Isang buntis ang inabutan ng panganganak sa gitna ng sunog sa isang ospital sa Butuan City.
Dumating umano ang buntis sa nasabing ospital habang inililikas ang mga pasyente.
Sinabi ni Dr. Carissa Cay Castanio na nakalabas na ang ulo ng bata kaya’t agad niyang dinaluhan ang babae at pinaanak ito habang nangyayari ang sunog.
Sa ngayon ay nasa ligtas na kalagayan na ang mag-ina.
Inihayag ng Occidental Mindoro Consolidated Power Corporation (OMCPC) na matagal na silang naghain ng Urgent Motion for Clarification sa Energy Commission Regulation (ERC) kaugnay sa suplay ng kuryente sa kanilang lugar.
Sa panayam ng DWIZ, sinabi ni OMCPC chief operating officer Calvin Luther Genotiva na hanggang sa ngayon ay hindi pa rin ito inaaksyunan ng ERC.
Giit pa niya na hanggang 12 megawatts lamang mula sa 27 megawatts na demand ang kanilang isinusuplay sa lalawigan, dahil hindi sila mababayaran sakaling lumampas sa naturang bilang.
Bukod pa dito, isang ilegal na hakbang din ang mag-operate ng lampas sa 12 megawatts hanggat hindi sinasabi ng ERC.
Samantala, nanawagan si Genotiva sa ERC na aprubahan na ang inihaing Motion for Clarification.
Muling nagka-landslide sa bahagi ng Cebu City matapos ang malakas na ulan kahapon.
Dakong hapon nang gumuho ang lupa sa Sitio Sapang Kumonidad, barangay Guadalupe.
Nagsilikas ang mga residente habang naka-kordon na ang naturang lugar.
Wala namang naiulat ang Cebu City Disaster Risk Reduction and Management Office na nasugatan sa landslide.
Ito na ang ika-apat na landslide sa lungsod sa loob ng dalawang linggo.
Una nang inihayag ng PAGASA na ang malakas na pag-ulan ay dulot ng Habagat.
Mahigit 100 residente ng bayan ng San Jose, Occidental Mindoro ang naglunsad ng kilos-protesta kontra malawakang rotational brownouts sa lalawigan.
Dakong ala-6:30 kagabi nang magtipon ang mga residente bilang “Samahan ng mga Consumers in Occidental Mindoro” para sa tatlong oras na solidarity walk.
Ito na ang ikalawang sunod na beses na naglunsad ng naturang aktibidad ang mga consumer simula noong Sabado at plano ring isagawa sa loob ng limang gabi o hanggang Miyerkules.
Layunin nitong mabigyang-pansin ng national government ang kanilang sitwasyon sa gitna ng rotational brownout makaraang isailalim sa state of power crisis ang lalawigan.
Umaabot ng 12 hanggang 14 na oras ang power outages bunsod ng kakulangan sa power supply na labis na naka-apekto sa kanilang araw-araw na mga aktibidad sa lahat ng sektor.
Kinundena rin ng grupo ang kawalang-kakayahan ng electric service ng lalawigan na pinalala nang magsara ang power provider na Occidental Mindoro Consolidated Power Corporation noong June 25, dahilan upang maapektuhan ang mahigit 80,000 residente.
Mahigit P6 million halaga ng smuggled na sigarilyo ang nasabat ng mga otoridad sa ikinasang sea patrol operation sa Coat of Manalipa Island, Zamboanga City.
Ayon kay Philippine National Police officer-in-charge police lieutenant general vicente danao jr., pitong suspek na sakay ng motorized wooden watercraft na tinawag na “jungkong” ang naaresto sa nasabing operasyon.
Kinilala ang mga nadakip na sina Benzar jajales, Pijing Muknan, Binbin Asiril, Elnejin Asiril, Minkadra Sakili, Sherwin Masakin at Adzmir Bakki.
Sa naturang operasyon, nakumpiska ng tauhan ng 2nd Zamboanga City Mobile Force Company, Bureau of Customs, BOC-Customs Intelligence and Investigation Service at BOC-Enforcement Security Service ang nasa 178 master cases ng sigarilyo na tinatayang nasa 6, 230, 000 ang market value.
Samantala, nangako si Danao na paiigtingin pa nito ang pagsugpo sa naturang iligal na aktibidad.
Idineklara na ang ‘State of Power Crisis’ sa Occidental Mindoro.
Ito ay matapos mag-blackout ang buong lalawigan nang i-shutdown ng supplier ang kuryente matapos hindi payagang makapag-operate ng Energy Regulatory Commission (ERC).
Ayon kay Occidental Mindoro Vice Governor Diana Tayag, isang dekada nang problema sa Occidental Mindoro ang suplay ng kuryente, pero mas lumala pa ito ng biglang mag-shut down ang operasyon ng OMCPC noong June 25.
Bagaman pansamantalang naibalik ang suplay ng kuryente matapos atasan ng ERC ang OMCPC na ibigay ang suplay ng OMECO, hindi naman buong 12 megawatts ang ibinalik.
