SPORTS

Sisimulan na sa Enero 21 ng susunod na taon ang pagdinig ng korte sa kasong tax fraud na kinakaharap ni football star Cristiano Ronaldo.

Dahil sa naturang kaso, posibleng mag-plead guilty at masuspinde sa loob ng dalawang taon si Ronaldo.

Maaari namang mapababa ang hatol sa football star kapag nagbayad ito ng $ 22 million kasabay ng pagplead guilty nito.

Nakasaad sa batas ng spain na puwedeng bawasan ang hatol ng hanggang dalawang taon para sa mga first time offenders.

Matatandaang kinasuhan si Ronaldo ng apat na bilang ng tax fraud mula 2011 hanggang 2014 dahil sa pagtatago umano nito ng $16.5 million na kita mula sa ibang kumpanya.

Inanunsyo na ng Philippine SEA Games Organizing Committee ang mga video games na kabilang sa kauna-unahang e-sports tournament sa 2019 Southeast Asian Games kung saan hosut ang Pilipinas.

Binubuo ito ng mga video game na Dota 2, Mobile Legends: Bang Bang, Star Craft 2, Arena of Valor at ang console game na Tekken 7.

Napili ang mga nasabing laro dahil nanguna ang mga ito sa gaming platforms na masusi nilang sinuri.

Bahagi rin ng naging konsiderasyon ang pagkakaroon ng teamwork sa naturang mga laro.

Ito ang magiging unang pagkakataon na kabilang ang e-games sa medal events ng isang major sporting competition.

Kumpiyansa ang kampo ni fighting senator Manny Pacquiao na matatalo ng Pambansang Kamao si Adrien Broner sa Enero.

Ayon kay Assistant Coach Nonoy Neri, padalawa-dalawang suntok lang ang alam ni Broner at hindi rin aniya ito counter puncher.

Ito aniya ang nakikita nilang kahinaan ng American boxer na inaasahan namang magiging bentahe sa parte ni Pacquiao.

Gayunman, tiniyak ng Team Pacman na hindi sila magpapakampante ngunit tiwala silang magkakaroon ng knockout sa laban.

—-

Nasungkit ng Magnolia Hotshots ang kanilang kauna-unahang championship sa Philippine Basketball Association (PBA) makaraang mag-kampyon sa 2018 Governor’s Cup.

Pinataob ng Hotshots ang Alaska Aces sa score na 102-86 sa game 6 ng kanilang best of seven series sa finals sa Ynares Center, Antipolo City, Rizal, kagabi.

Pinangunahan ang Magnolia ng import na si Romeo Travis sa pamamagitan ng double-doubles 32 points at 17 rebounds habang kapwa nag-ambag ng 16 points sina Paul Lee at Ian Sangalang.

Kumamada rin ng double-doubles 26 points at 24 rebounds ang import na si Mike Travis para sa Alaska.

Taong 2014 nang mag-kampyon ang Magnolia noo’y San Mig Coffee MIXERs sa Governor’s Cup matapos talunin ang Rain or Shine Elasto Painters sa game five upang makumpleto ang grand slam sa ilalim ni Coach Tim Cone.

Bumida si Larry Nance Jr. sa road win ng Cleveland Cavaliers kontra Indiana Pacers tungo sa final score na 92-91.

Gumawa ng 15 points at career high 16 reounds si Nance na siyang tumapos sa tagumpay ng Indiana sa nakalipas na pitong laro.

Ang Pacers ay nagtala ng 39. 8 percent mula sa field maliban pa sa mahinang 4 of 22 sa 3 pointers.

Sa natitirang 9.5 seconds, bitbit pa ng Indiana ang abanteng 91-90

Mahigpit namang kumayod ang Cavs matapos mag mintis ng dalawang free throws ni Victor Oladipo samantalang kumana si Domantas Sabonis ng 17 points at Bojan Bogdanovic na may 14 points para sa Pacers.

Ang Cavs ay tutungo sa Charlotte sa Huwebes para sa second stop ng kanilang three game road trip samantalang biyaheng Toronto naman ang Pacers para sagupain ang Raptors.

Maglalaro para sa Philippine team ang dating NBA player na si Lamar Odom sa Dubai International Basketball Championship sa Pebrero ng susunod na taon.

Sa kanyang Instagram post, sinabi ni Odom na magandang preparasyon para sa paglahok niya sa 3 on 3 basketball competition ang paglahok niya sa Philippine team.

Ang pagbabalik niya sa court sa Pebrero ang hudyat ng muli niyang paglalaro sa professional basketball matapos maging bahagi ng New York Knicks noong 2014.

—-

Sasabak sa isang sparring session ngayong araw si Pambansang Kamao at Senador Manny “Pacman” Pacquaio sa Greek-Australian Professional Boxer na si George Kambosos.

Hindi naman nakasipot sa training kahapon ang fighting senator dahil sa katatapos lamang na selebrasyon ng kanyang ika-40 kaarawan.

Nauunawaan naman ng kanyang coach na si Buboy Fernandez ang hindi nito pagsipot at sinabing mas kinakailangan ni Pacman ang magpahinga para sa kanyang paparating pang mga pag-eensayo.

Inaasahan namang bibiyahe sa ika-22 ng Disyembre ang Team Pacquiao papuntang Maynila upang tumungo sa Amerika para sa papalapit na laban ng Pambansang Kamao.

—-

Nasungkit ng Toronto Raptors ang ika-apat nilang sunod na panalo makaraang pataubin ng koponan ang Charlotte Hornets.

Nilampaso ng Raptors ang Hornets sa iskor na 127 – 106.

Nanguna sa panalo ng Raptors si Kawhi Leonard na sumikwat ng dalawampu’t dalawang (22) puntos.

Ang Toronto ang unang NBA team na nakakuha ng apat na sunod na panalo ngayong season.

—-

Tila kumambiyo ang US boxing champion na si Floyd Mayweather Jr. sa naunang pasiya hinggil sa pagkakaroon ng rematch kontra kay Fighting Senator Manny Pacquiao.

Paliwanag ni Mayweather, malabo na aniyang magkaharap pa silang muli ni Pacquiao ngayong pumirma na ang fighting senator ng kontrata kay Al Haymon.

Dahil aniya rito, iisa na lamang ang kanilang manager ni Pacquiao.

Magugunitang noong mga nakaraang linggo lamang inanunsyo ni Mayweather na interesado siyang muling makaharap si Pacquiao.

Wagi ang San Miguel Beermen kontra TNT Ka-Tropa sa nagpapatuloy na 2018 PBA Governor’s Cup.

Pinataob ng SMB ang TNT sa score na 107-96 sa kanilang paghaharap sa Calasiao Sports Complex, sa Pangasinan, kahapon.

Nagpakawala ng double-doubles na 27 points at 10 rebounds si Kevin Murphy upang i-angat ang beermen habang nag-ambag ng 21 points ang kanyang teammate na si Christian Standhardinger.

Sumalaksak naman ng 26 points si Marcus Blakely para sa tnt subalit hindi ito naging sapat dahil sa matinding depensa ng San Miguel.

Dahil dito, umakyat sa 6th spot sa kartadang 4-4 ang SMB habang bumulusok sa 8th spot sa standing na  4-5 ang Ka-Tropa.