RONDA PROBINSYA

Patay ang isa katao habang tatlo ang sugatan matapos sumalpok ang isang pick-up truck sa kasalubong nitong 10-wheeler truck sa Cordon, Isabela.

Batay sa imbestigasyon ng Cordon Police, pababa na sana ng Highway kahapon ang pick-up nang mag-iba ito ng linya sa kurbadang bahagi ng kalsada.

Dahil sa ginawa ng driver, agad itong sumalpok sa 10-wheeler truck na paakyat naman ng kalsada.

Bagaman nakalabas ng sasakyan ang tatlong sakay ng pickup, naipit naman ang driver sa harapang bahagi ng sasakyan.

Inabot ng halos 15 minuto bago maalis ang driver at madala sa ospital, pero binawian din ito ng buhay Sabado ng gabi.

Patuloy na inoobserbahan sa ospital ang mga sugatan habang nasa kustodiya na ng mga pulis ang driver ng 10-wheeler truck, na posibleng maharap sa reklamong homicide, serious physical injuries at damage to properties.

Iniimbestigahan na ng Commission on Human Rights (CHR) ang pamamaril umano ng isang Non-Uniformed Personnel ng PNP sa isang estudyante sa Davao City.

Naganap ang insidente sa isang bar sa  kanto ng V. Mapa at J. Camus Extension Street, kung saan ilang beses na binaril ng suspek na si Marvin Rey Pepino ang 19-anyos na si Amier Mangacop.

Sa inilabas na pahayag ng CHR, kailangang malaman ang tunay na nangyari matapos maging salungat ang salaysay ng magkabilang panig sa isyu.

Nabatid na sa imbestigasyon ng Davao City Police Station, nagkaroon ng alitan sa pagitan ni Mangacop at grupo ni Pepino.

Pero iginiit ni Pepino na self-defense lamang ang nangyari dahil inatake siya ng biktima.

Pinabulaanan naman kalaunan ng pamilya ni Mangacop ang sinabi ng suspek at iginiit na mayroon nang gulo sa bar nang dumating ang biktima.

Ilan sa mga kinuwestiyon ng CHR ang pagdadala ng baril ng isang PNP-Non Uniformed Personnel sa loob ng bar.

Ito ay matapos ipatupad ni Mulanay, Quezon Mayor Aristotle Aguirre ang “Smile Policy” para sa mga kawani at opisyal ng lokal na pamahalaan.

Kabilang sa mga flagship program ng lokal na pamahalaan ang bagong kautusan.

Sa naturang EO, inoobliga ang lahat ng kawani at opisyal ng bawat departamento, tanggapan, units at sections ng lokal na pamahalaan na laging ngumiti kapag nagsisilbi sa kanilang mga kababayan.

Kailangan umano itong gawin para maipakita ang “Calmness and Friendly Atmosphere” sa kanilang mga pinagsisilbihan.

Paparusahan naman ang mga hindi susunod sa patakaran batay sa isinasaad sa Civil Service Code.

Nagkakahalaga ng P15 million na smuggled agricultural products ang nasabat ng Bureau of Customs sa Mindanao Container Terminal Port.

Katuwang ng BOC sa operasyon ang Port of Cagayan De Oro at intelligence group kung saan nahuli ang limang container ng mga puslit na agricultural products sa Mindanao International Container Terminal Services Incorporated Yard, sa Goloan Misamis Oriental.

Naka-consign ang shipment sa Primex export and import producer mula sa China na dumating sa bansa noong July 2 at idineklara bilang feeds.

Pero nang buksan ito ng BOC ay naglalaman pala ng mga pula at puting sibuyas at carrots.

Inihayag naman ng BOC na malinaw na paglabag sa Customs Modernization and Tariffs Act ang kargamento dahil sa misdeclaration ng mga produkto.

Aabot sa 500 pamilya o katumbas ng 1, 500 indibidwal ang naapektuhan ng pagbaha sa anim na Barangay sa Banaue, Ifugao.

Batay sa ulat ng National Disaster Risk Reduction and Management Council (NDRRMC), resulta ng mabigat na buhos ng ulan ang pagbaha kasabay ng malakas na ihip ng hangin.

Sa ngayon, 300 na sa rehiyon ang hindi madaanan dahil sa pagguho ng lupa

Kinabibilangan ito ng Mayoyao-Alfonso Lista-Isabela Boundary Road sa boundary ng Poitan, Banaue, Ifugao; Hungduan-Benguet Boundary Road sa Barangay Poblacion at Gohang Banaue; Nueva Vizcaya-Ifugao-Mt. Province Boundary Road sa Barangay Amganad, Tam-An, Poblacion at Viewpoint, Banaue.

Isang bahay naman ang napaulat na totally damaged sa Banaue.

