RONDA PROBINSYA

Malamig na bangkay na nang matagpuan ang isang 18-anyos na lalaking may diperensya sa pag-iisip sa Brgy. Can-asujan, Carcar City, Cebu.

Kinilala ni Carcar chief of police Lt. Colonel Ardiolito Cabagnot ang biktima na si Renante Rosales, nakatira sa nasabing lugar.

Sa inisyal na pagsisiyasat, natagpuan ng dalawang residente ang bangkay ng biktima na tadtad ng saksak at laslas ang leeg na halos humiwalay na sa kanyang katawan.

Nabatid na dahil sa kanyang mental disability, mula pa noong bata pa ang biktima ay nasa custody na ng Department of Social Welfare and Development (DSWD) sa Mandaue City, ngunit inilipat ito sa pangangalaga ng isang tiyahin sa Carcar.

Patuloy ang malalimang imbestigasyon ng awtoridad upang matukoy ang salarin at ang motibo sa pagpatay sa biktima.—mula sa ulat ni Gilbert Perdez (Patrol 13)

Tinanggalan na ng lisensya ng Land Transportation Office (LTO) ang tatlong motorcycle rider sa Biñan City, Laguna na nag-viral sa isang video sa social media.

Ayon kay Clarence Guinto, director ng LTO, guilty sa kasong reckless driving, hindi paggamit ng helmet, paggamit ng hindi otorisadong plaka at paglalagay ng illegal accessories ang tatlo.

Unang kumalat ang video sa facebook kung saan nakitang pagewang-gewang na nagmamaneho ang tatlo nang walang suot na helmet sakay ng kanilang big bike na may blinkers at sirena pa.

Bukod sa kanselasyon ng lisensya, pinagmumulta rin ang tatlo ng tig-13,500.

Patay ang isang nurse matapos mahulog sa zipline ng isang resort sa Tabuk, Kalinga.

Kinilala ng Tabuk City Police ang nasawi na si Paul Herbert Gaayon, 39-anyos at residente ng Purok 5, Bulanao Centro, Tabuk City.

Sa imbestigasyon, dalawang beses sumakay ng zipline si Gaayon noong linggo.

Ligtas naman nitong natapos ang una pero sa ikalawa ay nakabitiw na ito.

Nasalo pa ng safety net si Gaayon pero nabutas at napunit ito dahilan para tuluyan siyang bumagsak sa lupa.

Naidala pa siya sa ospital pero idineklarang dead-on-arrival ng umasikasong doktor.

Patuloy naman ang imbestigasyon ng awtoridad sa insidente.

Iniimbestigahan na ng Binalbagan Infirmary sa Negros Occidental ang pagkasawi ng isang sanggol matapos mapugutan habang iniluluwal ng kanyang ina.

Ayon kay Dr. Jocelyn Rapista, chief medical office ng Binalbagan Infirmary, naiintindihan nila ang epektong idinulot ng nangyari sa pamilya ng sanggol, lalo sa ina nitong si Nereza Tarig.

Taos-puso namang humihingi ng paumanhin ang nasabing pagamutan sa pamilya ng biktima.

Hunyo 8 naganap ang insidente nang makaramdam ng pananakit ng tiyan ang 25-anyos na ina ng sanggol.

Gayunman, nang sinuri ang sanggol, natuklasang suhe ito kaya nagdesisyon ang doktor na puwersahan itong ilabas nang hindi kumokonsulta sa ibang doktor.

Nang lumabas ang sanggol, laking gulat na lamang nila na wala ang ulo nito, na napugot at naiwan sa sinapupunan ni Nereza.

Sa ngayon, inaantabayan na ang opisyal na pahayag ng pamunuan ng infirmary hinggil sa insidente.