SPORTS

Nakakuha ng silver medal si Filipino pole vaulter EJ Obiena sa kakatapos lamang na 2026 Meeting Madrid sa España kaninang madaling araw, oras sa Pilipinas.

Nakatalon si Obiena sa 5.85-meter level sa naturang torneo, na nagsilbi ring best performance niya sa 2026 pole vaulting season.

Nasungkit naman ni Bo Kanda Lita Baehre ng Germany ang ginto sa nasabing palaro, habang si Pedro Buaro ng Portugal ang nag-bronze.

Sa kasalukuyan, world number 14 si Obiena sa pinakabagong men’s pole vault world rankings. | Sa panulat ni Anjo Riñon

Matapos ang panalo ng Argentina kontra England sa 2026 FIFA World Cup semifinals, posibleng parusahan ang Argentinian football team dahil sa ipinalabas nitong political statement kaugnay ng Falklands War noong dekada 80.

Nabatid na nagpalabas ng banner ang ilang player ng Argentina na may katagang “Las Malvinas son Argentinas,” o “Sa Argentina ang Malvinas,” na tawag naman ng naturang bansa sa Falkland Islands, na kasalukuyang hawak ng United Kingdom, kung saan kabilang ang England.

Una nang sinabi ni Argentina Head Coach Lionel Scaloni na nais niyang iwasang ungkatin ang isyu ng Falklands matapos tawagin ni Argentinian Vice President Victoria Villarruel na mga “pirata” ang Inglatera bago ang semifinals game.

Wala pang pahayag ang FIFA o ang International Football Association Board kung iimbestigahan ng mga ito ang insidente.

Nakatakda namang magharap ang Argentina at España sa FIFA World Cup finals sa Lunes, 3:00 ng umaga, oras sa Pilipinas. | Sa panulat ni Anjo Riñon

Kinapos ang Alas Pilipinas laban sa Cambodia sa pagbubukas ng Week One ng Southeast Asian Volleyball Cup Men’s Division.

Sa kabila ng matinding puwersa ng Alas, nabigo ang koponan sa limang set na may scores na 23-25, 30-28, 20-25, 25-22, at 8-15.

Ayon kay Alas Pilipinas libero Josh Ybañez, adrenaline at painkillers ang tumulong sa kanya upang makapaglaro pa sa kabila ng mild ankle sprain na kanyang iniinda.

Bagama’t yumuko ang Alas Pilipinas sa Cambodia, pursigidong inihayag ng Alas libero na naghahanda na silang makabawi sa mga susunod na laro sa nasabing torneo.

Sunod na sasagupain ng pambansang koponan bukas, July 17, ang defending SEA V League second leg champion na Indonesia.

Siyam na batang atleta ang ipapadala ng Pilipinas para sa Summer Youth Olympic Games ngayong taon.

Pinangalanan ni Philippine Olympic Committee President Abraham Tolentino ang mga naturang atleta na sasabak sa mga sport tulad ng gymnastics, track and field, swimming, at iba pang larangan.

Umaasa si Tolentino na makaka-podium finish ang Pilipinas ngayong taon, tulad nina Luis Gabriel Moreno noong 2014 at Christian Tio noong 2018.

Magaganap ang 2026 Summer Youth Olympics sa Senegal mula Oktubre 31 hanggang Nobyembre 13. | Sa panulat ni Anjo Riñon

Magbabalik-bansa na si Filipina tennis star Alex Eala matapos ang kanyang makasaysayang Grand Slam stint sa Wimbledon kamakailan.

Ayon sa team ni Eala, magkakaroon ng isang fan meet na pinamagatang “Home Court: The Alex Eala Fan Meet Experience,” na magaganap sa Glorietta Activity Center sa Makati City sa darating na Miyerkules, Hulyo 15.

Magsisimula ang registration sa naturang event ng 04:00 PM, habang magsisimula naman ang programa sa ganap na 06:00 PM.

Magsisilbi rin itong panahon ng pahinga para kay Eala, na nakatakdang muling maglaro sa US Open sa darating na Agosto 27.

Bago nito, sasali rin siya sa Mubadala DC Open sa Hulyo 27 at sa National Bank Open sa Agosto 2. | Sa panulat ni Anjo Riñon

Nanawagan sa publiko ang Sparkle talent at athletic content creator na si Aira Lopez upang suportahan ang Cebu-based marathon athlete na si Artjoy Torregosa sa kanyang pagsabak sa Asian Games sa Japan sa darating na Setyembre.

Ayon kay Lopez, panahon na para lalo pang bigyang-pansin ang mga pambansang atleta na nagbibigay ng karangalan sa Pilipinas.

Nabatid na si Torregosa ang pinakamabilis na indibidwal sa women’s national marathon, na may record time na 2 hours, 33 minutes, 54 seconds.