Sa ngayon, nakapagpamahagi na ang DSWD sa mga apektadong residente ng 500 family food packs na nagkakahalaga ng 339, 375.

Dead on the spot ang isang menor de edad matapos ang nangyaring pagsabog sa malalag, Davao Del Sur nitong Huwebes.

Kinilala ang biktima na si alyas ”Jay,” pitong taong gulang, habang sugatan naman ang kapatid nitong si alyas ”Ken,” limang taong gulang na nagpapagaling ngayon sa Davao Del Sur Provincial Hospital.

Sa imbestigasyon ng mga otoridad, pinaglaruan umano ng magkapatid ang hinihinalang hand grenade at ilang sandali ay nakarinig na lamang ng pagsabog ang kanilang lola.

Patuloy na iniimbestigahan ng pulisya ang insidente.

Isang pulis ang patay matapos tambangan ng mga hindi nakilalang salarin sa bayan ng Cabagan, Isabela.

Kinilala ni Cabagan Police Chief, Maj. Rodante Albano ang biktimang si Corporal Marnix Baquiran, 34 anyos, residente ng Peñablanca, Cagayan at naka-assign sa Reina Mercedes Police Station sa Isabela.

Minamaneho anya ng biktima ang silver Toyota Fortuner nitong may plakang BBZ-3250 nang paulanan ng bala ng mga hindi nakilalang salarin sa bypass road, barangay Ugad, pasado alas-8 ng umaga.

Nagtamo ng maraming tama ng bala sa iba’t-ibang bahagi ng katawan si Baquiran.

Napag-alaman na unang nadestino sa Cabatuan Police Station ang biktima bago napunta sa Reina Mercedes.

Iniimbestigahan na ng pulisya ang motibo sa pagpatay at sino ang posibleng mga nasa likod ng krimen.

2 bahay ang nilamon ng lupa sa Barangay Kalunasan, Cebu City sa gitna ng malakas na pag-ulan, kahapon.

Ayon kay Cebu City Disaster Risk Reduction Management Office Head Racquel Arce, dakong alas-4 ng hapon nang maapektuhan ng landslides ang mga naturang lugar.

Inirekomenda na anya nila na magsilikas ang mga pamilyang apektado.

Sa kabila nito, wala namang nasugatan sa pagguho ng lupa.

Samantala, 12 lugar din sa lungsod ang nalubog sa baha.

Arestado matapos maaktuhan nagsusugal ang 3 benepisyaryo ng pantawid Pamilyang Pilipino Program o 4ps sa Purok 4, Barangay Bone South Aritao, Nueva Vizcaya.

Kinilala ang mga suspek na sina Allan T. Jalmasco, alyas “Michelle” ,46-anyos; isang alyas Jona, 53-anyos; at Melinda, 46-anyos na nakitang naglalaro ng card game o ang tinatawag na “tong-its.”

Nakumpiska sa kanila ang P290 na halaga ng pera na ginamit sa pagsusugal, at isang asul na plastic playing cards.

Nahaharap ngayon sa kasong kriminal sa Korte ang mga inarestong suspek.

Ayon sa Department of Social Welfare and Development, ang tulong pinansyal mula sa pambansang pamahalaan ay dapat gamitin sa pagbili ng mga pangunahing pangangailangan at huwag sayangin sa pamamagitan ng mga aktibidad sa pagsusugal.

Aabot sa halos 1,000 negosyo ang napilitang nagsara matapos malugi bunsod ng pandemya.

Ayon kay Allan Abayao, Supervising Administrative Officer ng Business Permits and Licensing Office, maraming establisyimento ang naapektuhan kung saan, karamihan dito ay may kinalaman sa turismo.

Kabilang sa mga negosyong nagsara ay ang mga nasa ilalim ng accommodations, mga souvenir shops, bar, amusement, review center, paaralan, spa, salon, barber shops, laundry shop at iba pang mga establisyimento na hindi umano mahalaga ang serbisyo.

Sinabi ni Abayao na 194 na negosyo ang nagsara sa pamamagitan ng pagretiro ng kanilang mga business permit noong 2020; 428 noong nakaraang taon, at 335 noong Mayo 2022 para sa kabuuang 957 establisyimento.

Bukod pa diyan, nagsara din ang mahigit 20% ng food services o katumbas ng 6,620 sa mga business permit na inisyu noong nakaraang taon pero mas mababa ito kumpara sa 7,321 na lisensya na inisyu noong 2020 at bumaba pa rin ang bilang nito sa 5,411 noong Mayo 2022.

Ang mga business permit na inisyu ay bumaba mula 897 noong 2020 hanggang 874 noong 2021 at mababa pa rin sa 694 noong Mayo 2022.