Nasa 25 hanggang 27 megawatts ang kailangan probinsiya.
Sa ngayon, nanawagan na ang OMECO ng temporary approval mula sa ERC upang madagdagan nang ibinibigay na megawatts supply.
Patay ang 41-anyos na lalaki matapos matabunan ng bato sa isang minahan sa Tuba, Benguet.
Kinilala ang biktimang si Danny Bunnag Dammit, isang Mine Development Supervisor na nagtatrabaho sa minahan ng Philex Mining Corporation.
Naganap ang insidente dakong alas-4 ng hapon nitong Biyernes.
Batay sa imbestigasyon ng mga otoridad, nagtatrabaho ang biktima at isa pang kasama nitong si Vergel Moguiyeng nang magkaroon ng rockburst.
Bagaman ligtas na nakalabas si Moguiyeng, naiwan si Dammit sa loob.
Tinangka pang dalhin sa ospital ang biktima matapos mahukay ng mga rescuers pero idineklara na itong dead-on-arrival.
Cardiopulmonary Arrest Secondary to Asphyxia ang sanhi ng pagkamatay ni Dammit.
Hinikayat ng Cordillera Disaster Risk Reduction Management Council o CDRRMC ang mga lokal na pamahalaan na gumawa ng mga hakbang upang maprotektahan ang publiko bunsod ng tumataas na bilang ng dengue cases sa rehiyon.
Dahil dito, ayon kay CDRRMC chairman at Office of Civil Defense regional director Albert Mogol, mahalagang mas paigtingin pa ang dengue prevention and control measures sa CAR.
Batay sa inilabas na Dengue Disease Surveillance report ng Department of Health Cordillera Administrative Region o DOH-CAR, pumalo na sa 4,487 ang suspected dengue cases na naitala sa rehiyon mula Enero hanggang ngayong buwan ng Hulyo, taong kasalukuyan.
Pangungunahan naman ng mga punong barangay o chairman ang pagsasagawa ng dengue response activities gaya na lamang ng “4S strategy” na ang ibig sabihin ay ‘search and destroy breeding sites’; ‘seek early consultation’; ‘self-protection’; at ‘say yes to fogging’ sa mga hotspot areas.
Inatasan din ang mga alkalde sa CAR na pangunahan ang pagmo-monitor sa dengue response activities sa pakikipagtulungan ng Local Government Operation Officer, City o municipal Health Officer, at City o Municipal Disaster Risk Reduction and Management Officer o DRRMO.
Binanggit din sa resolusyon ng CDRRMC na dapat bumili ang mga local DRRM Officers ng mga emergency drugs at diagnostic test kits habang ikinakasa ang iba pang mga hakbang kontra dengue.
Samantala, ipinag-utos naman ng Baguio City government ang pagsasagawa ng cleanup drive tuwing Huwebes bilang bahagi ng “Denguerra” campaign para hikayatin ang mga residente na tumulong sa pagsira sa mga bagay na maaaring pinamumugaran ng lamok.
Pinalilikas na ng Municipal Disaster Risk Reduction and Management Office (MDRRMO) ang mga residente sa gilid ng Pulangi River sa bayan ng Datu Montawal Maguindanao.
Ito’y dahil sa matinding pagbaha matapos umapaw ang tubig sa nabanggit na ilog.
Ayon kay MDRRMO-officer Balumol Kadiding, nasa critical level na rin ang Tunggol Bridge sa bayan ng Datu Montawal.
Sa ngayon, nakatutok na ang LGU-Datu Montawal Maguindanao sa pamumuno ni Mayor Dato Ohto Montawal sa naranasang baha at pagbibigay ng agarang tulong sa mga residente.
Isinailalim na sa State of Calamity ang probinsya ng Antique dahil sa mataas na kaso ng nakamamatay na viral infection na dengue.
Batay sa inilabas na resolusyon ng provincial board, inilagay sa State of Calamity ang 18 munisipalidad.
Sinabi ni board member Pio Jessielito Sumande Sr. matapos nilang aprubahan ang nasabing resolusyon ay nilagdaan na rin ito ni Antique Governor Rhodora J. Cadiao.
Ayon kay Antique Integrated Provincial Health Officer (IPHO) Dr. Ric Noel Naciongayo, nakapagtala ng kabuuang 1,575 kaso ng dengue mula Enero hanggang Hulyo 9 kabilang ang anim na namatay.
Aniya halos 556% na mas mataas kaysa noong nakaraang taon na 241 na mga pasyente kabilang ang dalawang nasawi.
Karamihan sa mga pasyente ay mula sa limang bayan ng San Jose De Buenavista, Sibalom, Hamtic, Bugasong, at Anini-y.
Sinabi naman ni Cadiao na kukuha ng kaukulang budget mula sa natitirang Quick Response Fund (QRF) para sa dengue prevention at response programs.
Sa ngayon sinisikap ng IPHO na mabigyan ang lahat ng local government unit ng mga kagamitan para mapigilan ang pagkalat ng dengue