RONDA PROBINSYA

Isang senior citizen ang patay matapos ma-hit-and-run ng isa umanong abogado sa Bacolod City, Negros Occidental.

Kinilala ang biktimang si Aquilino Cambelisa Jr., 63-anyos, residente ng barangay Mandalagan.

Naganap ang insidente sa La Salle Avenue, barangay Villamonte, noong huwebes, Hunyo 16.

Wala umanong nakuhang karagdagang detalye kung paano naganap ang insidente dahil agad dinala ng mga rescuer ang biktima sa Corazon Locsin Montelibano memorial regional hospital.

Ayon kay major Ritchie Gohee, hepe ng Bacolod City police – Station 4, agad umalis ang driver ng Sedan na naka-hit-and-run kay Cambelisa nang isakay ito sa ambulansya.

Pero nitong Sabado ay isang kinatawan ng Sedan driver ang nakipag-usap sa pulisya at nagpahayag ng kahandaang makipag-kita sa pamilya ng biktima ngayong araw.

Ipauubaya na anya nila sa pamilya ni Cambelisa ang desisyon kung magsasampa ng kaso o makikipag-areglo sa driver.

Tinanggal na ng Bureau of Fisheries and Aquatic Resources ang red tide warning sa baybayin ng Bolinao, Pangasinan.

Dahil dito, maaari nang maghango at magbenta ng lamang-dagat ang mga residente nang walang anumang banta sa kanilang kalusugan.

Gayunman, may limang baybayin pa sa bansa ang nananatiling positibo sa red tide.

Kabilang dito ang Dauis at Tagbiliran City sa Bohol; Dumanguillas Bay sa Zamboanga del Sur; coastal water ng Milagros sa Masbate; Litalit Bay; San Benito; Surigao del Norte; at Lianga Bay sa Surigao del Sur.

Kaya paalala ng BFAR sa mga residente sa mga nabanggit na lugar na iwasan munang maghango at kumain ng lamang-dagat.

PATAY ang dalawang miyembro ng isang armadong grupo matapos umanong manlaban sa mga awtoridad nang silbihan ng warrant of arrest sa Barangay Bugasan Sur sa Matanog, Maguindanao province.

Kinilala ni Marine Battalion Landing Team-5 commander Maj. Melchor Gonzaludo ang mga napatay na suspek na sina Norodin Guimad at Puti Sumanday.

Sisilbihan sana ng warrant of arrest si Guimad dahil sa mga kasong murder at frustrated murder na kinakaharap nito.

Ngunit sa halip na sumuko ay nagpaputok umano si Guimad kaya’t napilitang gumanti ang mga awtoridad na nagresulta sa pagkamatay ng dalawa.

Narekober sa pinangyarihan ng engkwentro ang isang M-16 Armalite rifle, isang caliber .45 pistol, bandolier, ammunition, drug paraphernalia, at iba pang ebidensya.

Aabot lamang sa limang volcanic earthquakes ang naitala sa paligid ng Bulkang Bulusan sa nakalipas na 24 oras.

Bahagyang mas mataas ito kumpara sa naitalang isang pagyanig noong Biyernes.

Batay sa pinakahuling bulletin ng Philippine Institute of Volcanology and Seismology (PHIVOLCS), nagbuga rin ang Bulusan ng nasa 865 na tonelada ng Sulfur Dioxide.

Habang hanggang 200 metro rin ang taas ng naitalang pagsingaw  na napadpad sa Kanluran Timog-Kanluran.

Sa ngayon, nananatiling nakataas sa Alert Level 1 ang Bulkang Bulusan kung saan nasa estado pa rin ito ng nasa low-level unrest at may posibilidad na magkaroon ng steam-driven o phreatic eruptions.

Aabot sa P1.7-M halaga ng droga ang nasabat ng Philippine National Police sa isang buy-bust operation sa Davao City.

Kinilala ang naaresto na isang 47-anyos na lalaki sa Taal 1, Barangay Talomo Proper.

Nakumpiska rito ang 11 medium-sized na pakete at isang big-sized na pakete ng mga umano’y shabu.

Nakatakas naman ang kasama ng suspek na pinaghahanap na ngayon ng pulisya.

Sasampahan na ng kasong paglabag sa Republic Act 9165 o Comprehensive Dangerous Drugs Act ang salarin.

Patay ang isang binatilyo habang walo ang sugatan matapos matumba at tumagilid sa kalsada ang sinasakyan nilang truck sa Lemery, Iloilo.

Kinilala ng Lemery PNP ang nasawi na si Ryan Venus, 17- anyos at residente ng Bayan ng Banga, Aklan.

Sa imbestigasyon ng pulisya, nawalan ng kontrol ang driver ng truck noong Biyernes matapos mawalan ito ng preno.

Dito na natumba at tumagilid ang truck sa gilid ng kalsada.

Mabilis namang nakaresponde ang mga otoridad at dinala ang mga biktima sa ospital pero idineklarang dead-on-arrival na si venus.

Ligtas ang apat na sakay nito kabilang ang mag-asawang may-ari ng sasakyan.

Sa inisyal na imbestigasyon, maaaring electrical short circuit ang sanhi ng insidente na patuloy pang iniimbestigahan ng mga otoridad.