RONDA PROBINSYA

Patuloy ang pagtugis ng mga militar sa mga sangkot sa pagpapasabog ng landmine sa kanilang mga tauhan sa Mapanas, Northern Samar.
Ayon kay 8th ID at Joint Task Force Storm Commander Major General Edgardo De Leon, 3 hinhinalang miyembro ng New People’s Army ang nasawi matapos ang follow-up operations ng militar.
Gamit ang drones, natunton ng militar ang kuta ng mga rebelde na puno ng armas at nagresulta ito sa serye ng engkwentro.
Ayon kay De Leon, posibleng galing sa platoon yakal ng NPA ang grupo na kanilang nakaharap na matagal na nilang pinaghahanap.
Hindi pa tukoy ang pagkakakilanlan ng 3 NPA na nasawi na 2 lalaki at 1 naman ang babae.
Sa ngayon, na pick-up na sa pamamagitan ng blackhawk ang labi ng mga nasawi.
Sinabi naman ni De Leon na inaasahan nila ang mga susunod pang engkwentro sa mga liblib na kabundukan dahil hindi na rin makalapit ang mga NPA sa mga komunidad para magtago.
Matatandaan na 7 sundalo ang sugatan sa pananambang ng mga rebelde matapos pasabugan ng landmine noong July 5.—mula sa ulat ni Gilbert Perdez (Patrol 13)

Nalunod ang isang 9 na buwang-gulang na sanggol makaraang anurin ng baha sa bayan ng Macabebe, Pampanga.

Dakong alas nwebe ng umaga kahapon nang tangayin ng tubig dulot ng high tide ang sanggol habang natutulog sa kama kasama ang ama nito sa kanilang bahay sa Purok Bukangliwayway, Barangay Candelaria.

Ayon sa Macabebe Municipal Disaster Risk Reduction and Management Office, hindi namalayan ng ama na nahulog na pala ang bata mula sa kama habang tumataas ang tubig sa bahay.

Wala naman ang ina ng sanggol na noo’y pumunta sa munisipyo upang kumuha ng ayuda.

Isinugod pa sa ospital ang bata pero idineklarang dead on arrival ng mga doktor.

Arestado ang 6 na illegal drug users matapos maaktuhang nagpa-pot-session sa Jose Panganiban, Camarines Norte.

Kinilala ang mga suspek na sina Raymond Ibis, 22-anyos; Zaldy Jamito, 31-anyos; Joseph Dasco, 27-anyos; Mark Anthony Obar, 23-anyos; Freddie Rieza, 39-anyos; at Josue Sales, 48-anyos.

Ayon kay Philippine National Police Officer in Charge Police Lt. Gen. Vicente Danao, Jr., nakatanggap sila ng report mula sa mga opisyal ng barangay sa nabanggit na lugar hinggil sa iligal na gawain ng mga suspek dahilan kaya agad silang nagsagawa ng operasyon.

Nakuha sa mga suspek ang 3 sachet ng shabu at ilang mga drug paraphernalia.

Nahaharap ngayon sa kasong paglabag sa Republic Act 9165 o Comprehensive Dangerous Drugs Act of 2002.

Isang bahagi ng kalsada sa bulubunduking barangay sa Talisay City, Cebu ang pansamantalang ipinasara makaraang makaranas ng landslide bunsod ng malakas na pag-ulan.

Kinumpirma ni Talisay City Traffic Operations and Development Authority Chief Joy Tumulak na sarado ang bahagi ng Cebu-Toledo-Tabunok Road sa Sitio Langoyon, Barangay Manipis.

Ayon kay Tumulak, magsasagawa ng clearing operations ang Department of Public Works and Highways sa nasabing lugar sakaling gumanda na ang panahon.

Inabisuhan naman ng opisyal ang mga motorista na dumaan na lamang sa mga alternatibong ruta.

Ang pag-ulang nararanasan sa lalawigan ng Cebu ay dulot ng habagat na pinaigting ng low pressure area.

Naglunsad ng bagong gusali ang Department of Agrarian Reform (DAR) North Cotabato Provincial office na matatagpuan sa Barangay Singao, Kidapawan City.

Ayon sa DAR, naglaan ang pamahalaan ng P40-M halaga para sa two-story building na magbibigay ng maayos at ligtas na work environment sa mga kawani.

Bukod pa dito, makapagbibigay din ito ng dekalidad na serbisyo sa Agrarian Reform Beneficiaries (ARBs), mga stakeholder, at partners.

Tiniyak ng National Disaster Risk Reduction and Management Council (NDRRMC) na hindi pababayaan ng pamahalaan ang mga naapektuhan ng landslide at mudslide sa cordillera partikular na sa Ifugao matapos ang naranasang malalakas na pag-ulan dulot ng Low Pressurre area (LPA) at hanging habagat.

Ayon kay NDRRMC spokesperson Mark Timbal, patuloy ang operasyon ng pamahalaan sa pagtugon sa mga apektadong residente kung saan, umabot na sa P2.4 million na halaga ng assistance ang naipamahagi na sa lugar.

Kabilang sa mga ipinamahagi ng pamahalaan ang mga family food packs at iba pang items na makakatulong sa kanilang pangangailangan.

