SPORTS

Ikinasiya ng Palasyo ang matagumpay na pagkakasungkit ng Pilipinas sa isa sa tatlong hosting rights ng Fiba World Cup para sa taong 2023.

Ayon kay Communications Secretary Martin Andanar, hudyat ang panalong ito ng bansa kasama ang Japan at Indonesia nang muling pag-usbong ng katanyagan ng Pilipinas sa mundo ng international sports.

Naniniwala rin si Andanar na makatutulong ito sa pagtaas ng turismo at foreign investments sa bansa.

Pinapurihan naman ni Andanar ang Samahang Basketbol ng Pilipinas o SBP na pinamumunuan ni Al Panlilio, at ng chairman emeritus nito na si Manny Pangilinan dahil sa ipinakitang pagsisikap makuha lamang ng bansa ang hosting ng 2023 Fiba World Cup.

Kinumpirma ni Senator Manny Pacquiao na sinimulan nilang kausapin ang kampo ni Conor Mcgregor para sa posibleng paghaharap nila oras na mag-break ang sesyon ng senado sa Abril.

Ayon kay Pacquiao, payag siyang makalaban si Mcgregor basta’t magkaroon lang ng maayos na negosasyon

Sa ngayon anya, hindi pa nasusundan ang inisyal nilang usapan tungkol sa posible nilang paghaharap sa ring.

Kung matuloy ang laban, sinabi ni Pacquiao na posible itong gawin sa Malaysia, Dubai o Macau.

Sinalakay ng mga pulis ang bahay ng dating NBA player na si Chris Bosh sa loob ng isang magarang subdivision sa Dallas, Texas.

Ayon sa mga otoridad, may nakita silang drug paraphernalia sa bahay ni Bosh na indikasyon umano ng may nagaganap doong transaksyon ng droga.

Wala si Bosh sa loob ng bahay nang salakayin ito ng mga pulis pero nadatnan doon ang kanyang nanay na si Frieda na iniimbestigahan na nagyon ng mga otoridad.

Umabot sa 13 NBA seasons ang nalahukan ni Chris Bosh bago ito binitawan ng kanyang koponan na Miami Heat nitong Hulyo dahil sa isyu ng kalusugan nito.

Napili ang Pilipinas, Japan at Indonesia bilang  host ng 2023 FIBA World Cup of Basketball.

Nakalaban ng tatlong Asian countries ang kapwa mga finalist na Argentina at Uruguay.

Ito ang unang pagkakataon na tatlong bansa ang napili ng FIBA na mag-host ng pina-prestihiyosong basketball event na ginaganap kada apat na taon.

Tatlumpu’t dalawang team ang lalahok sa naturang torneyo na gaganapin sa Philippine Arena sa Bulacan, Mall of Asia Arena sa Pasay at Smart-Araneta Coliseum sa Quezon City.

Ang four group stage games ay posibleng ganapin sa bansa  habang ang apat pang group stage game ay sa  Japan at Indonesia habang ang  knockout matches ay isasagawa sa Pilipinas.

Philippines, Japan and Indonesia will host the FIBA Basketball World Cup in 2023! #FIBAWC pic.twitter.com/OgteRbCdH8

— FIBA World Cup (@FIBAWC) December 9, 2017

Natapos sa labing – tatlo (13) ang winning streak ng Cleveland matapos pataubin ng Indiana sa kanilang bakuran sa score na 106 – 102.

Sa unang bahagi pa lamang ng laro, nagpaulan na ng mga puntos ang Pacers at hanggang sa ika – apat (4) na quarter ay naghabol ang Cavaliers kaya’t natalo ito.

Samantala, sinuwag ng Chicago Bulls ang Charlotte Hornets sa overtime sa score na 119 – 111 habang inilampaso naman ng Toronto Raptors ang Memphis Grizzlies sa score na 116 – 107.

Sa iba pang laro, hindi rin nakaporma sa Milwaukee Bucks ang Dallas Mavericks sa iskor na 109 – 102 habang pinadapa naman ng Sacramento Kings ang New Orleans Pelicans sa iskor na 116 – 109.

Nasungkit ng Houston Rockets ang ika – 8 sunod na panalo ng kanilang koponan sa nagpapatuloy na NBA Season.

Ito ay makaraang pulbusin ng Houston Rockets ang kalabang Utah Jazz sa iskor na 112 – 101.

Nanguna sa panalo ng Rockets si James Harden na tumipa ng dalawampu’t siyam (29) na puntos.

Samantala, hindi naman sumapat ang dalawampu’t anim (26) na puntos ni Donovan Mitchell para pangunahan ang Jazz na nakapagtala na ng dalawang sunod na pagkatalo.

Taob ang Charlotte Hornets sa kamay ng defending champion na Golden State Warriors.

Ito ay sa kabila ng pagkawala ni Stephen Curry na may iniindang injury at kinakailangang magpahinga sa loob ng dalawang linggo.

Gayunman, binuhat ni Kevin Durant ang Warriors na nakapagtala ng una niyang triple double ngayong NBA season.

Tumipa si Durant ng 35 points, 11 rebounds at 10 assists.

Tinapos ng Warriors ang laban kontra Hornets sa iskor na 101-87.

—-

Tuloy-tuloy ang pag-alagwa at pagpapakita ng puwersa ng Cleveland Cavaliers makaraang talunin nito ang Sacramento Kings sa iskor na 101-95.

Hawak ng Kings ang malaking kalamangan sa third quarter ngunit unti-unti itong tinapyasan ng Cavs hanggang mabaliktad ang sitwasyon.

Nanguna sa panalo ng Cavs si Lebron James na kinapos ng isang assists para makapagtala ng triple double matapos itong sumikwat ng 32 puntos, 11 rebounds at 9 assists.

Dahil dito, naitala ang ika-13 sunod na panalo ng Cavs.

—-

Tiyak na sasabak  muli sa laban sa Abril si dating 8 Division World Champion at Senador Manny Pacquiao.

Ayon kay Pacquiao, sa Enero maaaring malaman kung sino ang kanyang susunod na makasagupa.

Tikom naman ang Pambansang Kamao kung ang mixed martial arts superstar na si  Conor Mcgregor ang kanyang maaaring makaharap sa susunod na taon.

Magugunitang inihayag ni Pacman na nais niyang labanan muli si Jeff Horn sa kondisyong hindi sa Australia  dapat ganapin ang bakbakan.

Pinataob ng Oklahoma City Thunder ang Utah Jazz sa kanilang pagtutuos ngayong araw.

Dinomina ng Thunder ang laro at tinapos ang pag – asa ng Jazz sa iskor na 100 – 94.

Pinangunahan ni Russel Westbrook ang tagumpay ng Thunder na nakapagtala ng ikalawa niyang sunod na triple double.

Kumana ang reigning MVP ng 34 points, 13 rebounds at 14 assists.

Dahil sa panalo, hawak na ng Thunder ang 11 wins at 12 losses sa Western Conference standings.