RONDA PROBINSYA

Muling nalubog sa baha, dulot ng pag-ulang dala ng Low Pressure Area na pinalala ng habagat, ang ilang mababang lugar sa Pampanga.

Kabilang sa mga binaha ang Bayan ng Masantol, gaya sa Bagang Elementary School, ilang araw bago ang muling pagbubukas ng klase.

Ayon kay Masantol Mayor Jose Antonio Bustos, hindi lang naman ulan ang sanhi ng pagbaha sa kanilang lugar dahil sadyang mababa ang lokasyon nito bukod pa sa napapalibutan ng ilog at dagat.

Naka-apekto rin anya ang high tide na paiba-iba ang lebel ngayong buwan habang inaasahang mararanasan bukas hanggang sabado ang pinaka-mataas na lebel nito na lalampas ng limang talampakan.

Inabisuhan naman ni Bustos ang mga residente na itaas na ang kanilang kagamitan sa bahay at lumikas ang mga naninirahan sa tabing-ilog.

Bukod sa Masantol, pawang nasa mababang lokasyon din ang mga karatig Bayan ng Macabebe, Sasmuan, Minalin at Apalit.

Nagbalikan na sa kani-kanilang bahay ang mga residenteng naapektuhan ng flashfloods at mudslides sa Banaue, Ifugao.

Naging abala ang mga residente sa paglilinis sa kanilang mga bahay na nabalot ng putik.

Mahigit 1k pamilya o nasa 3k katao ang apektado sa mga Barangay Amganad, Bocos, Gohang, Poblacion, Puwitan, San Fernando, Yuhaj, Tam-An at View point.

Inihayag naman ni Banaue Mayor Joel Bungallon na nagpapatuloy ang relief operations at inaasahang maibabalik na rin power at water supply.

Kasalukuyang nasa State of Calamity ang nasabing bayan dahil sa epekto ng flashfloods at landslides dulot ng malakas na ulan dala ng Habagat.

Kawalan umano ng drainage system ang sanhi ng flashfloods at mudslides sa Banaue, Ifugao dahil sa mga nakatayong bahay.

Ayon kay Bontoc-Lagawe Bishop Valentin Dimoc, naharangan na ng mga bahay ang dapat na daluyan ng tubig kaya noong umulan dulot ng habagat ay sa mga kalsada na dumaan ang naipong tubig.

Wala anyang sapat na daluyan kaya’t umagos ang tubig at putik mula sa bundok.

Ipinanawagan naman ni Dimoc sa mga otoridad na maglagay ng drainage system nang sa gayo’y maging maayos ang pagdaloy ng tubig mula sa bundok patungo sa ilog.

Hinimok din ng Obispo ang mga residente na iwasan nang magtayo ng mga istruktura tulad ng mga bahay sa mga mapanganib na lugar upang maiwasan ang pinsala sa kalikasan.

Tatlong sibilyan ang sugatan sa mga pagsabog na sinundan ng sunog sa ammunition depot ng Philippine Army sa Cagayan De Oro City.

Dakong 12 kaninang hatinggabi nang yumanig ang mga pagsabog sa Magazine 5 sa loob ng Ammo Complex ng Army sa Camp Edilberto Evangelista, Barangay Patag.

Ang nasabing lugar ay kampo ng 4^th infantry division ng Hukbong Katihan.

Ayon kay Philippine Army – Division Public Affairs Office Chief, maj. Francesco garello, pawang mga mortar at small arms ammunition ang nasa Magazine 5 na main repository ng Army.

Inaalam na anya ng Armed Forces of the Philippines ang sanhi ng pagsabog.

Aabot sa mahigit kalahating milyong pisong halaga ng shabu ang nasabat ng mga otoridad sa tatlong suspek sa ikinasang buy-bust operation sa Purok Kapawa, Barangay Punta Taytay, Bacolod City.

Kinilala ang mga suspek na sina Cyril Gepielago, 49-anyos; Julius London, 42-anyos; at Pearly Mae Panes, 30-anyos.

Ayon kay Police Lt. Joven mogato, Hepe ng City Drug Enforcement Unit (CDEU), na nakatanggap sila ng report mula sa isang concerned citizen hinggil sa iligal na gawain ng mga suspek na itinuturing na High Value Target, drug runner at street level sa lugar.

Agad nagsagawa ng operasyon ang m,ga otoridad dahilan ng pagkakaaresto ng mga nabanggit na suspek.

Nakakulong na sa Police Station 9 ang mga suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.

