RONDA PROBINSYA

Malagim ang sinapit ng dalawang barangay captains matapos pagbabarilin sa magkahiwalay na insidente sa San Miguel, Bulacan at Siocon, Zamboanga del Norte.

Unang napatay si Marvin Avendaño, tserman ng Barangay San Jose sa San Miguel, na tinambangan ng hindi pa nakikilalang salarin habang lulan ng kanyang sasakyan sa Barangay Buliran.

Nasawi rin si Chairman Bert Inding ng Barangay Balagonan sa Siocon makaraang pagbabarilin habang sakay ng motorsiklo kasama ang kanyang misis.

Patuloy ang imbestigasyon sa mga naturang krimen.

Patay ang isang hinihinalang miyembro ng Communist Party of the Philippines-New People’s Army (CPP-NPA) matapos makasagupa ng mga tropa ng pamahalaan sa Sta. Catalina, Negros Oriental.

Ayon kay LT. COL. Roderick Salayo, Commanding Officer ng 11th Infantry Battalion ng Philippine Army, hindi pa tukoy ang pagkakakilanlan ng nasawing rebelde na ang labi ay natagpuan sa encounter site sa sitio tamusi, barangay talalak.

Sa inisyal na report, tumagal ng walong minuto ang sagupaan sa pagitan ng mga komunista at government forces sa nasabing lugar.

Natagpuan sa pinangyarihan ng insidente ang isang kg-9mm rifle, ilang magasin at mga bala, isang bandolier, dalawang hand-held radios, isang backpack, at mga hinihinalang subversive documents.

Aabot sa P1.5 billion ang pondong iiwan ni outgoing Malabon City Mayor Antolin “Lenlen” Oreta III sa susunod na administrasyon matapos ang halos 10 taon niyang pamumuno sa lungsod.

Ayon sa Alkalde, mula sa dating P400 million noong taong 2012, lumobo ang kabuuang koleksiyon ng buwis sa P1.5 billion para sa iba’t ibang proyekto kabilang na ang patuloy na pag-unlad at pagtugon sa “Promise Agenda” o ang Poverty Reduction, Organizational, Management Infrastructure Scheme at Environment Agenda.

Nabatid na mula noong taong 2012 hanggang 2021, lumago ng 200% ang lokal na kita ng lungsod sa gitna ng pandemya.

Ipinagmalaki ng Alkalde na tama at responsibleng nagamit ang mga hiniram na halaga ng pondo.

Siniguro din ni Oreta na hindi kailangang taasan ang buwis para mabayaran ang hiniram na pondo mula sa pambansang pamahalaan.

Patay sa pamamaril ang isang radio block time anchor sa area 2, Sitio Macanhan, Barangay Carmen, Cagayan De Oro City.

Kinilala ang biktima na si Federico Gempesaw, 62 years old na isang mamamahayag mula sa 106.3 Radyo Natin FM Cagayan De Oro.

Sa imbestigasyon ng mga otoridad, nagkaroon ng komosyon bago pinagbabaril ng riding-in-tandem ang biktima gamit ang isang cal.  45 na baril dahilan  para tamaan sa kanang kilay at sa likod na bahagi ng kanyang ulo ang bikitima.

Patuloy pang iniimbestigahan ng mga tauhan ng Cagayan De Oro City Police Office (COCPO) ang pagkakakilanlan sa mga suspek maging ang motibo sa pagpatay.

Nagsasagawa na ngayon ng hot pursuit operation ang mga pulis hinggil sa naganap na krimen.

Patay sa ambush ang isang government employee sa isang talipapa sa Barangay Ugac Norte, Tuguegarao City.

Kinilala ang biktima na si Gerero Matammu, 57-anyos na empleyado ng Tuguegarao City Hall na idineklarang dead on arrival sa ospital dahil sa tama ng bala sa katawan.

