SPORTS

Muling sumikwat ng panalo ang defending champions Golden State Warriors matapos ang kanilang pagkatalo sa Sacramento Kings, kamakailan.

Sa pagkakataong ito, nalusutan ng warriors ang Los Angeles Lakers sa score na 127-123 via overtime sa homecourt mismo ng L.A. sa Staples Center Arena, California.

 Pinangunahan ang Golden State ng big 3 o nina  Kevin Durant sa pamamagitan ng 29 points habang nag-ambag ng 28 points si Stephen Curry at 20 points si Klay Thompson.

Nagpakawala naman ng career high 32 points si Brandon Ingram  at kumamada ng 21 points ang Fil-Am na si  Jordan Clarkson para sa Lakers

Nakapako pa rin sa 2nd spot ng Western Conference Division ang Golden State sa kartadang  15-6.

Tuluyan nang tinuldukan ni Boxing Champion Floyd Mayweather ang anumang posiblidad na magbalik pa siya sa ring.

Binigyang – diin ni Mayweather na hindi na siya babalik sa boxing kahit gaano kalaki pa ang perang nakataya.

Inihayag ito ni Mayweather upang pabulaanan ang kumakalat na balita sa United Kingdom (UK) na interesado siyang makaharap si British Boxer Amir Khan.

Kumalat ang balita makaraang lumabas ang video ng boxing champ habang nag – eensayo ng boxing.

Tatangkain maiuwi ng Ateneo de Manila University (ADMU) ang kampeonato ng Men’s Basketball ng Season 80 ng UAAP sa paghaharap nila ng defending champion De La Salle University (DLSU) ngayong hapon sa big dome.

Lamang ang Blue Eagles ng isang panalo sa Best of Three Finals matapos nilang  makuha ang Game 1 sa iskor 76 – 70 noong Sabado.

Inaasahan naman na gagawin lahat ng Green Archers ang kanilang makakaya para mapahaba pa ang serye at dalhin ito sa Winner – Take – All Game 3.

Kung mananalo, makukuha ng Ateneo ang kanilang kampeonato makalipas ang limang taon.

Nasibak si David Fizdale bilang head coach ng Memphis Grizzlies

Ayon kay Grizzlies General Manager Chriz Wallace, napagdesisyunan nila na tanggalin si Fizdale para mabago ang performance ng koponan.

Ikinadismaya naman ito ng ilang NBA players.

Ilan sa mga ito ay sina Dwayne Wade na hindi matanggap at naghahanap ng tunay na dahilan.

Tinawag naman ni Cleveland Cavaliers star Lebron James na isang “fall guy” lamang si Fizdale ng tanggalin siya sa pwesto.

Nagsimula maging head coach si Fizdale taong 2016 ngunit bago pa ito naging assistant coach din siya noon ng Miami Heat.

—-

Pinutol na ng Detroit Pistons ang winning streak ng kanilang karibal sa Eastern Conference Division na Boston Celtics.

Pinataob ng Detroit ang Boston sa iskor na 113 – 108, sa homecourt mismo ng Celtics sa TD Garden Arena, Massachusetts.

Nagpakawala ng double – doubles 26 points at 22 rebounds si Andre Drummond para sa Pistons habang nag – ambag ng 23 points si Marcus Smart para sa Boston.

Sa kabila nito, nangunguna pa rin ang 17 – time NBA Champion Boston sa Eastern Conference Division sa kartadang 18 – 4 habang nasa 2nd spot ang Detroit sa standing na 13 – 6.

Mahigpit na ang paghahanda ng Gilas Pilipinas sa pagharap sa Australia para sa susunod na round ng FIBA World Cup 2019 Asian Qualifiers.

Tiniyak ito ni Gilas Coach Chot Reyes bagamat suntok aniya sa buwan kung matatalo nila ang tropa ng Australia na fourth runner up sa 2016 Rio de Janeiro Olympics.

Sinabi ni Reyes na kahit hindi maglaro ang mga Australian NBA players ay mahihirapan pa rin sila dahil sa presensya ng mga beteranong manlalaro na sina Chris Goulding, Brad Newley at Damian Martin.

Kasabay nito, ipinabatid ni Reyes ang pagsalba ni June Mar Fajardo sa Gilas para tuluyang talunin ang Chinese Taipei at makuha ang 2-0 na kalamangan sa Asian Qualifiers.

—-

Kapwa nagwagi ang Miami Heat at Minnesota timberwolves sa kani-kanilang laban sa pagpapatuloy ng 72nd season ng NBA.

Ipinalasap ng Heat sa Chicago Bulls ang kanilang ika-15 pagkatalo nang talunin nila ang koponan sa score na 100-93.

Pinangunahan ni Goran Dragic ang panalo ng Heat sa kanyang 24 points habang nagtala naman ng 9 rebounds si Hassan Whiteside.

Tinambakan naman ng Minnesota Timberwolves ang Phoenix Suns sa score na 110-108.

Si Karl Anthony Towns naman ang nanguna sa panalo ng timberwolves nang magtala ito ng 32 points samantalang 14 rebounds naman kay Taj Gibson.

—-

Nasungkit ng Golden State Warriors ang kanilang ikalawang panalo na wala si Kevin Durant na nagtamo ng ankle sprain

Kanina, sa kanilang homecourt, pinataob ng dubs ang New Orleans Pelicans sa score na 110-95

Pinangunahan ng splash brothers na sina Stephen Curry, 27 points at Klay Thompson, 24 points ang tagumpay ng kanilang koponan

Tila napunan naman nina Andre Iguodala at Zaza Pachulia ang pagkawala ni Durant sa ipinakitang opensa ng mga ito

Sunod na makakaharap ng warriors sa kanilang homecourt ang Sacramento Kings sa darating na Martes