Nasa ‘State of Calamity’ na ang bayan ng Banaue, Ifugao matapos masalanta ng flashfloods at landslides dulot ng malakas na ulan dala ng Habagat noong Huwebes.

Layunin ng deklarasyon na magamit ng Lokal na Pamahalaan ang kanilang pondo sa rehabilitasyon at makapag-abot ng tulong sa mga apektadong residente.

Batay sa datos ng DSWD Field office —CAR, tinatayang 1K pamilya o nasa 3K katao na ang apektado ng kalamidad sa 9 na barangay sa Banaue.

Dalawang bahay naman ang totally damaged habang 332 ang partially damaged.

Lumobo na sa P14.6 million ang halaga ng pinsala sa agrikultura sa lalawigan ng Ifugao matapos ang flashfloods at mudslides dulot ng Southwest monsoon o Habagat.

Batay sa datos ng Department of Agriculture, halos 700 magsasaka, na may production loss volume na 728 metric tons at halos 200 ektaryang taniman na ang apektado.

Kabilang sa mga pinaka-napuruhan ang mga palayan at high-value crops.

Hinikayat ng DA ang Lokal na Pamahalaan na magbigay ng bigas, mais, gamot, assorted vegetable seeds at livestock at poultry.

Ilalarga rin ng Kagawaran ang Survival and Recovery Program ng Agricultural Credit Policy Council habang bibigyan ang mga magsasaka ng pondo mula sa Philippine Crop Insurance Corporation.

Magkakaloob din ang DA ng Quick Response Fund para sa rehabilitasyon ng mga apektadong lugar.

Tinatayang 1K pamilya o nasa 3K katao na ang apektado ng flashfloods at landslides sa 9 na Barangay sa Banaue, Ifugao.

Ayon kay Banaue Municipal Social Welfare and Development Office Chief Aguinaya Cabanayan, nasa 300 kabahayan din ang nawasak o napinsala, matapos ang malakas na ulan noong Huwebes.

Kabilang anya sa mga matinding naapektuhan ang mga Barangay Amganad, Bocos, Gohang at Poblacion.

Nawasak din ang ilang bahagi ng kilalang Banaue Rice Terraces sa Barangay Poitan at mga karatig barangay dahil sa landslides.

Samantala, nagpapatuloy ang pagtulong ng Department of Social Welfare and Development sa mga apektadong pamilya.

Inamin na ng suspek na si Darwin De Jesus ang pagpatay sa babaeng engineer na natagpuang naaagnas sa masukal na bahagi ng Guiguinto, Bulacan

Ito’y makaraang marekober ang mga ID at ATM card ng biktimang si Princess Dianne Dayor sa bahay ni De Jesus sa Barangay Santor.

Detalyadong isinalaysay ng suspek sa kanyang Extra Judicial confession ang ginawa niyang pagholdap at pagpatay kay Dayor noong Hulyo a –2.

Napag-alamang nawawala ang wallet na naglalaman ng mga ID at ATM card ng biktima nang matagpuan at imbestigahan ito ng mga otoridad sa madamo at gilid ng sapa sa boundary ng Barangay Tabang, Guiguinto at Barangay Tikay, Malolos City.

Dahil dito, lalong nadiin si De Jesus sa naturang krimen at inihayag ng Bulacan Provincial Police Office na nakamit na ni Dayor ang hustisya.

Huling nakitang naglalakad ang biktima umaga noong Hulyo a – 2 habang papasok sana sa kanyang trabaho sa Bayan ng Pulilan.

Nasawi ang isang 27 taong gulang na babae matapos itong malibing ng buhay sa naganap na landslide sa Abucay Bataan.

Ayon kay Abucay Police Chief Maj. Dennis Bautista Duran, natabunan ng landslide ang bahay ng biktimang kinilalang si  Roselyn Dela Cruz sa kasagsagan ng malakas na ulan kung saan naroon  ang naturang  biktima na napag-alamang caretaker ng isang resort sa Abucay.

Aniya, natagpuan ng mga rescuer ang bangkay ni Dela Cruz sa ilalim ng putik na nagbaon din sa isang kotse kasunod ng pagguho ng lupa na nangyari alas-2 ng madaling araw nitong Sabado

Habang nagpadala ng team ang provincial disaster risk reduction and management office at Bureau of Mines and Geosciences sa Region 3 para i-assess at alamin ang sanhi ng landslide para maiwasang maulit ang nasabing insidente.