SPORTS

Kapwa nangunguna pa rin sina Cleveland Cavaliers star Lebron James at Golden State Warriors Stephen Curry sa NBA All Star voting.

Halos dalawamput isang (21) milyon na ang boto na mas mataas ng halos 150% kumpara noong isang taon.

Sa eastern conference, nangunguna si James na mayroong mahigit 1 million votes at pangalawa sa kanya si Milwaukee Bucks Giannis Antetokounmpo at ikatlo si Kevin Love.

Sa western conference naman, mayroong mahigit 900,000 boto si Curry habang nasa second spot si Kevin Durant at ikatlo si James Harden.

Magtatapos sa January 16 ang botohan at makalipas ang tatlong araw ay iaanunsyo na ang mga manlalarong pasok na maglalaro sa NBA All Star.

By Judith Larino   

Kasado na ang sagupaan ni 8-division world champion Manny Pacquiao at undefeated boxer Jeff Horn ng Australia sa Abril 22.

Kinumpirma ni Top Rank CEO at promoter Bob Arum na isasagawa ang laban sa Brisbane, Australia para sa title defense ng WBO welterweight ni Pacman.

Gayunman, 5 million dollars lamang ang fight purse na kasalukuyang nililikom ng Top Rank.

Kasalukuyang hawak ng 29-anyos na Australyano ang WBO inter-continental title at mayroong 16-0 record kabilang ang isang knockout.

Nakatakda namang magtungo si Arum sa Pilipinas upang kausapin si Senator Pacquiao at isapinal ang kasunduan.

Samantala, tatlo pang schedule ang iniluluto para sa Pambansang Kamao sa Russia sa Hulyo; laban kay Kell Brook sa United Kingdom at Terrence Crawford sa Las Vegas, ngayong taon bilang bahagi ng kanyang farewell fight.

By Drew Nacino   

Gumugulong pa rin ang negosasyon sa posibleng laban sa pagitan nina 8-division world champion Manny Pacquiao at Australian boxer na si Jeff Horn.

Ito ay sa kabila ng inihayag ni Top Rank CEO Bob Arum na kasado na ang bakbakang Pacquiao –Horn na gaganapin umano sa Abril 22.

Ayon sa tagapagsalita ni Pacquiao, wala pa ring kumpirmasyon ang dalawang kampo sa naturang pahayag ni Arum.

Matatandaang huling lumaban si Pacquiao noong Nobyembre ng nakaraang taon kung saan tinalo nito ang mas batang si Jesse Vargas.

By  Ralph Obina

Maaga pa lang ay tila nangangamba na ang Philippine athletic community sa papalapit na Southeast Asian Games (Sea Games) na gaganapin sa Kuala Lumpur, Malaysia ngayong taon.

Ito ang ipinahayag ni Anthony Suntay, sports commentator sa kanyang programang Real Sports sa IZ Balita Nationwide sa kadahilanang nagtanggal ang Malaysian Sea Games committee ng ilang sports category para sa kompetisyon na kinabibilangan ng women’s billiards division, women’s weightlifting division kung saan naging tanyag si Hidilyn Diaz, ang kauna-unahang Pilipina na nakakuha ng Silver Medal sa Olympics noong nakaraang taon.

Pagdating sa men’s events, nagtanggal din ang komite ng ilang boxing categories katulad ng 60 kg at 69 kg kung saan maraming Pilipino ang nananalo ng gintong medalya.

Dagdag pa ni Suntay, maaaring makaapekto ito sa sa over-all standing ng Pilipinas dahil ‘yung mga sports category kung saan malakas ang mga Pinoy ay unti-unti nang tinatanggal.

May ilang mga Pinoy sports enthusiast na ang nag-petisyon patungkol sa isyu ngunit ayon sa mga ito, mukhang malabo nang mangyari ang kanilang mga hinihingi na huwag tanggalin ang ilang sports category dahil sa ilang mga kadahilanan.

Ayon kay Suntay, ito ang nagiging problema o isyu sa Sea Games, dahil ayon sa panuntunan, ang host country ay may kaukulang karapatan na magdagdag at magtanggal ng mga kategorya.

Aniya, noong ginanap din naman ang Sea Games sa bansa, mayroon ding mga natanggal at nadagdag na sports kung saan malakas ang atletang Pinoy katulad ng billiards.

