RONDA PROBINSYA

Isa ang patay habang sugatan naman ang anim na magsasaka matapos tamaan ng kidlat sa Sitio Sta. Rita, Brgy. Nibaliw, Mabini, Pangasinan.

Kinilala ang nasawing biktima na si Marcelo Flores, 40-anyos habang kinilala naman ang mga sugatan na sina Marvin Mendoza, 37-anyos; Richard Flores, 26-anyos; Eduardo Dizon Jr., 21-anyos; Edmond Dizon, 19-anyos; Sarah Jane Navarro, 26-anyos; at live-in partner nito na si Archie Ansus, 29-anyos.

Sa nakuhang impormasyon ng mga otoridad, nagtatanim ng palay ang mga magsasaka pagkatapos ay nagpahinga para sa tanghalian nang bumuhos ang malakas na ulan na may kasamang kulog at kidlat.

Dito na tinamaan ang mga biktima dahilan para agad silang isugod sa Western Pangasinan District Hospital sa Alaminos City.

Idineklarang dead-on-arrival si Flores habang patuloy pang nagpapagaling ang iba pa nitong mga kasama.

Natagpuang wala nang buhay ang isang ginang matapos i-hostage at chopchopin ng sariling mister sa loob ng isang bakery shop sa Purok 2, Zone 8, Cupang, Antipolo City.

Kinilala ang biktima na si Vanessa Valiente habang kinilala naman ang kaniyang mister na si Jessie Valiente na kusang-loob na sumuko sa mga otoridad.

Sa imbestigasyon ng mga otoridad, nagkaroon ng mainit na pagtatalo ang mag-asawa nang sitahin ng mister ang ginang dahil madalas itong nakikitang may ka-text.

Dito na nagselos ang suspek na si Jessie at ikinulong si Vanessa kasama ang tatlong taong gulang nilang anak.

Agad na rumesponde ang mga pulis pero hindi na nila naabutang buhay si Vanessa na tadtad ng saksak sa katawan habang ligtas at hindi naman sinaktan ng suspek ang kanilang anak.

Hawak na ngayon ng mga otoridad ang suspek na sasampahan ng kasong pagpatay sa piskalya.

Isa ang patay habang isa pa ang sugatan matapos magliyab ang sinasakyang kotse matapos sumalpok sa isang concrete barrier sa Echague, Isabela.

Kinilala ang nasawi na si Wilson Ballad, habang isinugod naman sa ospital ang driver na si Rogelio Ayudan, 43-anyos.

Sa imbestigasyon ng mga tauhan ng BFP-Echague, tinatahak ng mga biktima ang bahagi ng National Highway sa Brgy. Castillo nang mag-overtake ito sa sinusundang sasakyan.

Dito na nawalan ng kontrol ang kanilang sinasakyan at sumalpok sa concrete barrier hanggang sa dumiretso sa palayan bago lumiyab.

Ayon kay Senior Fire Officer Leomar Parralag, Intelligence and Investigation Chief ng BFP sa lugar, agad silang rumesponde sa lugar para apulahin ang apoy.

Sa ngayon, patuloy pang iniimbestigahan ng mga otoridad ang dahilan ng pagliyab ng nasabing sasakyan.

Aabot sa P10.2-M ang halaga ng shabu na nasamsam ng mga otoridad sa tatlong miyembro ng isang sindikato sa isang drug den sa Maguing, Lanao del Sur.

Kinilala ang mga suspek na sina Faisa Hadji Raof alias “Madam”; Amersab Ebra Macabato; Haji Raifa Haji Rakim Haji Rasul Alias Haji Raof na inaresto sa tulong ng pinagsanib na mga tauhan ng Philippine Drug Enforcement Agency-BARMM, Lanao del Sur Provicial Police Office-Drug Enfrocement Unit, Maguing Municipal Police Station, at 55th Infantry Batallion.

Ayon kay OIC PNP Lt.Gen. Vicente Danao Jr., ang mga inaresto ay napag-alamang mga miyembro ng Macabato Drug Group kung saan, nakuha ang nasa isang libo at limandaang gramo ng shabu.

Nasa kustodiya na ng PDEA BARMM ang mga suspek at sasampahan ng kasong paglabag sa Article 2, Sections 5 and 6 of Republic Act 9165.