Naitala ng Milwauckee Bucks ang kanilang ikaanim na sunod na pagkapanalo nang talunin nila ang Dallas Mavericks sa kanilang paghaharap na nagtapos sa iskor na 122 – 107.
Bumida si Giannis Antetokounmpo ng Bucks na kumamada ng 29 na puntos at labing pitong rebounds.
Tumulong din sa kanilang pagkapanalo si Brook Lopez na tumipa naman ng 20 puntos.
Nakatakda namang sunod na makasagupa ng Milwaukee Bucks ang koponan ng Orlando Magic.
Pinataob ng Rain or Shine ang koponan ng Northport sa nagpapatuloy na PBA Philippine Cup.
Pinangunahan ni James Yap ang panalo ng Elasto Painters matapos itong tumipa ng 19 puntos.
Tinapos ng Elasto Painters ang laban sa iskor na 107-100.
Samantala, hindi naman sumapat ang 34 puntos ni Stanley Pringle para buhatin ang batang pier.
Si Golden State Warriors star Kevin Durant ang unang napili ni Lebron James para sa kanilang koponan para sa NBA All Stars.
Matapos nito ay idinagdag ni Lebron sa kanilang team ang dati niyang teammate sa Cleveland Cavaliers na Si Kyrie Irving at ang alas ng Toronto Raptors na si Kawhi Leonard.
Kukumpleto naman sa team Lebron para sa NBA All Star sina James Harden, Anthony Davis, Klay Thompson, Damian Lillard, Ben Simmons, Lamarcus Aldridge, Karl-Anthony Towns, Bradley Beal habang special pick naman si Dwyane Wade.
Samanatala, bubuo naman sa kabilang koponan sa pangunguna ng kanilang captain na si Giannis Antetokounmpo sina Stephen Curry, Joel Embiid, Paul George, Kemba Walker; reserves: Khris Middleton, Nikola Jokic, Russell Westbrook, Blake Griffin, D’angelo Russell, Nikola Vucevic, Kyle Lowry habang special pick naman si Dirk Nowitzki.
Handang handa na si Senador Manny Pacquiao na makipag tuos sa iba pang malalaking pangalan sa welterweight division sakaling hindi umubra si Floyd Mayweather, Jr.
Sinabi ni Pacman na interesado siyang makalaban sa ibabaw ng boxing ring ang mga kapwa kampeon sa 147 pound limit tulad nina Errol Spence, Jr., Mikey Garcia at Shawn Porter.
Kasama rin aniya sa kinukunsider niya ang wala pang talo na si Keith Thurman na may hawak ng WBA super welterweight title at una naring naghamon sa peoples champion.
Una nang inihayag ni Pacman na bukas siyang harapin ang sinumang mapipili ng kaniyang promoters.
Tinanggihan na ng kampo ni eight division world champion Manny Pacquiao ang hiling na rematch ni Australian Boxer Jeff Horn.
Ayon sa fighting senator, matapos siyang manalo kay Adrien Broner, nagkukumahog aniya ngayon ang kampo ni Horn para sa rematch.
Tila sinasamantala aniya ni Horn ang kanyang kasikatan.
Dahil dito, nanindigan si Pacquiao na iba na lang ang kalabanin lalo’t marami naman aniyang ibang nakapilang boksingero na maaari nitong makatunggali sa Mayo.
Pinatawan ng multa at suspensyon ng Nevada Athletic Commission si UFC star Conor McGregor at UFC Lightweight Champion Khabib Nurmagomedov.
Kaugnay ito sa nangyaring gulo sa loob at labas ng octagon matapos ang laban ng dalawa sa UFC 229.
Batay sa inilabas na desisyon ng komisyon, suspendido si Khabib ng siyam na buwan maliban pa sa multang limandaang libong dolyar.
Samantala, anim na buwan namang hindi makakalaban si McGregor at may multa namang limampung libong dolyar.
Epektibo ang suspensyon ng dalawa sa Oktubre 6.
Matatandaang matapos ang laban, sumugod si Khabib sa corner ni McGregor na pinagsimulan ng rambol.
Nag-tagumpay din ang Atlanta Hawks na matalo ang Los Angeles Clippers sa unang pagkakataon sa loob ng halos tatlong taon.
Gumawa ng 26 points ang rookie na si Trae Young at 22 points naman ang ambag ni John Collins para sumulong ang Hawks na natapos na ang limang dikit na pagkabigo sa Clippers mula nuong March 2016.
Ang nasabing panalo rin ay una ng Atlanta laban sa isang koponan mula sa pacific division ngayong season matapos malaglag sa unang limang laro.
Nagbigay naman ng ayuda sa Hawks si Alex Len na gumawa ng 19 points at siyam na rebounds mula sa bench.
Umiskor ng 30 points si Tobias Harris para sa Clippers na natukdukan na ang three game winning streak sa ikalawang gabi ng back to back.
Hindi nakatulong para manalo ang Atlanta ang ginawang 21 points at 9 assists ni Lou Williams gayundin ang 18 points ni Montrezl Harrell.
Posible nang sumabak sa paglalaro si Los Angeles Lakers star Lebron James matapos ang kanyang mahigit isang buwan na pamamahinga dahil sa injury.
Balik-ensayo na rin si Lebron matapos ang natamong groin injury noong Pasko sa laban nila kontra Golden State Warriors.
Umabot na sa labing-anim (16) ang nalaktawang laro ni Lebron.
Umaasa naman ang Lakers coach na si Luke Walton na makapaglaro na si Lebron sa lalong madaling panahon.
Napasakamay ni World Number One Novak Djokovic ang ika-labing limang grand slam title.
Ito ay matapos tanghaling kampeon si Djokovic sa ika-pitong Australian Open title nang ilampaso si Rafael Nadal.
Nakuha ng Serbian tennis star ang score na 6-3, 6-2, 6-3 para tuluyang talunin ang Spanish tennis star.
Dahil sa nasabing panalo, si Djokovic ay itinuturing na may pinakamaraming Australian Open na sa kabuuan ay nasa pito na.
Matagumpay na nasungkit ni Naomi Osaka ng Japan ang kampeonato sa women’s Australian Open Finals matapos gapihin sa three sets ang Czech player na si Petra Kvitova, 7-6, 5-7, 6-4.
Dahil dito, si Osaka na ang number 1 player sa nabanggit na tennis tournament.
Ika-limampu’t siyam na winning streak na ni Naomi ang nakuha nitong panalo sa first set.
Pinataob ni Osaka ang world’s no. 6 two-time Wimbledon champion na si Kvitova.
Dati namang kampeon ng us open ang 21-anyos na Japanese player at ang pinakabatang world champion mula noong 2010.
Mabilis na naging superstar si Osaka makaraang talunin din nito ang tennis legend ng Estados Unidos na si Serena Williams.
Words can’t describe this feeling. pic.twitter.com/MUMtR5stV1
— NaomiOsaka大坂なおみ (@Naomi_Osaka_) January 26, 2019