RONDA PROBINSYA

Patay ang dalawa katao habang isa ang sugatan sa banggaan ng dalawang truck sa bayan ng Sumilao, Bukidnon.

Ayon kay Sumilao Municipal Police Station Investigator Police Staff Sergeant Jessie Sanico, papunta sanang Valencia City ang prime mover truck, na may kargang tricab units.

Pero nabangga ito ng 10-wheeler truck, na may mga kargang scrap metal at patungong Cagayan De Oro City.

Hindi na nakontrol ng driver ng 10-wheeler truck ang preno nito dahil sa mabigat na dala.

Patay na nang isugod sa Sumilao Health Center ang driver at babaeng kasama nito.

Dalawang bangkay ng babae ang nakitang lumulutang sa Agno River sa bahagi ng San Carlos City, Pangasinan.

Kinilala ni Pangasinan PIO, Police Maj. Ria Tacderan ang dalawa na sina Abegail Rachelle Peralta, 19- anyos, residente ng Barangay Nagsaing, Bayan ng Calasiao at Analyn Cosme, 18- anyos na residente ng Barangay Libas, San Carlos City.

Hinihintay pa ng mga otoridad ang resulta ng post mortem examination sa mga labi.

Sa ngayon, iniimbestigahan na rin kung nalunod ang mga biktima o kung may foul play sa kanilang pagkamatay.

Patay ang pito katao sa barilan sa paghahain ng arrest warrant sa ilang suspek sa Rajah Buayan sa Maguindanao.

Ayon sa report, maghahain sana ang mga pulis ng arrest warrant laban sa tatlong suspek subalit pinagbabaril sila kaagad ng mga suspek kaya’t napilitan silang gumanti.

Nasawi ang dalawang target ng operasyon na nahaharap sa mga kasong frustrated murder at robbery with homicide.

Limang kasamahan ng mga suspek ang napatay din samantalang arestado ang apat pang kasamahan ng mga suspek at isang pulis naman ang nasugatan sa insidente.

Narekober sa lugar ng engkuwentro ang ilang matataas na kalibre ng baril, mga bala at isang grenade launcher.

Bunsod ng patuloy na pagsirit ng presyo ng produktong petrolyo, humihiling na rin ng taas-pasahe ang ilang mga driver ng jeep sa Eastern Samar.

Ayon kay ACTO Samar Chapter President Ben Asuncion, tinatalakay pa nila kung magkano ang ihihirit nilang umento sa pamasahe.

Paliwanag ni Asuncion, lubhang naapektuhan na ang kanilang kinikita, kung saan hindi na sumasapat ang 12 oras nilang pamamasada sa taas ng presyo ng mga bilihin.

Sinabi pa nito na nakatanggap na rin sila ng tulong mula sa gobyerno o fuel subsidy, ngunit hindi pa rin aniya ito sasapat kung hindi mapipigilan ang pagtaas ng presyo ng langis.

Nasamsam ng mga otoridad sa dalawang suspek ang aabot sa P3 milyong halaga ng shabu sa Bayan ng San Nicolas, Ilocos Norte.

Kinilala ang mga suspek na sina John Mark Dinong 33-anyos at Clifford Malana, 45-anyos na nakuhanan ng 500 gramo sa ikinasang Anti-Illegal Drug Operation.

Nakuha din sa mga suspek ang ilang heat-sealed transparent plastic sachet na shabu, isang black chest bag, apat na aluminum foil strips, isang glass tooter, isang gunting, tatlong cigarette lighter, isang pulang improvised shovel. , isang unit Oppo cellphone, at isang Taurus PT 1911 cal. 45 na may serial number na NDP 05094, dalawang magazine na kargado ng 8 live ammunitions.

Nahaharap ngayon sa kasong paglabag sa Republic Act 9165 o Comprehensive Dangerous Drugs Act of 2002 ang mga naarestong suspek.

Idineklara na ang State of Calamity sa bayan ng San Juaquin sa Iloilo, dahil sa patuloy na pagtaas ng kaso ng dengue.

Ayon sa Municipal Administrator ng San Joaquin, pumalo na sa 105 ang nagkaroon ng Dengue sa lugar, 400% na mas mataas sa kaparehong panahon noong nakaraang taon.

Maliban sa San Juaquin, nakikita rin ng Iloilo LGU ang pagtaas ng kaso ng Dengue sa bayan ng Guimbal at Tubungan.

Sa kabuuan, pumalo na sa 460 ang total dengue cases sa Iloilo.

Karamihan sa tinatamaan ng sakit ay mga batang edad sampu pababa.

Patuloy namang pinapaigting ng Iloilo LGU ang ipinatupad na preventive measures upang mapigilan ang dengue outbreak.

Nakapagtala ang Bulkang Bulusan ng 65 volcanic earthquakes kabilang ang isang low-frequency volcanic tremor nitong Lunes.

Ayon sa PHIVOLCS, karamihan sa mga pagyanig ay mahihina lamang ngunit posible ang panibagong phreatic eruption.

Nakataas pa rin sa ngayon ang Alert level 1 sa Bulkang Bulusan at patuloy na pinaiiwas ang mga mamamayan sa 4-kilometer permanent danger zone at maging sa 2-kilometer extended danger zone.

Sinabi naman ni Arvee Lodronio, pinuno ng Municipal Disaster Risk Reduction and Management Office ng Bayan ng Juban, na inalerto na nila ang mga barangay at local agencies sa lugar na posibleng maapektuhan ng panibagong aktibidad ng bulkan.