SPORTS

Pinataob ng Cleveland Cavaliers ang koponan ng Phoenix Suns sa iskor na 111-98.

Nanguna sa panalo ng Cavs si Kevin Love na sumikwat ng labing anim (16) na puntos.

Dahil sa panalo, nasungkit ng Cavs ang ika-walong sunod nilang panalo habang nasadlak naman sa ika-labing anim na sunod na pagkatalo ang Suns.

—-

Nakabalik na sa top ten ng tennis rankings si dating world number one Serena Williams.

Ito ang unang pagkakataon na nakapasok sa top ten si Serena magmula nang manganak ito.

Matatandaang bumagsak sa ika-491 ang ranking ni Williams magmula nang bumalik ito sa paglalaro noong Marso ng nakaraang taon matapos manganak.

Malaking bagay sa pagbabalik sa top 10 ni Williams ang pagpasok nito sa dalawang grandslam finals.

—-

Dinaig ni Joe Harris ng Brooklyn Nets si Stephen Curry ng Golden State Warriors sa NBA All-Star 3-point contest.

Nakapagtala ng dalawampu’t anim (26) na puntos si Harris habang pumangalawa lamang si Curry na may dalawampu’t apat (24) na puntos.

Pasok naman sa ikatlong puwesto si Buddy Hield na pambato ng Sacramento Kings.

Magugunitang taong 2015 nang masungkit ni Curry ang pagkapanalo sa NBA All-Star 3-point contest.

Samantala, ito naman ang unang beses na lumahok si Harris sa naturang paligsahan.

—-

Sinibak na ng NBA team New Orleans Pelicans ang kanilang general manager na si Dell Demps.

Kinumpirma mismo ito ni Pelicans owner Gayle Benson.

Ito’y matapos lumabas ang mga usapin hinggil sa pagbunyag umano ni Demps sa kahilingang paglipat ni Pelicans star Anthony Davis sa Los Angeles Lakers.

Ayon kay Benson, agad nilang sisimulan ang paghahanap sa papalit kay demps at pansamantala munang papalitan ito ng kanilang special adviser na si Danny Ferry.

Naitala ng Rain or Shine ang kanilang ikalimang sunod na panalo at ikapito naman sa kanilang kabuuang karera nang talunin nila ang Magnolia Hotshots sa iskor na 75 – 74 sa kanilang laban para sa 2019 PBA Philippine Cup.

Pinahiya ni James Yap ang kanyang dating koponan matapos kumamada ng 18 puntos para sa Rain or Shine.

Hawak na sana ng Magnolia ang kalamangan sa iskor na 74 – 72 ngunit matagumpay na nagawa ni Yap ang kanyang fake move kay Romel Dela Rosa at Raffy Reavis at naipasok ang bola kasama pa ang bonus free throw na siyang nagpanalo sa koponan.

Hinangaan naman ni Rain or Shine Coach Caloy Garcia ang ipinamalas na galing ni Yap.

Photo Credit: PBA 

Target ngayon ng Rain or Shine Elasto Painters na masungkit ang kanilang ika-pitong panalo sa kanilang paghaharap laban sa Magnolia Hotshots sa pagpapatuloy ng PBA Philippine Cup ngayong araw sa Araneta Coliseum.

Ayon kay Rain or Shine Coach Caloy Garcia, kailangang maging determinado at hindi dapat magpakampante ang kanilang koponan lalo na’t kung nais nilang manatili sa ibabaw.

Hindi rin dapat nila anya balewalain ang Hotshots kahit wala pa itong naitatalang panalo ngayong season.

—-

Tuloy na tuloy na ang paglipat ni Jeremy Lin sa koponan ng Toronto Raptors.

Ito ay matapos gawing pinal ang buy out ni Lin sa Atlanta Hawks.

Si Lin ay mula sa ika-labindalawang ranked team sa eastern conference at mapupunta sa second ranked team.

Makakasama naman ni Lin sa Raptors ang mga magagaling ding manlalaro gaya nina Kyle Lowry, Kawhi Leonard at Marc Gasol.

—-

Nalasap ng Phoenix Fuel Masters ang kanilang unang pagkatalo sa 2019 PBA Philippine Cup sa kamay ng Rain or Shine Elasto Painters.

Nalusutan ng Rain or Shine ang Phoenix sa score na 98-94 sa kanilang paghaharap sa Araneta Coliseum.

Nagpakawala ng 16 points si Beau Belga para sa Elasto Painters habang nag-ambag ng 27 points si Jason Perskins para sa Fuel Masters.

Hawak na ng Rain or Shine ang kartadang 6-1 at nasilat ang top spot mula sa Phoenix na may standing namang 5-1.

—-

Nadagdagan pa ang bilang ng pagkatalo ng koponang New York Knicks sa NBA.

Ito’y makaraang maitala ng Knicks ang ika-labing anim nilang pagkatalo sa kamay ng Toronto Raptors sa iskor na 104-99.

Umangat ang solid performance ni Marc Gasol sa nasabing laban kung saan, nakapag-buslo ito ng pitong puntos at anim na rebounds.

Samantala, dalawampu’t dalawang puntos naman ang naiambag ni Kyle Lowry habang labing limang puntos naman ang naibuslo ni Serge Ibaka.