Dagdag pa ni Lopez, wala pang nakukuhang major sponsor si Torregosa, kaya dapat lang itong tulungan at suportahan.

Aminado ang triathlete-vlogger na isa lamang siyang hamak na amateur na may mga brand na naniniwala at sumusuporta sa kanya.

Gayunman, umaasa siyang darating ang araw na hindi na mamomroblema ang mga pambatong atleta ng bansa kung saan makakakuha ng pondo para sa kagamitan, pagsasanay, at panggastos ng mga ito, lalo na kung lalaban ang mga ito sa ibang bansa.

Samantala, na-feature rin si Torregosa sa vlog ni Lopez, kung saan magkasama silang nag-warmup at tumakbo sa loob ng Cebu City Sports Center habang kinakausap ang isa’t isa. | Sa panulat ni Anjo Riñon

Natapos na ang Wimbledon Dream Run ni Filipino Tennis Star Alex Eala matapos siyang talunin ni Jasmine Paolini ng Italia sa round 4 ng naturang torneo.

Umabot pa sa ikatlong set ang naturang laro, ngunit nabigong mapatumba ni Eala si Paolini, na ikinatalo niya sa score na 4-6, 6-4, 3-6.

Gayunman, maituturing pa ring panalo para sa mga Pilipinong tennis fans ang naturang grand slam stint ni Eala matapos niyang talunin ang defending champion nito na si IGA Swiatek sa round 3.

Nakatakdang harapin ni Paolini si Marta Kostyuk ng Ukraine sa quarterfinals.

Inaasahan namang mapapabilang si Eala sa lineup ng US Open sa darating na Agosto, na magsisilbi ring pinakahuling Grand Slam Tournament ng 2026 tennis season.

Samantala, dinagsa kagabi ang Philsports Arena sa Pasig City upang suportahan si Eala sa naturang match matapos ianunsyo ng philippine sports commission ang isang libreng watch party.

Sa panayam ng DWIZ sa ilan sa mga nanood, nalulungkot sila dahil hindi naka-abante si Eala sa quarterfinals ng Wimbledon; gayunman, masaya silang suportahan ang pinay tennis player hanggang dulo.

Ipinalabas din ang naging laro ng Gilas Pilipinas kontra Australia sa FIBA World Cup asian qualifier, kung saan natalo rin ang pambansang koponan sa score na 49-92. | Sa panulat ni Anjo Riñon

Lusot na sa Round of Sixteen ng Wimbledon si Filipino tennis sensation Alex Eala matapos magwagi laban sa defending champion na si Iga Swiatek.

Sa score na seven-six at six-two, napatalsik ng bente-uno anyos na Filipina ang world number three player mula Poland.

Sunod na makakalaban ni Eala si world number seventeen Jasmine Paolini.

Si Eala rin ang kauna-unahang Filipino na nakaabot sa ikaapat na round ng Grand Slam.

Muling namayagpag ang galing ng atletang Pilipino sa larangan ng tennis at pole vaulting.

Muling namayagpag si Filipino tennis sensation Alex Eala matapos niyang talunin si Maya Joint sa Round 2 ng Wimbledon sa score na 3-6, 6-2, 6-0.

Na-eliminate naman si Eala at ang ka-tandem niyang si Nicola Bartůňková ng Czech Republic sa doubles category ng naturang Grand Slam tournament.

Gayunman, aabante si Eala sa Round 3 ng Wimbledon singles bukas, kung saan makakalaban niya si world number 3 Iga Swiatek.

Samantala, nasungkit ni EJ Obiena ang gintong medalya matapos malampasan ang 5.75-meter mark sa Raiffeisen Open sa Eisenstadt, Austria.

Nabatid na naitala rin ni Obiena sa kanyang winning jump ang bagong stadium record sa naturang kompetisyon. | Sa panulat ni Anjo Riñon

Umabante na sa ikalawang round ng Wimbledon si Filipina tennis sensation Alex Eala matapos niyang talunin si Renata Zarazúa ng Mexico sa score na 6-1, 6-2.

Ito ang kauna-unahang Grand Slam win sa professional career ni Eala, at inaasahang makakalaban niya sa second round mamayang gabi, oras sa Pilipinas, si Maya Joint ng Australia, na tumalo naman kay dating world number 1 Serena Williams.

Bukod kay Eala, tatlo pang Southeast Asian players ang magpapatuloy sa Round 2 ng Wimbledon.

Tinalo ni Lanlana Tararudee ng Thailand si Lilli Tagger, habang nanaig ang kapwa Thai player na si Mananchaya Sawangkaew kontra Maja Chwalińska ng Poland.

Samantala, wagi rin si Janice Tjen ng Indonesia laban kay Filipino-Canadian Leylah Fernandez. | Sa panulat ni Anjo Riñon