Joey Romasanta, Spokesman ng POC at dating pangulo ng larong volleyball sa Pilipinas Incorporated, isang malaking bagay para sa Philippine Volleyball Team na manalo sa SEA Games upang makaabot naman sa 2018 Asian Games.
Matagal na anyang hindi nakapapasok sa Asian Games ang Pilipinas at ito na ang tamang panahon upang muling makatapak ang mga Pinay volleyball players sa naturang sport event.
Ipinagmalaki ni Romasanta na hindi matatawaran ang husay ngayon ng mga atletang kinabibilangan nina Alyssa Valdez, Rachel Anne Daquis, Jovelyn Gonzaga, Denden Lazaro, Jia Morado at Bea de Leon.
Pangalawa lamang ang Pilipinas sa mga may pinakamaraming nasungkit na medal sa women’s volleyball ng SEA Games o 6 gold, 3 silver at 4 bronze medals habang nangunguna ang Thailand na mayroong 12 gold, 2 silver at 2 bronze.
By Drew Nacino
Photo Credit: AFP
Nagtulong-tulong sina Stephen Curry, Kevin Durant at Klay Thompson sa animnapu’t pitong (67) puntos para idispatsa ang defending champion na Cleveland Cavaliers.
Inilampaso ng Warriors ang Cavs sa iskor na 126-91.
Kumana ng dalawampu’t pitong puntos si Thompson, nakapagtala ng dalawampu’t isang (21) puntos si Durant habang dalawampung (20) puntos naman ang naiambag ni Curry.
Samantala, nakapagtala naman si Draymond Green ng triple double para sa laban ng Warriors.
Umiskor si Green ng labing isang (11) puntos, labing tatlong (13) rebounds at labing isang (11) assists.
By Ralph Obina
Pinataob ng Philadelphia 76ers ang koponan ng Milwaukee Bucks sa iskor na 113-104.
Nanguna sa panalo ng Philadelphia si Joel Embiid na kumana ng dalawampu’t dalawang (22) puntos at labindalawang (12) rebounds.
Ayon kay Embiid, sa mga unang bahagi ng laro ay kanya pang pinakikiramdaman ang kanyang binti na galing sa injury.
Ngunit sa bandang huli ay hindi ito nakapigil sa sentro ng 76ers para iangat ang kanilang koponan.
Ito na ang ika-apat na magkakasunod na panalo ng 76ers sa loob ng limang laro.
By Ralph Obina
Sisikapin ng Australian boxing champ na si Jeff Horn na pabagsakin si 8-world division at fighting senator Manny Pacquiao.
Kasunod ito ng todong paghahanda ni Horn para nalalapit na bakbakan nila ni Pacman sa parisukat na lona.
Bagama’t aminado si Horn na hindi matutumbasan ang narating ni Pacman sa larangan, nangako siyang pahihirapan niya ito sa kanilang paghaharap.
Sa kasalukuyan, pinaplantsa na ng mga kampo nila Horn at Pacquiao kung magkano ang kanilang kikitain sa nasabing laban.
By Jaymark Dagala
Wagi ang Toronto Raptors kontra sa kalabang New York Knicks.
Nasungkit ng Raptors ang ikatlong sunod nilang panalo sa iskor na 116-101.
Nanguna sa panalo ng Raptors si Demar de Rozan na nakakopo ng dalawamput’ tatlong (23) puntos.
Sinegundahan naman ito ni Demarre Carroll na gumawa ng dalawampung (20) puntos.
By Ralph Obina
Nalusutan ng Blackwater Elite ang Alaska Aces sa kanilang paghaharap sa elimination round ng 2016-2017 PBA-All Filipino Cup sa Araneta Coliseum.
Nasungkit ng Blackwater ang kanilang ikalimang panalo matapos talunin ang mas beteranong Alaska sa score na 103-100.
Nag-ambag ng 19 points ang dating UE Red Warriors player na si Roi Sumang para sa Elite habang kumamada ng 21 points si Mac Belo upang i-angat ang kartada ng team sa 5-4 at mapako sa 4th spot.
Umabot sa 14 points ang kalamangan ng Blackwater sa 4th quarter subalit humabol ang Aces matapos magpakawala ng tres si Jayvee Casio at ilapit sa 89-92 ang score sa huling 2 minutes at 43 seconds pabor sa Elite.
Nananatili naman sa 5th spot ang Alaska Aces sa kartadang 4-4.
By Drew Nacino
Tiniyak ni dating WBO Middleweight Champion Julio Cesar Chavez Jr. na tatapusin niya sa isang knockout ang laban nila ng kapwa mehikanong boksingero na si Saul ‘Canelo’ Alvarez.
Kasunod ito ng pormal na pag-anunsyo ni Chavez na tuloy na ang kanilang bakbakan sa Mayo 6 sa T-Mobile arena Sa Las Vegas o AT&T stadium sa Texas.
Pagbibida pa ni Chavez, matitikman ni Canelo ang kanyang bangis dahil ipatitikim nya rito ang malalakas at matitinding mga kombinasyon ng kanyang mga suntok.
By: Avee Devierte
Nagpahayag ng interes ang Showtime Sports na i-cover ang posibleng bakbakan sa pagitan nina eight division Manny Pacquiao at Jeff Horn ng Australia sa Abril.
Ayon kay Showtime Sports Executive Vice President at General Manager Stephen Espinoza, handa silang makipagtulungan kay Top Rank CEO Bob Arum kung bibigyan ng pagkakataon na mai-ere ang laban ng pambansang kamao sa halip na sa pay-per-view.
Sinabi ni Espinoza na magandang alok ito lalo’t mula sa kanilang kampo lalot hindi na gaanong kumikita ang pay-per-view ngayon sa Estados Unidos.
Bagama’t hindi pa batid ng showtime ang kalibre ni Horn, tiwala naman itong magiging maganda ang kalalabasan ng laban.
By Ralph Obina
Inilampaso ng San Antonio Spurs ang Los Angeles laKers sa kanilang laban sa nagpapatuloy na National Basketball Association (NBA) games.
Hindi pinaporma ng Spurs ang Lakers sa loob ng apat na umaatikabong quarter games na nagtapos sa iskor na 134-94.
Pinangunahan ni Kawhi Leonard na nakasungkit ng tatlumpu’t isang (31) puntos.
By Ralph Obina