Ika nga ni Suntay, “you live and die with that kind of system.”

By Ira Yuson Cruz   

Itinanghal bilang 2016 FIFA Best Player of the Year si Portugal at Real Madrid forward na si Cristiano Ronaldo.

Nahigitan ni Ronaldo ang mahigpit nitong katunggali na si Lionel Messi makaraan itong makakuha ng 34.54 percent na boto.

Ang botohan ay binubuo ng national team captains, coaches, selected media at fans online.

Ito na ang ika-apat na best player award ni Cristiano.

By   Ralph Obina  

Posibleng libreng mapanood sa Amerika ang susunod na laban ni Senador Manny Pacquiao kontra sa Australian champion na si Jeff Horn.

Inamin ito ni Top Rank President at CEO Bob Arum dahil hindi aniya sikat sa Amerika ang number 2 ranked contender sa hawak na titulo ni Pacman na WBO welterweight belt.

Sinabi ni Arum na makikipagkita siya ngayong araw na ito o bukas sa Las Vegas sa mga kinatawan ni Horn para plantsahin ang detalye ng kontrata bago siya bumiyahe naman ng Pilipinas at kausapin si Pacman hinggil sa fight contract.

Sakaling hindi maibenta sa pay per view ang Pacquiao-Horn fight sa Amerika, maaari itong ilagay sa premium cable ng libre.

Subalit pinag-aaralan ng Top Rank na sabayan ang Pacquiao-Horn showdown sa Australia ng sikat ding mga boksingero sa Amerika para maibenta pa rin sa pay per view.

By  Judith Larino  

Pinangunahan ni James Harden ang ika-8 sunud-sunod na panalo ng Houston Rockets.

Nakakamada ng apat na pung puntos si Harden.

Malaking tulong din ang labing-isang assist at sampung rebound nito upang magwagi ang Rockets kontra Toronto Raptors sa score na 129-122.

Sa ngayon, pinagsusumikapan ni Harden na masungkit ang most valuable player na parangal.

By: Avee Devierte

Posibleng si Australian boxer Jeff Horn ang unang makatutunggali ni 8-division World Champion Manny Pacquiao ngayong 2017.

Ayon sa ulat, nakatakdang magtungo sa Los Angeles ang co-promoter ni Horn na si Dean Lonergan para kausapin si Bob Arum na siyang kinatawan naman ni Pacquiao.

May kinalaman ito sa mechanics ng world boxing organization welterweight title bout na gaganapin sa Australia.

Sinasabing maisasapinal ang naturang pag-uusap bago matapos ang linggong ito.

Posible ang Pacquiao-Horn fight sa Abril 23.

By  Meann Tanbio

Nalusutan ng defending champions San Miguel Beermen ang kanilang sister team na Ginebra Gin Kings upang mapanatili ang pamamayagpag sa number 1 spot ng All-Filipino Cup ng PBA.

Tinalo ng Beermen ang Ginebra sa score na 72-70 sa kanilang paghaharap sa Araneta Coliseum, kahapon.

Naging susi sa panalo si Arwind Santos na kumamada ng “double-double” 10 points at 12 rebounds.

Nagkaroon ng tsansa ang Gin Kings na puwersahin ang overtime sa nalalabing 11 seconds subalit na-harang ni santos ang floater ni LA Tenorio ng Ginebra.

Hawak na ng SMB ang 7-1 record habang nasa bottom 4 o nasa 9th spot ang Ginebra sa kartadang 3-4.

By Drew Nacino

Hindi umubra ang kuryente ng Meralco Bolts sa lakas ng Global Port Batang Pier matapos maitala ang final score na 97-89.

Pinangunahan ni Terence Romeo ang panalo ng Batang Pier matapos makapagtala ng 27 points, limang rebounds at limang assists.

Umabot naman sa 13 points ang naging ambag ni KG Canaleta, 12 points at walong (8) rebounds ang ginawa ni Billy Mamaril at 12 points ang kontribusyon ni Mike Cortez.

Dahil sa naturang panalo, nasa 4-3 o apat na panalo at tatlong talo na ang hawak ng Global Port samantalang 2-5 standing naman ang Bolts.

By  Judith Larino