Base sa imbestigasyon, abala ang biktima sa pakikipag-usap sa pinsang si Ruiz Mabborang nang lumapit ang isang lalaki saka namaril at mabilis umanong tumakas sakay ng isang motorsiklo

Patuloy pang iniimbestigahan ng mga otoridad ang insidente.

Siyam na drug suspect ang inaresto sa magkakahiwalay na operasyon sa Central Luzon sa loob lamang ng 24 na oras.

Nabatid na nagsagawa ng Anti-Illegal Drug Operations sa ilang lugar sa Pampanga, Bulacan at Zambales nito lamang Linggo, Hunyo a-26.

Unang naaresto ng mga otoridad sina Reynante Pineda alias ‘Rey’, 52-anyos na High Value Target at Ana Marie Bitug, 38-anyos sa Brgy. Mabiga sa Mabalacat City na nakuhananng pitong piraso ng heat-sealed transparent plastic sachet ng shabu na may timbang ng humigit-kumulang 56 gramo na nagkakahalaga ng P380,000.

Nahuli naman sa Brgy. Bigte, Norzagaray Bulacan ang apat na umano’y nagbebenta ng droga na kinilalang sina Gil Ciego, 33-anyos; Rania Julartbar, 23-anyos; Ian Ramos, 28-anyos; at Justine Mercado, 21-anyos na nakuhanan naman ng 11 pirasong plastic sachet ng hinihinalang shabu na may timbang na aabot sa mahigit pitong gramo na nagkakahalaga ng P49,640.

Samantala, tiklo din pinagsanib puwersa ng mga tauhan ng Subic Police at PDEA Zambales ang tatlong drug personalities sa isang buy-bust operation sa Brgy. Matain, Subic, Zambales.

Kinilala ang mga suspek na sina Abbygail Cleofe, 37-anyos; Ace Narez, 30-anyos; at Michael Tolentino, 34-anyos.

Narekober sa kanila ang limang heat-sealed transparent plastic sachet ng shabu na tumitimbang ng 13 gramo at nagkakahalaga ng P89, 700.

Nakuha din sakanila ang iba’t ibang klase ng drug paraphernalias at marked money na ginamit ng undercover PDEA agent.

Nahaharap ngayon sa patung-patong na kaso ang mga suspek kabilang na ang Republic Act 9165 o Comprehensive Dangerous Drugs Act of 2002.

Patay ang isang 19-anyos na lalaki sa sunog na sumiklab sa isang Residential area sa Davao City nitong Lunes.

Natagpuan ng mga bumbero ang katawan ng biktimang si Arhaman Usman, na sinasabing na-trap sa loob ng bahay makaraang balikan ang kanyang kapatid mula sa nasusunog nilang bahay.

Aabot sa 1,000 kabahayan ang naapektuhan ng sunog.

Mahigit 300 residente ang nawalan ng tahanan at nananatili ngayon sa Gymnasium ng Barangay.

Kabilang sa tinitingnang sanhi ng sunog ang napabayaang katol.

Sinunog ng mga otoridad ang aabot sa P62 million na halaga ng mga fully grown marijuana plants na nakuha sa three-day eradication operation sa Barangay Buscalan, Butbut Proper, at Loccong sa Tinglayan, Kalinga.

Ayon sa mga otoridad, aabot sa 16 na plantasyon ng marijuana ang natagpuan ng mga otoridad kabilang na ang anim sa Barangay Buscalan; tatlo sa barangay Butbut Proper, at 7 naman sa Barangay Loccong.

Nabatid na umabot 310,000 na piraso ng marijuana plants ang binunot sa 25,950-square meters na lupain matapos ikasa ang operasyon sa tulong ng mga tauhan ng Philippine National Police-Special Action Force at Philippine Drug Enforcement Agency (PDEA-Kalinga).

Dahil dito, pinuri ni Pol. Col. Peter Tagtag Jr., hepe ng Kalinga Police, ang mga operatiba para sa mahusay na trabaho at kanilang pakikipagtulungan sa komunidad na humantong sa matagumpay na operasyon sa nasabing lugar.