Nabatid na umabot sa mahigit isang libong pamilya ang naapektuhan mula sa sampung barangay sa nabanggit na lalawigan na nagsimula naring mag-uwian sa kani-kanilang mga tirahan.

Isang babaeng edad pito ang hinalay at pinatay umano ng dalawang kapwa menor de edad sa San Pedro City, Laguna.

Kinilala ni Col. Cecilio Ison Junior, Acting Director ng Laguna Provincial Police Office ang biktimang si alyas ‘Ava’ at mga suspek na sina alyas ‘Totoy’ at ‘Brocoli’.

Alas-10 ng gabi noong Miyerkules, Hulyo a – 6 nang maganap umano ang krimen sa isang abandonadong bahay sa Purok 6, Barangay Landayan.

Batay sa imbestigasyon, umiinom ng alak si alyas ‘Brocoli’ nang dumating si ‘Totoy’ kasama ang biktimang si ‘Ava’ na nakatali ng tela ang bibig.

Kapwa kinarga ng dalawang suspek ang biktima patungo sa ikalawang palapag ng bahay tsaka ginahasa at sinakal na naging sanhi ng kanyang kamatayan.

Nang mahuli si ‘Broccoli’ ng mga Barangay tanod dahil sa isang ninakaw na cellphone, umamin ito sa panghahalay sa biktima na natagpuan sa loob ng bakanteng bahay, habang si ‘Totoy’ ang sumakal sa paslit.

Dinala ang bangkay ng biktima sa Miraculous Funeral Parlor para i-autopsy habang hawak na ng City Social Welfare Development ang dalawang menor de edad na suspek.

Hinimok ng Local Government ng Baguio ang mga barangay official sa lungsod na agarang i-ulat ang anumang maaaring magdulot ng peligro sa mga residente at ari-arian, lalo tuwing may bagyo o malakas na ulan.

Inihayag ni City Information Officer Aileen Refuerzo na ang nasabing panawagan ng special services division ng tanggapan ni Mayor Benjamin Magalong ay bahagi ng flood management initiative ng lungsod.

Dapat anyang ipagbigay-alam ng mga barangay ang mga makikitang sala-salabat na kable ng kuryente, barado o umaapaw na kanal at mga patay o nagtumbahang puno na dulot ng malakas na ulan.

Hinikayat din ang mga residente na sumunod sa kautusan sa tamang pagtatapon ng basura lalo’t ang hindi wastong garbage disposal ay nagiging sanhi ng baradong mga kanal at ilog na nagdudulot ng pagbaha.

Samantala, batay sa datos ng NDRRMC ay aabot na sa P16.6 million ang halaga ng pinsalang idinulot ng pagbaha at landslides bunsod ng pag-ulang dala ng habagat sa sektor ng agrikultura sa Benguet.

Lumobo na sa P48.8 million ang halaga ng pinsala ng flashfloods at mudslides sa sektor ng agrikultura sa Ifugao, partikular sa Bayan ng Banaue.

Ayon sa Department of Agriculture, nasa 600 magsasaka ang apektado o katumbas ng 728 metric tons na volume loss.

Kabilang sa mga pinadapa ang mga palayan, maisan, high-value crops, gaya ng repolyo, kamatis at bell pepper.

Bukod sa mga gulayan, naapektuhan din ang mga babuyan at manukan sa Banaue.

Tiniyak naman ng DA na makatatanggap ng ayuda ang lahat ng magsasakang apektado

Huwebes nang makaranas ng malakas na ulang dulot ng habagat ang lalawigan na nagresulta sa pagbaha at pag-agos ng putik dahilan naman ng pagkasugat ng tatlo katao at paglikas ng nasa isanlibong pamilya.

Muling tiniyak sa publiko ng Department of Agriculture na nananatiling stable ang supply at presyo ng gulay sa kabila ng epekto ng flashfloods at mudslides sa ekta-ektaryang taniman sa Ifugao.

Ayon sa DA – Cordillera, sapat ang supply sa ngayon ng mga highland vegetable, tulad ng Repolyo, Letsugas, Broccoli at Cauliflower kaya’t wala pang dapat ipangamba ang publiko.

Sa datos ng Philippine Statistics Authority noong 2020, nasa 58K pamilya sa Ifugao, mga karatig lalawigan ng Benguet at Mountain Province ang umaasa sa pagtatanim ng gulay bilang hanapbuhay.

Halos 80% ng highland vegetable supplies ng bansa ay mula sa tatlong nabanggit na probinsya o nasa 130,538 metric tons ng Repolyo, Patatas, Kamatis, Kamote, Kamoteng Kahoy, Talong at Sibuyas ang produksyon noong 2020.

Gayunman, nangangamba si Adrian Albano, Administrator ng Ifugao Highland Farmers Forum, na maaaring makaranas ng shortage sa mga susunod na araw dahil sa limitadong produksyon.

Sa pagtaya ng DA – Cordillera, aabot na sa P48.8 million ang halaga ng pinsala ng flashfloods at mudslides sa sektor ng agrikultura sa Ifugao, partikular sa Bayan ng Banaue.

Katumbas ito ng 728 metric tons na volume loss ng tinatayang 600 magsasaka at mag-gugulay.