RONDA PROBINSYA

Binigyan ng palugit ng Department of the Interior and Local Government (DILG) ang Provincial Government ng Cebu ng hanggang linggo, June 19 para baguhin ang ordinansa kaugnay sa opsyonal ng pagsusuot ng face mask sa labas ng bahay.

Ayon kay DILG Secretary Eduardo Año, nais ng departamento na malutas ang isyu na nakapaloob sa Executive Order no. 16.

Matatandaang, nitong Martes ay nagpasa ang Cebu Provincial Board ng ordinansa ukol sa ”optional wearing ng face masks” sa naturang lalawigan.

Hindi naman nito binanggit kung ano ang magiging kaparusahan na naghihintay sa provincial government kung paninindigan nito ang ordinansa.

Gayunman, sinabi ni Año, na maging ang pamahalaan ay hindi kinikilala ang naturang ordinansa.

Mananatili naman aniyang Mandatory pa rin ang pagsusuot ng face mask sa mga public spaces.

Nagdulot ng baha sa ilang parte ng Obando, Bulacan at Valenzuela City ang bumigay at nasirang dike at flood gate sa lugar.

Ayon kay Obando Municipal Engineer Elpidio Jesus Avena, dahil sa high tide ay bumigay ang ilalim ng Dam kasabay ng pagkabitin ng ravel concrete revetment.

Habang hinihintay ang pondo muna sa gobyerno, pansamantalang naglagay ng steel barrier ang Obando LGU at Valenzuela para maharang ang tubig na nagmumula sa Manila Bay.

Matibay naman ay malalim ang pagkakabaon ng inilagay nilang steel barrier kaya maiiwasan ang pagbuka sa ilalim nito.

Sa ngayon, nagdulot na ng malaking perwisyo sa mga residente ng Bulacan at Valenzuela ang nasirang dike lalo na sa mga bumibiyahe.

Idineklara ng Malacañang na special Non-working holiday ang Hunyo a-20 sa Dagupan City.

Para ito sa ika-75 Founding Anniversary ng lungsod.

Sa Executive Order no. 1398 ni Pangulong Rodrigo Duterte na nilagdaan ni Executive Secretary Salvador Medialdea, bibigyang panahon ang mga Dagupeños na mag-celebrate sa pamamagitan ng iba’t ibang programa.

Noong Hunyo a-20 1947 naging lungsod ang Dagupan sa bisa ng Republic Act 170 na inakda noon ni House Speaker Eugenio Perez na nilagdaan bilang batas ni dating Pangulong Manuel Roxas .

Kilala ang Dagupan City bilang tahanan ng pinakamasarap na bangus sa mundo.

Aabot sa P27-M halaga ng shabu ang nasabat ng Philippine National Police (PNP) sa buy-bust operation sa Lapu-Lapu City, Cebu.

Kinilala ng PNP ang naarestong suspek na si Eleonor Quistadio, 43- anyos at isang high-value target.

Narekober kay Quistadio ang apat na kilo ng shabu sa isinagawang operasyon sa Barangay Pajo.

Ipinadala na sa Regional Forensic Unit sa Central Visayas ang iligal na droga habang nahaharap sa kasong paglabag sa Republic Act 9165 o Comprehensive Dangerous Drugs Act of 2002 ang suspek.