SPORTS

Pinag-aaralan ng Pilipinas na magkaroon ng hindi lamang isa kundi tatlo o apat na filipino weightlifters na magiging kwalipikado sa Paris Olympics sa susunod na taon.

Maliban kay Tokyo Games Gold medalist Hidilyn Diaz, kabilang sa apat sina Elreen Ando, Vanessa Sarno at Kristel Macrohon.

Si Ando, Sarno, at Macrohon ay hindi nakakuha ng medalya ngunit nakakuha ng olympic qualifying points sa pamamagitan ng pakikipaglaban sa Bogota.

Nangako naman ang dating PSC Commissioner na si Monico Puentevella na iuuwi muli ng Pilipinas ang makasaysayang tagumpay ni Diaz-Naranjo sa Tokyo.

Nagwagi sa NBA regular season kagabi ang Denver Nuggets kontra Boston Celtics sa iskor na 123-111 na ginanap sa Ball Arena, Denver Colorado.

Tinambakan ng Nuggets ang Celtics sa una at ikatlong quarter habang halos magdikit naman ang iskor ng dalawang team sa pangalawa at panghuling quarter.

Nanguna sa koponan si Nikola Jokic na nakapagtala ng 30 points, 12 rebounds at 12 assists dahilan ng kanilang pakapanalo.

Abangan naman bukas ang susunod na laban ng Nuggets, kung saan kanilang makakaharap ang Minnesota Timberwolves, alas-9 ng umaga, oras sa Pilipinas.

Nakatakda nang mag-retiro si Azkals midfielder Stephan Schrock.

Ipinabatid ni Schrock na tatapusin niya lamang ang laro ng Azkals kontra Indonesia sa Group A ng 2022 AFF Mitsubishi Electric Cup ngayong araw na ito.

2011 nang maging bahagi ng Azkals si Schrock na inalala ang kanyang mga naging sakripisyo kabilang ang pagkawalay sa kanyang pamilya.

Sasabak ngayong taon si Pambansang Kamao Manny Pacquiao sa Mixed Martial Arts Promotion na Rizin Fighting Federation sa saitama super arena sa tokyo, japan.

Nabatid na nakipagkasundo si Pacquiao sa isang Japanese businessman at mixed martial arts promoter na kinilalang si Nobuyuki Sakakibara.

Matatandaan ding nagwagi ang Boxing Champ, matapos patumbahin si Korean Mixed Martial Artist at YouTuber na si DK Yoo sa isang six-round exhibition na ginanap kamakailan sa Kintex Goyang, South Korea.

Sa ngayon, hindi pa malinaw kung isang official match o exhibition fight ang magiging laban ni Pacman kay Nobuyuki.

Naiuwi ng Los Angeles Lakers ang panalo kontra Atlanta Hawks sa score na 130-121.

Nasungkit ng koponan ang panalo matapos makapagdala ng 47 points si NBA Star Lebron James kasabay pa ng kanyang 38th birthday.

Ayon sa ulat, ito ang kanyang 40 points efforts ngayong season, ikalawa na makamit sa isang birthday contest at ang ika-70th 40-point performance ng kanyang 20 season NBA career.

Si James ang isa sa apat na manlalaro sa kasaysayan ng NBA na nakapuntos ng 45 points sa edad na 38 years old o higit pa kasama sina Michael Jordan, Kareem Abdul Jabbar at Jamal Crawford.

Kumpiyansa si Ginebra shooting guard Scottie Thompson na makuha ang “Best Player of the Conference Award” matapos makapasok sa PBA Commissioner’s Cup Finals ang kanyang team.

Hinahabol ni Thompson ang nangungunang si Northport player Robert Bolick para sa individual award sa conference.

Nakapagtala si Bolick ng 33.9 Statistical Points (SPS) habang 32.1 SPS si Thompson kaya’t ito na ang tamang pagkakaon niya para ipakita na karapat-dapat siya sa award.

Samantala, kasalukuyan nasa Top spot si Ginebra resident import Justine Brownlee para sa Best Import Award na taglay nito ang 52.7 SPS. —sa panulat ni Jenn Patrolla

Sinuspinde ng National Basketball Association (NBA)  ang 11  manlalaro nito matapos ang gulo sa pagitan ng Detroit Pistons at Orlando Magic.

Kabilang sa mga pinatawan ng suspensiyon ay sina Pistons guard Killian Hayes para sa tatlong laro at si Orlando Magic center Moritz Wagner sa 2 laro.

Si Pistons guard Hamidou Diallo naman ang napatawan ng ban sa isang laro kasama ang walo pang manlalaro ng Magic.

Ang one-game suspensions na inisyu sa 8 Magic players ay dahil sa pag-alis sa bench area sa gitna ng laban.

“World had Lost a great sporting icon and football had lost its King”

Ito ang sinabi ni International Olympic Committee(IOC) President Thomas Bach matapos pumanaw si Brazil Legend Edson Arantes Do Nascimento o mas kilala bilang Pele.

Matatandaang na-admit si Pele sa isang ospital sa Sao Paulo noong November dahil sa respiratory infection at komplikasyon na may kaugnayan sa colon cancer.

Nabatid na si Pele ay nanalo ng tatlong world cups at pinangalanang athlete of the century ng IOC noong 1999.

Pinataob ng Bay Area Dragons ang Ginebra San Miguel sa game 2 ng PBA Commissioner’s Cup finals sa iskor na 99-82 na ginanap sa Araneta Coliseum kagabi.

Nakuha ng Bay Area ang panalo matapos makuha ang 17 puntos sa halftime kung saan, nanguna sa koponan ang import na si Andrew Nicholson.

Nakuha ni Nicholson ang double-double matapos maitala ang 30 points at 15 rebounds habang naka-ambag din ng 25 points sa Dragons si Songwei Zhu.

Matatandaang unang pinataob ng Gin Kings ang Dragons, sa game 1 ng best-of-seven series noong pasko sa iskor na 96-81 dahilan para magpakita ng galing ang koponan sa game 2 ng PBA finals.

Abangan naman sa January 4 ang muling paghaharap ng dalawang team sa game 3 na gaganapin sa Mall of Asia Arena sa Pasay City.

Tinaguriang “King of Asia” ang bagong international boxing federation Asia Super Featherweight Champion at undefeated Pinoy boxer na si Charly Suarez.

Ito ay matapos na talunin ang Indonesian boxer na si Defry Palulu sa naganap na sagupaan sa Vietnam.

Nabatid na natapos ang laban sa pamamagitan ng technical knockout sa pagsisimula ng 3rd round kung saan itinigil ng referee ang laban dahil sa tinamong eye injury ni Palulu.

Samantala, ikinagalak naman ni Suarez ang natamong titulo sa larangan ng boksing.